ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಫೈನಲ್ ಸೋಲಿನ ನಿರಾಸೆಯನ್ನು ಹೆಚ್ಚು ಕಾಲ ಉಳಿಸಿಕೊಳ್ಳದ ಭಾರತದ ತಾರೆ ಪಿ.ವಿ. ಸಿಂಧು, ಹೈಲೋ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಚಾಂಪಿಯನ್ ಪಟ್ಟಕ್ಕೇರಿದ್ದಾರೆ. ಭಾನುವಾರ ನಡೆದ ಮಹಿಳೆಯರ ಸಿಂಗಲ್ಸ್ ಫೈನಲ್‌ನಲ್ಲಿ ಡೆನ್ಮಾರ್ಕ್‌ನ ಲೈನ್ ಕೇರ್ಸ್‌ಫೆಲ್ಡ್ ಅವರನ್ನು 21-12, 21-14 ಅಂತರದಲ್ಲಿ ಮಣಿಸಿದ ಸಿಂಧು, ಈ ಋತುವಿನ ಎರಡನೇ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.
ನೇರ ಗೇಮ್‌ಗಳಲ್ಲಿ ಸಿಂಧು ಪ್ರಾಬಲ್ಯ
ಆರಂಭಿಕ ಗೇಮ್‌ನಲ್ಲಿ ಎದುರಾಳಿ ಆರಂಭದಲ್ಲಿ ಪೈಪೋಟಿ ನೀಡಿದರೂ, ಸಿಂಧು ತಮ್ಮ ಚುರುಕಿನ ಆಟದಿಂದ ಕ್ರಮೇಣ ಹಿಡಿತ ಸಾಧಿಸಿದರು. ವಿರಾಮದ ವೇಳೆಗೆ 11-8 ಮುನ್ನಡೆ ಪಡೆದ ಅವರು, ಆಕ್ರಮಣಕಾರಿ ಹೊಡೆತಗಳು ಮತ್ತು ನಿಖರ ರಿಟರ್ನ್‌ಗಳ ಮೂಲಕ ಮೊದಲ ಗೇಮ್ ಅನ್ನು 21-12ರಿಂದ ಗೆದ್ದರು.
ಎರಡನೇ ಗೇಮ್‌ನಲ್ಲಿ ಕೇರ್ಸ್‌ಫೆಲ್ಡ್ ಪ್ರತಿರೋಧ ತೋರಿದರು. ಒಂದು ಹಂತದಲ್ಲಿ ಅಂತರವನ್ನು 7-6ಕ್ಕೆ ಇಳಿಸಿದರೂ, ಸಿಂಧು ಮತ್ತೆ ಆಟದ ವೇಗ ಹೆಚ್ಚಿಸಿದರು. ವಿರಾಮದ ವೇಳೆಗೆ 11-7 ಮುನ್ನಡೆ ಸಾಧಿಸಿದ ಅವರು, ಬಳಿಕ 19-11ಕ್ಕೆ ತಲುಪಿದರು. ಎದುರಾಳಿಯ ಕೊನೆಯ ಹೋರಾಟದ ನಡುವೆಯೂ ಒತ್ತಡಕ್ಕೆ ಮಣಿಯದೆ 21-14ರಿಂದ ಗೇಮ್ ಗೆದ್ದು ಪ್ರಶಸ್ತಿ ಖಚಿತಪಡಿಸಿಕೊಂಡರು.
ಇದನ್ನೂ ಓದಿ:
ಈ ಋತುವಿನಲ್ಲಿ ಎರಡನೇ ಪ್ರಶಸ್ತಿ
ಜುಲೈನಲ್ಲಿ ನಡೆದ ಜಪಾನ್ ಓಪನ್‌ನಲ್ಲಿ ಪ್ರಶಸ್ತಿ ಗೆದ್ದಿದ್ದ ಸಿಂಧು, ಇದೀಗ ಹೈಲೋ ಓಪನ್ ಮೂಲಕ ಮತ್ತೊಂದು ಕಿರೀಟ ತಮ್ಮದಾಗಿಸಿಕೊಂಡಿದ್ದಾರೆ. ಕಳೆದ ವಾರ ಫ್ರೆಂಚ್ ಓಪನ್ ಫೈನಲ್‌ನಲ್ಲಿ ವಿಶ್ವದ ನಂ.1 ಆಟಗಾರ್ತಿ ಆನ್ ಸೆ ಯಂಗ್ ವಿರುದ್ಧ ಸೋತು ರನ್ನರ್‌ಅಪ್ ಆಗಿದ್ದ ಅವರು, ಜರ್ಮನಿಯಲ್ಲಿ ಗೆಲುವಿನ ಮೂಲಕ ಅದಕ್ಕೆ ತಕ್ಕ ಉತ್ತರ ನೀಡಿದ್ದಾರೆ.
ಅಜೇಯ ಅಭಿಯಾನಕ್ಕೆ ಕಿರೀಟ
ಟೂರ್ನಿಯುದ್ದಕ್ಕೂ ಒಂದೂ ಗೇಮ್ ಕಳೆದುಕೊಳ್ಳದ ಸಿಂಧು, ಆರಂಭದಿಂದಲೇ ಸ್ಥಿರ ಪ್ರದರ್ಶನ ನೀಡಿದರು. ಕ್ವಾರ್ಟರ್ ಫೈನಲ್‌ನಲ್ಲಿ ಅಮಾಲಿ ಶುಲ್ಟ್ಜ್ ಅವರನ್ನು ಮಣಿಸಿದ ಬಳಿಕ, ಸೆಮಿಫೈನಲ್‌ನಲ್ಲಿ ಭಾರತದ ಯುವ ಆಟಗಾರ್ತಿ ಅನ್ಮೋಲ್ ಖರ್ಬ್ ವಿರುದ್ಧ ಗೆದ್ದು ಫೈನಲ್ ಪ್ರವೇಶಿಸಿದ್ದರು.
