ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ತಮಿಳು ಸೂಪರ್ಸ್ಟಾರ್, ತಲೈವಾ ರಜಿನಿಕಾಂತ್ ನಟನೆಯ ಬಹುನಿರೀಕ್ಷಿತ ‘ಜೈಲರ್’ ಚಿತ್ರದ ಬಿಡುಗಡೆಗೆ ಕ್ಷಣಗಣನೆ ಆರಂಭಗೊಂಡಿದ್ದು, ಇದರ ಬೆನ್ನಲ್ಲೇ ದೇಶದೆಲ್ಲೆಡೆ ಅಭಿಮಾನಿಗಳ ಕಾತುರ ಹೆಚ್ಚಾಗಿದ್ದು, ಟಿಕೆಟ್ ಬುಕ್ಕಿಂಗ್ ಕೂಡ ತೆರದಿದೆ.
ಇತ್ತ ರಾಜ್ಯರಾಜಧಾನಿ ಬೆಂಗಳೂರಿನಲ್ಲಿ ಕೂಡ ಸಿನಿಮಾ ಟಿಕೆಟ್ ಗಾಗಿ ಜನ ಮುಗಿಬಿದ್ದಿದ್ದು,ಜನರಿಗೆ ದಿಢೀರ್ ದರ ಏರಿಕೆಯ ಬಿಸಿ ಮುಟ್ಟಿಸಿದೆ.
ನೆಲ್ಸನ್ ದಿಲೀಪ್‌ಕುಮಾರ್ ನಿರ್ದೇಶನದ ‘ಜೈಲರ್’ ಚಿತ್ರದಲ್ಲಿ ಸೂಪರ್ಸ್ಟಾರ್ ರಜನಿಕಾಂತ್ ಕಾಣಿಸಿಕೊಂಡಿದ್ದು, ಸಹಸ್ರಾರು ಸಂಖ್ಯೆಯ ತಲೈವಾ ಅಭಿಮಾನಿಗಳು ಸಿನಿಮಾ ನೋಡಲು ಕಾತರದಿಂದ ಕಾಯುತ್ತಿದ್ದಾರೆ. ಸಿನಿಪ್ರಿಯರು ನಾ ಮುಂದು ತಾ ಮುಂದು ಎಂದು ಟಿಕೆಟ್ ಖರೀದಿ ಮಾಡಲು ದೌಡಾಯಿಸಿದ್ದಾರೆ. ಈ ವೇಳೆ ಕರ್ನಾಟಕದಲ್ಲಿ ಜೈಲರ್ ಚಿತ್ರ ನೋಡಲು ಆಸೆ ಪಟ್ಟ ಸಿನಿಮಾ ಪ್ರೇಕ್ಷಕರಿಗೆ ಇದೀಗ ಶಾಕ್ ಎದುರಾಗಿದ್ದು, ಜೈಲರ್ ಟಿಕೆಟ್ ದರದಲ್ಲಿ ಭಾರೀ ಏರಿಕೆ ಮಾಡಲಾಗಿದೆ.
ಓಪನಿಂಗ್ ದಿನವೇ ಜೈಲರ್ ಚಿತ್ರದ 1090ಕ್ಕೂ ಹೆಚ್ಚು ಶೋಗಳು ಬೆಂಗಳೂರಿನಲ್ಲಿ ಪ್ರದರ್ಶನಗೊಳ್ಳಲಿದೆ. ಜೈಲರ್ ಚಿತ್ರವು ಕೆಜಿಎಫ್ 2 (1037 ಶೋಗಳು) ಮತ್ತು ಅವತಾರ್: ದಿ ವೇ ಆಫ್ ವಾಟರ್ (1014 ಶೋಗಳು) ಚಿತ್ರಗಳ ಹಿಂದಿನ ದಾಖಲೆಗಳನ್ನು ಇದೀಗ ಹಿಂದಿಕ್ಕಿದೆ. ರಜನಿಕಾಂತ್ ಅವರ ಸಿನಿಮಾಗೆ ಅಭಿಮಾನಿಗಳು ತೀವ್ರ ಕುತೂಹಲ ವ್ಯಕ್ತಪಡಿಸಿದ್ದು, ಸಿನಿಮಾ ಬಿಡುಗಡೆಗಾಗಿ ತುದಿಗಾಲಿನಲ್ಲಿದ್ದಾರೆ.
ಇದರೊಟ್ಟಿಗೆ ಚಿತ್ರದ ಟಿಕೆಟ್ ದರ ಮಲ್ಟಿಪ್ಲೆಕ್ಸ್ಗಳಲ್ಲಿ ಭಾರೀ ದುಬಾರಿಯಾಗಿದ್ದು, 500, 700, 1000, 1500 ರೂ.ವರೆಗೂ ಏರಿಕೆ ಕಂಡಿದೆ. ಈ ವಿಚಾರ ಕನ್ನಡಿಗರನ್ನು ಕೆರಳಿಸಿದ್ದು, ಕನ್ನಡ ಸಿನಿಮಾಗಳಿಗೆ ಇಲ್ಲದ ಆದ್ಯತೆ, ಮನ್ನಣೆ ಅನ್ಯ ಭಾಷೆಯ ಸಿನಿಮಾಗಳಿಗೆ ಏಕೆ? ಟಿಕೆಟ್ ದರದಲ್ಲಿ ಯಾಕಿಷ್ಟು ಹೆಚ್ಚಳ ಎಂದು ಪ್ರಶ್ನಿಸುವ ಮುಖೇನ ಕನ್ನಡ ಸಿನಿಪ್ರಿಯರು ಕಿಡಿಕಾರಿದ್ದಾರೆ.
