ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಶ್ರೀಲಂಕಾ ಜಲಪ್ರದೇಶದಲ್ಲಿ ಅಕ್ರಮವಾಗಿ ಮೀನುಗಾರಿಕೆ ನಡೆಸಿದ ಆರೋಪದ ಮೇಲೆ ಒಂಬತ್ತು ಭಾರತೀಯ ಮೀನುಗಾರರನ್ನು ಶ್ರೀಲಂಕಾ ನೌಕಾಪಡೆ ಬಂಧಿಸಿದೆ. ಮೀನುಗಾರರು ಸಂಚರಿಸುತ್ತಿದ್ದ ಟ್ರಾಲರ್ನ್ನೂ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.
ತಲೈಮನ್ನಾರ್ ಬಳಿ ಕಾರ್ಯಾಚರಣೆ
ಶ್ರೀಲಂಕಾ ನೌಕಾಪಡೆಯ ಮಾಹಿತಿ ಪ್ರಕಾರ, ಬುಧವಾರ ತಡ ರಾತ್ರಿ ತಲೈಮನ್ನಾರ್ನ ಉರುಮಲೈ ಪಾಯಿಂಟ್ ಸಮೀಪ ಭಾರತೀಯ ಮೀನುಗಾರಿಕಾ ದೋಣಿಯೊಂದು ಪತ್ತೆಯಾಗಿದೆ. ಪರಿಶೀಲನೆ ವೇಳೆ ದೋಣಿ ಅಂತಾರಾಷ್ಟ್ರೀಯ ಸಾಗರ ಗಡಿ ರೇಖೆ (IMBL) ದಾಟಿ ಶ್ರೀಲಂಕಾ ವ್ಯಾಪ್ತಿಗೆ ಪ್ರವೇಶಿಸಿರುವುದು ಹಾಗೂ ಅಲ್ಲಿ ಬಾಟಮ್ ಟ್ರಾಲಿಂಗ್ ಮೂಲಕ ಮೀನುಗಾರಿಕೆ ನಡೆಸುತ್ತಿದ್ದ ಆರೋಪ ಕೇಳಿಬಂದಿದೆ.
9 ಮೀನುಗಾರರು, ಟ್ರಾಲರ್ ವಶಕ್ಕೆ
ಕಾರ್ಯಾಚರಣೆಯಲ್ಲಿ ಒಟ್ಟು ಒಂಬತ್ತು ಮೀನುಗಾರರನ್ನು ಬಂಧಿಸಲಾಗಿದ್ದು, ಅವರ ಟ್ರಾಲರ್ನ್ನೂ ವಶಪಡಿಸಿಕೊಳ್ಳಲಾಗಿದೆ. ಬಂಧಿತ ಮೀನುಗಾರರನ್ನು ಮುಂದಿನ ಕಾನೂನು ಪ್ರಕ್ರಿಯೆಗಾಗಿ ಮನ್ನಾರ್ ಮೀನುಗಾರಿಕಾ ನಿರೀಕ್ಷಕರಿಗೆ ಹಸ್ತಾಂತರಿಸಲಾಗುವುದು ಎಂದು ಶ್ರೀಲಂಕಾ ನೌಕಾಪಡೆ ತಿಳಿಸಿದೆ.
ಇದನ್ನೂ ಓದಿ:
ಗಲ್ಫ್ ಆಫ್ ಮನ್ನಾರ್ ಪರಿಸರದ ಬಗ್ಗೆ ಕಳವಳ
ಮನ್ನಾರ್ ದ್ವೀಪ ಮತ್ತು ಆಡಮ್ಸ್ ಬ್ರಿಡ್ಜ್ ಸುತ್ತಮುತ್ತಲಿನ ಗಲ್ಫ್ ಆಫ್ ಮನ್ನಾರ್ ಪ್ರದೇಶ ಸಮುದ್ರ ಜೀವವೈವಿಧ್ಯದ ದೃಷ್ಟಿಯಿಂದ ಅತ್ಯಂತ ಮಹತ್ವದ್ದಾಗಿದೆ. ಈ ಪ್ರದೇಶದಲ್ಲಿ ಮೀನುಗಾರಿಕೆ ಹಾಗೂ ಪರಿಸರ ಸಂರಕ್ಷಣೆಗೆ ಸಂಬಂಧಿಸಿದಂತೆ ಹಲವು ನಿಯಮಗಳು ಜಾರಿಯಲ್ಲಿವೆ ಎಂದು ಶ್ರೀಲಂಕಾ ನೌಕಾಪಡೆ ಹೇಳಿದೆ.
ಈ ವರ್ಷವೂ ಹಲವು ಬಂಧನ
ಅಧಿಕೃತ ಮಾಹಿತಿಯ ಪ್ರಕಾರ, ಏಪ್ರಿಲ್ 15ರವರೆಗೆ ಈ ವರ್ಷ ಶ್ರೀಲಂಕಾ ನೌಕಾಪಡೆ 128 ಭಾರತೀಯ ಮೀನುಗಾರರನ್ನು ಬಂಧಿಸಿ, 18 ಟ್ರಾಲರ್ಗಳನ್ನು ವಶಪಡಿಸಿಕೊಂಡಿತ್ತು. ಇದೀಗ ನಡೆದಿರುವ ಮತ್ತೊಂದು ಬಂಧನವು ಭಾರತ-ಶ್ರೀಲಂಕಾ ನಡುವಿನ ಮೀನುಗಾರಿಕೆ ಸಂಬಂಧಿತ ಸಮಸ್ಯೆಯನ್ನು ಮತ್ತೆ ಮುನ್ನೆಲೆಗೆ ತಂದಿದೆ.
