November 16, 2026
Monday, November 16, 2026
spot_img

ಬೆಂಗಳೂರಿನ FEI ಡ್ರೆಸೇಜ್ ವರ್ಲ್ಡ್ ಚಾಲೆಂಜ್‌ನಲ್ಲಿ ಮಿಂಚಲು ಸಜ್ಜಾದ ತಾರಿಣಿ ಲೋಧಾ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌:

ಮುಂಬೈ ಮೂಲದ 14 ವರ್ಷದ ಯುವ ಕುದುರೆ ಸವಾರಿ ಕ್ರೀಡಾಪಟು ತಾರಿಣಿ ಲೋಧಾ ಅವರು ಬೆಂಗಳೂರಿನ ಸರ್ಜ್ ಸ್ಟೇಬಲ್ಸ್‌ನಲ್ಲಿ ನವೆಂಬರ್ 16ರಿಂದ 20ರವರೆಗೆ ನಡೆಯಲಿರುವ FEI ಡ್ರೆಸೇಜ್ ವರ್ಲ್ಡ್ ಚಾಲೆಂಜ್ 2026 (ದಕ್ಷಿಣ ವಲಯ) ಸ್ಪರ್ಧೆಯಲ್ಲಿ ಭಾಗವಹಿಸಲಿದ್ದಾರೆ. ಮುಂಬೈನ ಅಮೆಚೂರ್ ರೈಡರ್ಸ್ ಕ್ಲಬ್ (ARC) ಅನ್ನು ಪ್ರತಿನಿಧಿಸಲಿರುವ ತಾರಿಣಿ, ರಾಷ್ಟ್ರೀಯ ಮಟ್ಟದ ಕುದುರೆ ಸವಾರಿ ಸ್ಪರ್ಧೆಗಳಲ್ಲಿ ತಮ್ಮ ಉತ್ತಮ ಪ್ರದರ್ಶನದ ಮೂಲಕ ಗಮನ ಸೆಳೆದಿದ್ದು, ಮತ್ತೊಂದು ಪ್ರಮುಖ ಸ್ಪರ್ಧೆಗೆ ಸಜ್ಜಾಗಿದ್ದಾರೆ.

ಡ್ರೆಸೇಜ್ ವಿಭಾಗದಲ್ಲಿ ವಿಶೇಷ ಆಸಕ್ತಿ ಹೊಂದಿರುವ ತಾರಿಣಿ, ಈ ಹಿಂದೆ ಶೋ ಜಂಪಿಂಗ್ ಸ್ಪರ್ಧೆಗಳಲ್ಲಿಯೂ ಭಾಗವಹಿಸಿದ್ದು, ಕಾಂಕೋರ್ಸ್ ಸಾಟ್ ನ್ಯಾಷನಲ್‌ನಲ್ಲಿ ಚಿನ್ನದ ಪದಕ ಗೆದ್ದಿದ್ದಾರೆ. ತಮ್ಮ 10ನೇ ವಯಸ್ಸಿನಲ್ಲೇ ಸ್ಪರ್ಧೆಗಳಲ್ಲಿ ಭಾಗವಹಿಸಲು ಆರಂಭಿಸಿದ ಅವರು, ಪ್ರಸ್ತುತ ಚೆನ್ನೈ ಈಕ್ವಿಟೇಷನ್ ಸೆಂಟರ್‌ನ ಇಸಾಬೆಲ್ ಹಸ್ಲೆಡರ್ ಹಾಗೂ ಮುಂಬೈನ ಅಮೆಚೂರ್ ರೈಡರ್ಸ್ ಕ್ಲಬ್‌ನ (ARC) ಬೋಬಿನ್ ತ್ಶೆರಿಂಗ್ ಅವರ ಮಾರ್ಗದರ್ಶನದಲ್ಲಿ ತರಬೇತಿ ಪಡೆಯುತ್ತಿದ್ದಾರೆ.

ವಾರದಲ್ಲಿ ಐದು ದಿನ ಕುದುರೆ ಸವಾರಿ ಅಭ್ಯಾಸ ಮಾಡುವ ತಾರಿಣಿ, ದೈಹಿಕ ಸಾಮರ್ಥ್ಯ ಮತ್ತು ಶಕ್ತಿ ಹೆಚ್ಚಿಸಿಕೊಳ್ಳುವ ತರಬೇತಿಯನ್ನೂ ಪಡೆಯುತ್ತಿದ್ದಾರೆ. ಡ್ರೆಸೇಜ್ ಸ್ಪರ್ಧೆಗೆ ಅಗತ್ಯವಿರುವ ನಿಖರತೆ, ಸಮತೋಲನ, ತಂತ್ರಗಾರಿಕೆ ಹಾಗೂ ಕುದುರೆಯೊಂದಿಗಿನ ಉತ್ತಮ ಹೊಂದಾಣಿಕೆಯನ್ನು ಬೆಳೆಸಿಕೊಳ್ಳುವತ್ತ ಅವರು ವಿಶೇಷ ಗಮನ ಹರಿಸುತ್ತಿದ್ದಾರೆ.

ತಾರಿಣಿಯ ಕ್ರೀಡಾ ಪಯಣದಲ್ಲಿ ಅವರ ಕುದುರೆ ‘ನಾಕ್ ಔಟ್’ ಪ್ರಮುಖ ಪಾತ್ರ ವಹಿಸಿದೆ. ಈ ಜೋಡಿ 2025ರಲ್ಲಿ ಬೆಂಗಳೂರಿನಲ್ಲಿ ನಡೆದ ಈಕ್ವೆಸ್ಟ್ರಿಯನ್ ಪ್ರೀಮಿಯರ್ ಲೀಗ್‌ನ ಚಿಲ್ಡ್ರನ್ ಡ್ರೆಸೇಜ್ ವಿಭಾಗದಲ್ಲಿ 65.841% ಅಂಕಗಳನ್ನು ಗಳಿಸಿ ಚಿನ್ನದ ಪದಕ ಗೆದ್ದಿತ್ತು. 2025ರ ಡಿಸೆಂಬರ್‌ನಲ್ಲಿ ನಡೆದ ಜೂನಿಯರ್ ನ್ಯಾಷನಲ್ ಈಕ್ವೆಸ್ಟ್ರಿಯನ್ ಚಾಂಪಿಯನ್‌ಶಿಪ್‌ನ ಚಿಲ್ಡ್ರನ್ ಗ್ರೂಪ್ ಡ್ರೆಸೇಜ್ ತಂಡದ ವಿಭಾಗದಲ್ಲಿಯೂ 70.154% ಅಂಕಗಳನ್ನು ಗಳಿಸುವ ಮೂಲಕ ತಾರಿಣಿ ಉತ್ತಮ ಪ್ರದರ್ಶನ ನೀಡಿದ್ದರು. ಅವರ ಪ್ರದರ್ಶನದ ನೆರವಿನಿಂದ ತಂಡವು ಒಟ್ಟು 272.579 ಅಂಕಗಳನ್ನು ಗಳಿಸಿ ಕಂಚಿನ ಪದಕ ಗೆದ್ದಿತ್ತು.

ಇತ್ತೀಚೆಗೆ ನಡೆದ ಡ್ರೀಮ್ ಅಲೈಯನ್ಸ್ 6 ಸ್ಪರ್ಧೆಯಲ್ಲಿ ಈ ಜೋಡಿ 69.137% ಅಂಕಗಳನ್ನು ಗಳಿಸಿತ್ತು. ಅಲ್ಲದೆ, 71.85% ಅಂಕಗಳನ್ನು ಪಡೆಯುವ ಮೂಲಕ ಈ ವರ್ಷದ ಡಿಸೆಂಬರ್‌ನಲ್ಲಿ ನಡೆಯಲಿರುವ ರಾಷ್ಟ್ರೀಯ ಮಟ್ಟದ ಸ್ಪರ್ಧೆಗೆ ಅರ್ಹತೆ ಗಿಟ್ಟಿಸಿಕೊಂಡಿದೆ.

ಸ್ಪರ್ಧೆಯ ಕುರಿತು ಮಾತನಾಡಿದ ತಾರಿಣಿ ಲೋಧಾ, “ಬೆಂಗಳೂರಿನಲ್ಲಿ ನಡೆಯಲಿರುವ FEI ಡ್ರೆಸೇಜ್ ವರ್ಲ್ಡ್ ಚಾಲೆಂಜ್‌ನಲ್ಲಿ ಭಾಗವಹಿಸಲು ಉತ್ಸುಕಳಾಗಿದ್ದೇನೆ. ನನ್ನ ತಂತ್ರ, ಸ್ಥಿರತೆ ಮತ್ತು ಆತ್ಮವಿಶ್ವಾಸವನ್ನು ಹೆಚ್ಚಿಸಿಕೊಳ್ಳಲು ನಿರಂತರ ಅಭ್ಯಾಸ ಮಾಡುತ್ತಿದ್ದೇನೆ. ನನ್ನ ಕುದುರೆ ನಾಕ್ ಔಟ್ ಜೊತೆಗಿನ ಹೊಂದಾಣಿಕೆ ನನ್ನ ಕ್ರೀಡಾ ಪಯಣದಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಪ್ರತಿಯೊಂದು ಸ್ಪರ್ಧೆಯೂ ಹೊಸ ವಿಷಯಗಳನ್ನು ಕಲಿಯಲು ಮತ್ತು ಉತ್ತಮ ರೈಡರ್ ಆಗಿ ಬೆಳೆಯಲು ಒಂದು ಅವಕಾಶವಾಗಿದೆ” ಎಂದರು.

ಕೋಚ್ ಇಸಾಬೆಲ್ ಹಸ್ಲೆಡರ್ ಮಾತನಾಡಿ, “ತಾರಿಣಿ ಕುದುರೆ ಸವಾರಿ ಕ್ರೀಡೆಯ ಬಗ್ಗೆ ಹೆಚ್ಚಿನ ಆಸಕ್ತಿ, ಬದ್ಧತೆ ಮತ್ತು ಕಲಿಯುವ ಉತ್ಸಾಹ ಹೊಂದಿದ್ದಾರೆ. ನಾಕ್ ಔಟ್ ಜೊತೆಗಿನ ಅವರ ಹೊಂದಾಣಿಕೆ ಉತ್ತಮವಾಗುತ್ತಿದ್ದು, ಅಭ್ಯಾಸದಲ್ಲಿಯೂ ಶಿಸ್ತು ಮತ್ತು ಸ್ಥಿರತೆ ತೋರುತ್ತಿದ್ದಾರೆ. ಪ್ರಸ್ತುತ ಅವರ ನಿಖರತೆ ಮತ್ತು ಆತ್ಮವಿಶ್ವಾಸ ಹೆಚ್ಚಿಸುವತ್ತ ಗಮನ ಹರಿಸುತ್ತಿದ್ದೇವೆ. FEI ವರ್ಲ್ಡ್ ಚಾಲೆಂಜ್ ಅವರಿಗೆ ತಮ್ಮ ಸಾಮರ್ಥ್ಯ ಪ್ರದರ್ಶಿಸಲು ಮತ್ತು ಕ್ರೀಡಾಪಟುವಾಗಿ ಬೆಳೆಯಲು ಉತ್ತಮ ವೇದಿಕೆಯಾಗಿದೆ” ಎಂದರು.

FEI ಡ್ರೆಸೇಜ್ ವರ್ಲ್ಡ್ ಚಾಲೆಂಜ್ 2026 (ದಕ್ಷಿಣ ವಲಯ) ಸ್ಪರ್ಧೆಯು ಬೆಂಗಳೂರಿನ ಸರ್ಜ್ ಸ್ಟೇಬಲ್ಸ್‌ನಲ್ಲಿ ನವೆಂಬರ್ 16ರಿಂದ 20ರವರೆಗೆ ನಡೆಯಲಿದೆ.

Must Read