ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಹಸ್ತಗಳಿಲ್ಲದಿದ್ದರೂ ಕಾಲುಗಳಿಂದಲೇ ಬಿಲ್ಲು-ಬಾಣ ಹಿಡಿದು ಜಗತ್ತೇ ಹುಬ್ಬೇರಿಸುವಂತೆ ಮಾಡುತ್ತಿರುವ ಭಾರತದ ಅಪರೂಪದ ಧನುರ್ಧಾರಿ, 19 ವರ್ಷದ ಶೀತಲ್ ದೇವಿ, ಏಷ್ಯನ್ ಪಾರಾ ಗೇಮ್ಸ್ 2026ರಲ್ಲಿ ಮತ್ತೊಮ್ಮೆ ಇತಿಹಾಸ ಬರೆದಿದ್ದಾರೆ. ಗುರುವಾರ ನಡೆದ ಮಹಿಳೆಯರ ಕಾಂಪೌಂಡ್ ವಿಭಾಗದ ರೋಚಕ ಫೈನಲ್ ಪಂದ್ಯದಲ್ಲಿ ಸಿಂಗಾಪುರದ ಅಲಿಸ್ ನೂರ್ ಶ್ಯಾಹಿದಾ ಅವರನ್ನು 142-139 ಅಂತರದಿಂದ ಮಣಿಸಿ, ಎರಡನೇ ಚಿನ್ನದ ಪದಕಕ್ಕೆ ಮುತ್ತಿಕ್ಕಿದ್ದಾರೆ.
ಒಕಾಝಾಕಿ ಚುಓ ಸೊಗೊ ಪಾರ್ಕ್ ಮೈದಾನದಲ್ಲಿ ನಡೆದ ಈ ಪಂದ್ಯಕ್ಕೂ ಕೇವಲ ಎರಡು ಗಂಟೆಗಳ ಮೊದಲು, ಶೀತಲ್ ದೇವಿ ಅವರು ತೋಮನ್ ಕುಮಾರ್ ಜೊತೆಗೂಡಿ ಕಾಂಪೌಂಡ್ ಮಿಕ್ಸ್‌ಡ್ ಟೀಮ್ ವಿಭಾಗದಲ್ಲಿ ಮೊದಲ ಚಿನ್ನದ ಪದಕ ಗೆದ್ದಿದ್ದರು. ಆ ಸಂಭ್ರಮದ ಬೆನ್ನಲ್ಲೇ ಮತ್ತೆ ಅಖಾಡಕ್ಕಿಳಿದ ಶೀತಲ್, ತಮ್ಮ ಅದ್ಭುತ ಪ್ರದರ್ಶನದಿಂದ ವೈಯಕ್ತಿಕ ವಿಭಾಗದಲ್ಲೂ ಚಿನ್ನ ಗೆದ್ದು ಪಂದ್ಯಾವಳಿಯಲ್ಲಿ ಭಾರತಕ್ಕೆ ಮೂರನೇ ಪದಕ ತಂದುಕೊಟ್ಟರು.
ಫೈನಲ್ ಪಂದ್ಯದ ಆರಂಭಿಕ ಸುತ್ತುಗಳಲ್ಲಿ ಸಿಂಗಾಪುರದ ಬಿಲ್ಲುಗಾರ್ತಿ ಅಲಿಸ್ ಉತ್ತಮ ಪ್ರದರ್ಶನ ನೀಡಿ 4 ಅಂಕಗಳ ಮುನ್ನಡೆ ಸಾಧಿಸಿದ್ದರು. ಈ ಹಂತದಲ್ಲಿ ಪಂದ್ಯ ಕೈಜಾರುವ ಭೀತಿಯಿತ್ತು. ಆದರೆ, ಒತ್ತಡದ ಸಮಯದಲ್ಲೂ ಧೃತಿಗೆಡದ ವಿಶ್ವ ಚಾಂಪಿಯನ್ ಶೀತಲ್, ಸತತವಾಗಿ 10 ಅಂಕಗಳ ಬಾಣಗಳನ್ನು ಎಸೆಯುವ ಮೂಲಕ ಪಂದ್ಯದ ದಿಕ್ಕನ್ನೇ ಬದಲಾಯಿಸಿದರು. ಬುಲ್ಸ್‌ಐ ಗೆ ಸನಿಹವಾಗಿದ್ದ ‘X’ ಅಂಕಗಳನ್ನು ಪಡೆದು, ಪಂದ್ಯದಲ್ಲಿ 2 ಅಂಕಗಳ ಮುನ್ನಡೆ ಪಡೆದರು.
2023ರ ಹ್ಯಾಂಗ್‌ಝೌ ಏಷ್ಯನ್ ಪಾರಾ ಗೇಮ್ಸ್‌ನಲ್ಲೂ ಶೀತಲ್ ದೇವಿ ಅವರು ಇದೇ ಸಿಂಗಾಪುರದ ಆಟಗಾರ್ತಿಯನ್ನು ಮಣಿಸಿ ಚಿನ್ನ ಗೆದ್ದಿದ್ದರು. ಈ ಬಾರಿಯೂ ಅದೇ ಸಾಹಸವನ್ನು ಮರುಕಳಿಸುವ ಮೂಲಕ ತಮ್ಮ ಚಾಂಪಿಯನ್ ಕಿರೀಟವನ್ನು ಯಶಸ್ವಿಯಾಗಿ ಕಾಯ್ದುಕೊಂಡಿದ್ದಾರೆ.
ಅಂತಿಮ ಸುತ್ತಿನಲ್ಲಿ ಸತತವಾಗಿ 9 ಅಂಕಗಳನ್ನು ಗಳಿಸಿ ಜಯ ಖಚಿತಪಡಿಸಿಕೊಂಡ ಶೀತಲ್, ಶಾರೀರಿಕ ನ್ಯೂನತೆಗಳು ಕೇವಲ ದೇಹಕ್ಕಷ್ಟೇ, ಸಾಧಿಸುವ ಮನಸ್ಸಿಗಲ್ಲ ಎಂಬುದನ್ನು ಜಗತ್ತಿಗೆ ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ.
