ಹೊಸದಿಗಂತ ಡಿಜಿಟಲ್ ಡೆಸ್ಕ್:
ರಾಜ್ಯದಲ್ಲಿಯೇ ಅತ್ಯಂತ ಉದ್ದದ ತೇಲುವ ಸೇತುವೆ ಹೊಂದುವ ಮೂಲಕ ಉತ್ತರ ಕನ್ನಡ ಜಿಲ್ಲೆಯ ಪ್ರವಾಸಿ ತಾಣ ಮುರುಡೇಶ್ವರ ಈಗ ಮತ್ತಷ್ಟು ತನ್ನ ಆಕರ್ಷಣೆ ಹೆಚ್ಚಿಸಿಕೊಂಡಿದೆ.
ಅರಬ್ಬಿ ಸಮುದ್ರದ ಮೇಲೆ ಬರೋಬ್ಬರಿ 130 ಮೀಟರ್ ಉದ್ದ ತೇಲುತ್ತಿರುವ ಈ ಸೇತುವೆ ಸಮುದ್ರದಲ್ಲಿ ನಿಂತು ಬೃಹತ್ ಶಿವನ ಪ್ರತಿಮೆ, ಮುರುಡೇಶ್ವರ ದೇವಾಲಯದ ಸೌಂದರ್ಯವನ್ನು ಕಣ್ತುಂಬಿಕೊಳ್ಳಲು ಅವಕಾಶ ನೀಡುತ್ತಿದೆ.
ಈ ಸೇತುವೆಯು ಏಕಕಾಲದಲ್ಲಿ 110 ಜನರನ್ನು ಹಿಡಿದಿಟ್ಟುಕೊಳ್ಳುವ ಸಾಮರ್ಥ್ಯ ಹೊಂದಿದೆ. ಜೊತೆಗೆ ಯಾವುದೇ ಭಯವಿಲ್ಲದೆ ಇದರಲ್ಲಿ ವಿಹರಿಸಬಹುದು. ಏಕೆಂದರೆ ಯಾವುದೇ ಅಪಾಯ ಉಂಟಾದರೂ ತಕ್ಷಣ ರಕ್ಷಣೆಗಾಗಿ ಇಲ್ಲಿ ಪ್ರತೀ 100 ಪ್ರವಾಸಿಗರಿಗೆ 10 ಮಂದಿ ಜೀವರಕ್ಷಕರನ್ನು ನಿಯೋಜಿಸಲಾಗಿದೆ.
ಸಮುದ್ರ ಎಷ್ಟೇ ಪ್ರಕ್ಷುಬ್ಧಗೊಂಡರೂ ಜಗ್ಗದೆ ಉಳಿಯುವ ಸಾಮರ್ಥ್ಯ ಇದಕ್ಕಿದ್ದು, ಸರ್ವಋತುವಿಗೂ ಹೊಂದುವಂತೆ ಇದನ್ನು ನಿರ್ಮಿಸಲಾಗಿದೆ. ಅಂದ ಹಾಗೆ ಮಲ್ಪೆ ಹಾಗೂ ಕೇರಳದ ಬಳಿಕ ಇದು ದೇಶದಲ್ಲಿ ಇದು ಮೂರನೇ ತೇಲುವ ಸೇತುವೆಯಾಗಿದೆ.