ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಆಮಿರ್ ಖಾನ್ ನಿರ್ಮಾಣ ಮಾಡಿದ ‘ಲಾಪತಾ ಲೇಡೀಸ್’ ನೆಟ್ಫ್ಲಿಕ್ಸ್ನಲ್ಲಿ ಭರ್ಜರಿ ಯಶಸ್ಸು ಮಾಡಿದೆ. ಥಿಯೇಟರ್ಗಳಲ್ಲಿ ಹೇಳಿಕೊಳ್ಳುವಷ್ಟು ಲಾಭವಾಗದೇ ಇದ್ದರೂ ಒಟಿಟಿಯಲ್ಲಿ ಸಿನಿಮಾ ಜನರ ಮೆಚ್ಚುಗೆಗೆ ಪಾತ್ರವಾಗಿದೆ.
ಹೊಸ ಮುಖಗಳ ಸಿನಿಮಾ ಇದಾಗಿದ್ದರೂ ಜನ ಪ್ರೀತಿಯಿಂದ ಅಪ್ಪಿಕೊಂಡಿದ್ದಾರೆ. ನಿಶ್ಕಲ್ಮಶ ಪ್ರೀತಿ, ಸಾಫ್ಟ್ ಫೆಮಿನಿಸಮ್ನಿಂದ ಸಿನಿಮಾ ಜನರಿಗೆ ಹತ್ತಿರವಾಗಿದೆ. ಅಷ್ಟೇ ಅಲ್ಲದೆ ಈ ಸಿನಿಮಾ ಬಾಲಿವುಡ್ನಲ್ಲಿ ಕೋಟಿ ಕೋಟಿ ಕಮಾಯಿ ಮಾಡಿರುವ ಅನಿಮಲ್ ಸಿನಿಮಾದ ರೆಕಾರ್ಡ್ ಮುರಿದಿದೆ.
ನೆಟ್ಫ್ಲಿಕ್ಸ್ನಲ್ಲಿ ಅನಿಮಲ್ ರಿಲೀಸ್ ಆದಾಗ ಭರ್ಜರಿ ಕಮಾಯಿ ಮಾಡಿತ್ತು. ಆದರೆ ಲಾಪತಾ ಲೇಡೀಸ್ ರಿಲೀಸ್ನ ಎರಡೇ ತಿಂಗಳಿನಲ್ಲಿ ಅನಿಮಲ್ ಸಿನಿಮಾಗಿಂತ ಹೆಚ್ಚು ಕಮಾಯಿ ಮಾಡಿದೆ, ಹೆಚ್ಚು ಜನರು ಈ ಸಿನಿಮಾವನ್ನು ವೀಕ್ಷಿಸಿದ್ದಾರೆ.
ಹಲವು ವರ್ಷಗಳ ಬಳಿಕ ಕಿರಣ್ ರಾವ್ ಅವರು ನಿರ್ದೇಶನ ಮಾಡಿದ ಸಿನಿಮಾ ‘ಲಾಪತಾ ಲೇಡೀಸ್’. ಈ ಚಿತ್ರದಲ್ಲಿ ಸ್ಪರ್ಶ್ ಶ್ರೀವಾಸ್ತವ್, ನಿತಾನ್ಷಿ ಗೋಯಲ್, ಪ್ರತಿಭಾ ರಂಟಾ, ಛಾಯಾ ಕದಂ, ರವಿ ಕಿಶನ್ ಮುಂತಾದ ಕಲಾವಿದರು ಅಭಿನಯಿಸಿದ್ದಾರೆ. ಸಿನಿಮಾದ ಕಥೆ ಎಲ್ಲರಿಗೂ ಇಷ್ಟ ಆಗುತ್ತಿದೆ.
ಎಲ್ಲ ಕಲಾವಿದರ ಅಭಿನಯಕ್ಕೆ ಭರಪೂರ ಮೆಚ್ಚುಗೆ ಸಿಗುತ್ತಿದೆ. ‘ಲಾಪತಾ ಲೇಡೀಸ್’ ಸಿನಿಮಾದಲ್ಲಿ ಒಂದು ಭಾವನಾತ್ಮಕವಾದ ಕಹಾನಿ ಇದೆ. ಸಿನಿಮಾದಲ್ಲಿನ ಅನೇಕ ಸನ್ನಿವೇಶಗಳು ಪ್ರೇಕ್ಷಕರಿಗೆ ಕನೆಕ್ಟ್ ಆಗುತ್ತಿವೆ. ಇದೊಂದು ಹೃದಯಸ್ಪರ್ಶಿ ಸಿನಿಮಾ ಎಂದು ನೆಟ್ಟಿಗರು ಹೊಗಳುತ್ತಿದ್ದಾರೆ.