ಕೃಷಿ ಭೂಮಿಯಲ್ಲಿ ಕಂಡುಬಂತು ವಿದೇಶಿ ಗುರುತಿರುವ ವಿಚಿತ್ರ ವಸ್ತು, ಗಾಬರಿಯಾದ ಗ್ರಾಮಸ್ಥರು

ಹೊಸದಿಗಂತ ವರದಿ ಬೆಳ್ತಂಗಡಿ:

ತಾಲೂಕಿನ ಪುತ್ತಿಲ ಗ್ರಾಮದ ಅಂಚೆ ಕಚೇರಿ ಬಳಿಯ ಕೃಷಿ ಜಮೀನಿನಲ್ಲಿ ವಿದೇಶಿ ಗುರುತು ಇರುವ ವಿಚಿತ್ರ ವಸ್ತುವೊಂದು ಕಂಡುಬಂದಿದ್ದು, ಕೆಲ ಕಾಲ ಸ್ಥಳೀಯರಿಗೆ ಆತಂಕವಾಗಿದೆ.

ಆದರೆ ಇದು ಹವಾಮಾನ ಇಲಾಖೆಯು ಮೇಲ್ಮೈ ಗಾಳಿ ವೀಕ್ಷಣೆಗಾಗಿ ಪ್ರತಿದಿನ ಬಿಡುವ ಜಿಪಿಎಸ್ ಆಧರಿತ ಉಪಕರಣವಾಗಿದೆ ಎಂದು ತಿಳಿದುಬಂದ ನಂತರ ಜನ ನಿಟ್ಟುಸಿರು ಬಿಟ್ಟಿದ್ದಾರೆ. ಇದು ಯಾವುದೇ ಅಪಾಯಕಾರಿ ವಸ್ತುವಲ್ಲ, ಜಿಪಿಎಸ್‌ ಇನ್ಸ್ಟ್ರುಮೆಂಟ್‌ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.

ಏನೀ ಉಪಕರಣ?
ಹೈಡ್ರೋಜನ್ ಅನಿಲ ತುಂಬಿದ ಹವಾಮಾನ ಬಲೂನ್ ಬಳಸಿ ಮಂಗಳೂರು ಡಾಪ್ಲರ್ ವೆದರ್ ರೇಡಾರ್ ಕೇಂದ್ರದಿಂದ ಪ್ರತಿದಿನ ಬೆಳಗ್ಗೆ 4.30 ರ ಸುಮಾರಿಗೆ ಜಿಪಿಎಸ್ ಆಧರಿತ ಈ ಉಪಕರಣವನ್ನು ಬಿಡುಗಡೆ ಮಾಡಲಾಗುತ್ತದೆ. ಇದು ಗಾಳಿಯ ಮೇಲಿನ ತಾಪಮಾನ, ಆರ್ದ್ರತೆ, ಗಾಳಿಯ ದಿಕ್ಕು, ಗಾಳಿಯ ವೇಗ ಮತ್ತು ಇತರ ವಾತಾವರಣದ ನಿಯತಾಂಕಗಳ ಡೇಟಾವನ್ನು ಸಂಗ್ರಹಿಸುತ್ತದೆ. ವಾಯುಯಾನ, ಮಿಲಿಟರಿ ಕಾರ್ಯಾಚರಣೆಗಳು ಮತ್ತು ವಾಯುಮಂಡಲದ ಉಡಾವಣಾ ಚಟುವಟಿಕೆಗಳಿಗೆ ಇಂತಹ ಡೇಟಾ ನಿರ್ಣಾಯಕವಾಗಿದೆ.

ಸಮುದ್ರಕ್ಕೆ ಇಳಿಯುವ ಬದಲು ಕೃಷಿಭೂಮಿಗೆ ಬಿತ್ತು!
ಉಪಕರಣವು ಸಾಮಾನ್ಯವಾಗಿ ಅದರ ವೀಕ್ಷಣಾ ಚಕ್ರವನ್ನು ಪೂರ್ಣಗೊಳಿಸಿದ ನಂತರ ಕೆಳಗಿಳಿಯುತ್ತದೆ ಅಥವಾ ಅರೇಬಿಯನ್ ಸಮುದ್ರದಲ್ಲಿ ಅಥವಾ ಭೂಮಿಯಲ್ಲಿ ಇಳಿಯಬಹುದು. ಶನಿವಾರ ಕೃಷಿಭೂಮಿಯಲ್ಲಿ ಬಿದ್ದಿದ್ದು, ‘ಮಲೇಶಿಯನ್ ಮೆಟ್ ಡಿಪಾರ್ಟ್‌ಮೆಂಟ್’ ಎಂಬ ಸ್ಟಿಕ್ಕರ್ ಹೊಂದಿತ್ತು. ಈ ಉಪಕರಣವನ್ನು ಆಮದು ಮಾಡಿಕೊಳ್ಳಲಾಗಿದೆ ಮತ್ತು ಮೂಲ ಸ್ಟಿಕ್ಕರ್ ನ್ನು ಹೊಂದಿದೆ‌. ಇದರ ಸಂಪೂರ್ಣ ಹೊಣೆಯನ್ನು ಭಾರತೀಯ ಹವಾಮಾನ ಇಲಾಖೆ ನಿರ್ವಹಿಸುತ್ತದೆ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.

ಈ ಉಪಕರಣ ಸುಮಾರು ಆರು ಗಂಟೆಗಳ ಬ್ಯಾಟರಿ ಅವಧಿಯನ್ನು ಹೊಂದಿರುವ ಒಂದು ಬಾರಿ ಬಳಕೆಯ ಸಾಧನವಾಗಿದೆ ಮತ್ತು ಇದನ್ನು ಸಾಮಾನ್ಯವಾಗಿ ಹಿಂಪಡೆಯಲಾಗುವುದಿಲ್ಲ. ಏಕೆಂದರೆ ಅದು ಪ್ರತಿದಿನ ನಾನಾ ಸ್ಥಳಗಳಲ್ಲಿ ಇಳಿಯುತ್ತದೆ. ಪುತ್ತಿಲದಲ್ಲಿ ಕಂಡು ಬಂದ ಉಪಕರಣವನ್ನು ಸಂಗ್ರಹಿಸಲು ಐಎಂಡಿ ಸಿಬ್ಬಂದಿ, ವೈಜ್ಞಾನಿಕ ಸಹಾಯಕ ಕರಣ್ ಸಿಂಗ್ ಇಲಾಖೆಗೆ ಮಾಹಿತಿ ನೀಡಿದ ಬಳಿಕ ಆಗಮಿಸಿದರು.

ಬಲೂನ್‌ ಸೋರುತ್ತಿದ್ದರೆ ದೂರ ಇರಿ
ಸಾರ್ವಜನಿಕರು ಭಯಭೀತರಾಗುವ ಅಗತ್ಯವಿಲ್ಲ. ಇದು ಹಾನಿಕಾರಕವಲ್ಲ. ಬ್ಯಾಟರಿ,ಸಂವೇದಕಗಳು ಮತ್ತು ಜಿಪಿಎಸ್ ಉಪಕರಣಗಳನ್ನು ಮಾತ್ರ ಒಳಗೊಂಡಿದೆ. ಆದರೆ ಬಲೂನ್ ಸೋರುವ ಹಂತವನ್ನು ತಲುಪಿದರೆ, ಜನರು ಅದರಿಂದ ದೂರವಿರಬೇಕು. ಇದೇ ರೀತಿಯ ಉಪಕರಣಗಳು ಮತ್ತೆ ಕಂಡುಬಂದರೆ ಭಯಪಡುವ ಅಗತ್ಯವಿಲ್ಲ. ಅವು ಯಾವುದೇ ಅಪಾಯವನ್ನುಂಟುಮಾಡುವುದಿಲ್ಲ ಮತ್ತು ಅವುಗಳನ್ನು ಕೇವಲ ವೈಜ್ಞಾನಿಕ ಉದ್ದೇಶಗಳಿಗಾಗಿ ಮಾತ್ರ ಬಳಸಲಾಗುತ್ತದೆ ಮಂಗಳೂರಿನ ಭಾರತೀಯ ಹವಾಮಾನ ಇಲಾಖೆಯ ವಿಜ್ಞಾನಿ ಸಜೀವ್ ಆರ್. ತಿಳಿಸಿದ್ದಾರೆ.