ಇಂಡಿಯನ್ ರೇಸಿಂಗ್ ಫೆಸ್ಟಿವಲ್‌ನಲ್ಲಿ ಕಿಚ್ಚಾಸ್ ಕಿಂಗ್ಸ್ ಬೆಂಗಳೂರು ತಂಡದ ರುಹಾನ್ ಆಳ್ವಗೆ ಜಯ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ಇಂಡಿಯನ್ ರೇಸಿಂಗ್ ಫೆಸ್ಟಿವಲ್‌ನ ಬುದ್ಧ್ ಇಂಟರ್‌ನ್ಯಾಷನಲ್ ಸರ್ಕ್ಯೂಟ್‌ನಲ್ಲಿ ನಡೆದ ಎರಡು ದಿನಗಳ ರೇಸ್‌ಗಳು ರೋಚಕವಾಗಿ ಮುಕ್ತಾಯಗೊಂಡಿವೆ. ಎಫ್4 ಇಂಡಿಯನ್ ಚಾಂಪಿಯನ್‌ಶಿಪ್‌ನಲ್ಲಿ ಗೋವಾ ಏಸಸ್ ಜೆಎ ರೇಸಿಂಗ್ ತಂಡದ ಆರ್ಯನ್ ನರೋಲಾ ಎರಡು ರೇಸ್‌ಗಳನ್ನು ಗೆದ್ದು ಗಮನ ಸೆಳೆದರೆ, ಇಂಡಿಯನ್ ರೇಸಿಂಗ್ ಲೀಗ್‌ನ (ಐಆರ್‌ಎಲ್) ಎರಡನೇ ರೇಸ್‌ನಲ್ಲಿ ಕಿಚ್ಚಾಸ್ ಕಿಂಗ್ಸ್ ಬೆಂಗಳೂರು ತಂಡದ ರುಹಾನ್ ಆಳ್ವ ಜಯ ಸಾಧಿಸಿದರು.

ಮೊದಲ ದಿನದ ಐಆರ್‌ಎಲ್ ರೇಸ್‌ನಲ್ಲಿ ರೌಲ್ ಹೈಮನ್ ಗೆಲುವು

ಅಕ್ಟೋಬರ್ 31ರಂದು ನಡೆದ ಮೊದಲ ದಿನದ ಐಆರ್‌ಎಲ್ ರೇಸ್‌ನಲ್ಲಿ ಗೋವಾ ಏಸಸ್ ಜೆಎ ರೇಸಿಂಗ್‌ನ ರೌಲ್ ಹೈಮನ್ 27:40.759 ನಿಮಿಷಗಳಲ್ಲಿ ಗುರಿ ತಲುಪಿ ಮೊದಲ ಸ್ಥಾನ ಪಡೆದರು. ಕೋಲ್ಕತಾ ರಾಯಲ್ ಟೈಗರ್ಸ್‌ನ ಸಾಯಿ ಶಿವ ಶಂಕರನ್ ಎರಡನೇ ಸ್ಥಾನ ಪಡೆದರೆ, ಕಿಚ್ಚಾಸ್ ಕಿಂಗ್ಸ್ ಬೆಂಗಳೂರಿನ ಜೆಮ್ಮಾ ಮೂರ್ ಮೂರನೇ ಸ್ಥಾನ ಗಳಿಸಿದರು. ಆರಂಭದಲ್ಲಿ ಎಂಟನೇ ಸ್ಥಾನದಲ್ಲಿದ್ದ ಚೆನ್ನೈ ಟರ್ಬೊ ರೈಡರ್ಸ್‌ನ ತಿಜಿಲ್ ರಾವ್ ಉತ್ತಮ ಪ್ರದರ್ಶನ ನೀಡಿ ಎರಡನೇ ಸ್ಥಾನಕ್ಕೆ ಏರಿದರೂ, ಕೊನೆಯ ಲ್ಯಾಪ್‌ನಲ್ಲಿ ತಾಂತ್ರಿಕ ಸಮಸ್ಯೆಯಿಂದ ರೇಸ್‌ನಿಂದ ಹೊರಬಂದರು.

ಎಫ್4ನಲ್ಲಿ ನರೋಲಾ ಮಿಂಚು

ಎಫ್4 ವಿಭಾಗದ ಮೊದಲ ರೇಸ್‌ನಲ್ಲಿ ಸ್ಪೀಡ್ ಡೆಮನ್ಸ್ ದೆಹಲಿಯ ನ್ಟಿಯಿಸೋ ಮಬುಂಡಾ ಗೆಲುವು ಸಾಧಿಸಿದರು. ಭಾನುವಾರ ನಡೆದ ಎರಡೂ ರೇಸ್‌ಗಳಲ್ಲಿ ಆರ್ಯನ್ ನರೋಲಾ ಪ್ರಾಬಲ್ಯ ಮೆರೆದರು. ಮೊದಲ ರೇಸ್‌ನಲ್ಲಿ ಸ್ವರ್ಣವ್ ದಾಸ್ ಹಾಗೂ ಲುವಿವೆ ಸಂಬ್ದುಲಾ ಅವರ ಸವಾಲು ಎದುರಿಸಿದ ನರೋಲಾ, ಅಂತಿಮವಾಗಿ ಮೊದಲ ಸ್ಥಾನ ಪಡೆದರು. ಆರಿಸ್ ಕಿರಿಯಾಕು ಎರಡನೇ ಹಾಗೂ ಮಬುಂಡಾ ಮೂರನೇ ಸ್ಥಾನ ಗಳಿಸಿದರು.

ಎರಡನೇ ರೇಸ್‌ನಲ್ಲೂ ಆರಂಭದಿಂದಲೇ ಮುನ್ನಡೆ ಕಾಯ್ದುಕೊಂಡ ನರೋಲಾ, ಅರ್ಜುನ್ ಛೇಡಾ ಮತ್ತು ಮಬುಂಡಾ ಅವರ ಪೈಪೋಟಿ ನಡುವೆಯೂ ಗೆಲುವು ತಮ್ಮದಾಗಿಸಿಕೊಂಡರು. ಛೇಡಾ ಎರಡನೇ ಹಾಗೂ ಮಬುಂಡಾ ಮೂರನೇ ಸ್ಥಾನ ಪಡೆದರು. ಈ ಮೂಲಕ ನರೋಲಾ ಭಾನುವಾರ ಡಬಲ್ ಗೆಲುವು ದಾಖಲಿಸಿದರು.

ಐಆರ್‌ಎಲ್‌ನಲ್ಲಿ ರುಹಾನ್ ಆಳ್ವಗೆ ಜಯ

ವಾರಾಂತ್ಯದ ಎರಡನೇ ಐಆರ್‌ಎಲ್ ರೇಸ್‌ನಲ್ಲಿ ಕಿಚ್ಚಾಸ್ ಕಿಂಗ್ಸ್ ಬೆಂಗಳೂರಿನ ರುಹಾನ್ ಆಳ್ವ ಗೆಲುವು ಸಾಧಿಸಿದರು. ಆರಂಭದಲ್ಲಿ ಮುನ್ನಡೆ ಪಡೆದಿದ್ದ ಶೇನ್ ಚಂದೇರಿಯಾ ತಾಂತ್ರಿಕ ಸಮಸ್ಯೆಯಿಂದ ರೇಸ್‌ನಿಂದ ಹೊರಬಂದರು. ಈ ಅವಕಾಶ ಬಳಸಿಕೊಂಡ ಆಳ್ವ ಮೊದಲ ಸ್ಥಾನ ಪಡೆದರು. ಹೈದರಾಬಾದ್ ಬ್ಲ್ಯಾಕ್‌ಬರ್ಡ್ಸ್‌ನ ಮೊಹಮ್ಮದ್ ರಿಯಾನ್ ಎರಡನೇ ಹಾಗೂ ಸ್ಪೀಡ್ ಡೆಮನ್ಸ್ ದೆಹಲಿಯ ಅಲಿಸ್ಟರ್ ಯೂಂಗ್ ಮೂರನೇ ಸ್ಥಾನ ಗಳಿಸಿದರು.

ಆರ್ಯನ್ ನರೋಲಾ ಅವರ ಎರಡು ಗೆಲುವು ಹಾಗೂ ರುಹಾನ್ ಅಲ್ವಾ ಅವರ ಐಆರ್‌ಎಲ್ ಜಯದೊಂದಿಗೆ ಬುದ್ಧ್ ಇಂಟರ್‌ನ್ಯಾಷನಲ್ ಸರ್ಕ್ಯೂಟ್‌ನಲ್ಲಿ ಇಂಡಿಯನ್ ರೇಸಿಂಗ್ ಫೆಸ್ಟಿವಲ್‌ನ ರೇಸ್ ವಾರಾಂತ್ಯ ಯಶಸ್ವಿಯಾಗಿ ಮುಕ್ತಾಯಗೊಂಡಿತು.