ಪ್ರವಾಸ ಎನ್ನುವುದು ಪ್ರತಿಯೊಬ್ಬರ ಜೀವನದಲ್ಲೂ ಹೊಸ ಉತ್ಸಾಹ ಮತ್ತು ಸಂತೋಷವನ್ನು ತರುತ್ತದೆ. ಆದರೆ, ಹಲವರಿಗೆ ಪ್ರಯಾಣ ಆರಂಭವಾಗುತ್ತಿದ್ದಂತೆ ತಲೆಸುತ್ತು, ಹೊಟ್ಟೆ ತೊಳಸುವುದು ಮತ್ತು ವಾಂತಿಯಾಗುವ ಸಮಸ್ಯೆ ಶುರುವಾಗುತ್ತದೆ. ಇದು ಇಡೀ ಪ್ರವಾಸದ ಮಜಾವನ್ನು ಹಾಳುಗೆಡವುತ್ತದೆ. ವಾಹನ ಚಲಿಸುವಾಗ ನಮ್ಮ ಕಣ್ಣುಗಳು, ಒಳ ಕಿವಿ ಮತ್ತು ಸ್ನಾಯುಗಳು ಮೆದುಳಿಗೆ ಕಳುಹಿಸುವ ಚಲನೆಯ ಸಂಕೇತಗಳಲ್ಲಿ ವ್ಯತ್ಯಾಸ ಉಂಟಾದಾಗ ಈ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ. ವಿಶೇಷವಾಗಿ ಘಾಟ್ ಸೆಕ್ಷನ್, ತಿರುವುಗಳ ರಸ್ತೆಗಳು ಅಥವಾ ದೀರ್ಘಾವಧಿಯ ಪ್ರಯಾಣದಲ್ಲಿ ಇದು ಹೆಚ್ಚಾಗಿ ಕಾಡುತ್ತದೆ. ಆದರೆ, ಸರಿಯಾದ ಆಸನದ ಆಯ್ಕೆ, ಲಘು ಆಹಾರ ಪದ್ಧತಿ ಮತ್ತು ಕೆಲವು ನೈಸರ್ಗಿಕ ಮನೆಮದ್ದುಗಳನ್ನು ಅನುಸರಿಸುವ ಮೂಲಕ ಈ ಸಮಸ್ಯೆಯನ್ನು ಸಂಪೂರ್ಣವಾಗಿ ನಿಯಂತ್ರಿಸಬಹುದು ಮತ್ತು ನಮ್ಮ ಪ್ರಯಾಣವನ್ನು ಆನಂದದಾಯಕವಾಗಿ ಮಾಡಿಕೊಳ್ಳಬಹುದು.
ಪ್ರಯಾಣದ ವೇಳೆ ಅನುಸರಿಸಬೇಕಾದ ಕೆಲವು ಟಿಪ್ಸ್ಗಳು:
ಯಾವಾಗಲೂ ಬಸ್ನ ಮುಂಭಾಗದ ಸೀಟುಗಳಲ್ಲಿ ಅಥವಾ ಮಧ್ಯಭಾಗದ ಆಸನಗಳಲ್ಲಿ ಕುಳಿತುಕೊಳ್ಳಬೇಕು. ಹಿಂಬದಿಯ ಸೀಟುಗಳಲ್ಲಿ ಕುಳಿತುಕೊಂಡರೆ ಕುಲುಕಾಟ ಹೆಚ್ಚಾಗಿ ವಾಂತಿಯಾಗುತ್ತದೆ. ಕಾರಿನಲ್ಲಿ ಮುಂಭಾಗದ ಸೀಟಿನಲ್ಲಿ ಕುಳಿತುಕೊಳ್ಳುವುದು ಉತ್ತಮ. ಪ್ರಯಾಣದ ಸಮಯದಲ್ಲಿ ಗಾಡಿಯ ಒಳಗಿನ ವಸ್ತುಗಳನ್ನು ನೋಡುವ ಬದಲು, ಕಿಟಕಿಯಿಂದ ದೂರದ ಹಾರಿಜಾನ್ ಕಡೆಗೆ ಗಮನ ಹರಿಸಬೇಕು.
ಪ್ರವಾಸ ಹೊರಡುವ ಮುನ್ನ ಖಾಲಿ ಹೊಟ್ಟೆಯಲ್ಲಿ ಇರಬಾರದು. ಹಗುರವಾದ ಮತ್ತು ಸುಲಭವಾಗಿ ಜೀರ್ಣವಾಗುವ ಆಹಾರವನ್ನು ಸ್ವಲ್ಪ ಪ್ರಮಾಣದಲ್ಲಿ ಸೇವಿಸಬೇಕು. ಪ್ರಯಾಣಕ್ಕೆ ಮುಂಚಿತವಾಗಿ ಅತಿಯಾದ ಎಣ್ಣೆ, ಮಸಾಲೆ, ಹಾಲಿನ ಉತ್ಪನ್ನಗಳು ಮತ್ತು ಗ್ಯಾಸ್ ಉಂಟುಮಾಡುವ ಆಹಾರಗಳನ್ನು ಸೇವಿಸಬಾರದು. ಪ್ರಯಾಣದ ಸಮಯದಲ್ಲಿ ಶುಂಠಿ ಮಿಠಾಯಿ ಅಥವಾ ಪುದೀನಾ ಚಾಕೊಲೇಟ್ಗಳನ್ನು ಚೀಪುವುದರಿಂದ ವಾಂತಿ ಬರುವುದು ತಕ್ಷಣ ನಿಲ್ಲುತ್ತದೆ.
ಪ್ರಯಾಣದ ವೇಳೆ ಒಂದು ಸಣ್ಣ ಲಿಂಬೆಹಣ್ಣನ್ನು ಜೊತೆಯಲ್ಲಿಟ್ಟುಕೊಳ್ಳಬೇಕು. ವಾಂತಿ ಬರುವಂತೆ ಅನಿಸಿದಾಗ ಅದರ ಸಿಪ್ಪೆಯನ್ನು ಮೂಸಿನೋಡುವುದು ಅಥವಾ ಲಿಂಬೆ ರಸಕ್ಕೆ ಸ್ವಲ್ಪ ಉಪ್ಪು ಹಾಕಿ ತಿನ್ನುವುದರಿಂದ ತಕ್ಷಣ ಆರಾಮಾಗುತ್ತದೆ. ಬಾಯಿಯಲ್ಲಿ ಒಂದು ಲವಂಗ ಅಥವಾ ಏಲಕ್ಕಿಯನ್ನು ಇಟ್ಟುಕೊಂಡು ಅದರ ರಸವನ್ನು ನಿಧಾನವಾಗಿ ನುಂಗುತ್ತಿದ್ದರೆ ಹೊಟ್ಟೆ ತೊಳಸುವುದು ಕಡಿಮೆಯಾಗುತ್ತದೆ.
ಚಲಿಸುವ ವಾಹನದಲ್ಲಿ ಕುಳಿತು ಮೊಬೈಲ್ ನೋಡುವುದು ಅಥವಾ ಪುಸ್ತಕ ಓದುವುದರಿಂದ ಕಣ್ಣು ಮತ್ತು ಮೆದುಳಿನ ಸಮತೋಲನ ತಪ್ಪಿ ತಕ್ಷಣ ವಾಂತಿಯಾಗುತ್ತದೆ. ರೈಲು ಅಥವಾ ಬಸ್ಗಳಲ್ಲಿ ವಾಹನ ಚಲಿಸುವ ದಿಕ್ಕಿಗೆ ವಿರುದ್ಧವಾಗಿ ಎಂದಿಗೂ ಕುಳಿತುಕೊಳ್ಳಬಾರದು.
ನಿಮಗೆ ತೀವ್ರವಾದ ವಾಂತಿ ಸಮಸ್ಯೆಯಿದ್ದರೆ, ಪ್ರಯಾಣ ಆರಂಭಿಸುವ 30ನಿಮಿಷಗಳ ಮುಂಚಿತವಾಗಿ ವೈದ್ಯರ ಸಲಹೆಯ ಮೇರೆಗೆ ಅವೊಮಿನ್ ಅಥವಾ ಡೊಂಪೆರಿಡೋನ್ ನಂತಹ ಮೋಷನ್ ಸಿಕ್ನೆಸ್ ನಿರೋಧಕ ಮಾತ್ರೆಗಳನ್ನು ತೆಗೆದುಕೊಳ್ಳಬಹುದು.
