ಹಸಿರು ಇಂಧನದಲ್ಲಿ ಭಾರತದ ವೇಗಕ್ಕೆ ವಿಶ್ವವೇ ಬೆರಗು; 800 GW ಗುರಿಯತ್ತ ಹೊಸ ಹೆಜ್ಜೆ: ಸಚಿವ ಪ್ರಲ್ಹಾದ್ ಜೋಷಿ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ನವೀಕರಿಸಬಹುದಾದ ಇಂಧನ ಕ್ಷೇತ್ರದಲ್ಲಿ ಭಾರತ ಜಾಗತಿಕ ಮಟ್ಟದಲ್ಲಿ ತನ್ನ ಪ್ರಭಾವವನ್ನು ವಿಸ್ತರಿಸುತ್ತಿದ್ದು, ಶುದ್ಧ ಇಂಧನ ಉತ್ಪಾದನೆಯಲ್ಲಿ ಹೊಸ ಮೈಲಿಗಲ್ಲುಗಳನ್ನು ಸಾಧಿಸುತ್ತಿದೆ ಎಂದು ಕೇಂದ್ರ ನವೀಕರಿಸಬಹುದಾದ ಇಂಧನ ಸಚಿವ ಪ್ರಲ್ಹಾದ್ ಜೋಷಿ ಹೇಳಿದ್ದಾರೆ.

ನವದೆಹಲಿಯ ಭಾರತ್ ಮಂಟಪಂನಲ್ಲಿ ನಡೆದ ‘ಭಾರತ್ ರಿನ್ಯೂವಬಲ್ ಎನರ್ಜಿ ಸಮ್ಮಿಟ್ ಅಂಡ್ ಎಕ್ಸ್‌ಪೋ 2026’ (BRES 2026) ಸಮಾರೋಪದ ಬಳಿಕ ಅವರು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

100 GW ಸಾಧನೆಗೆ ವೇಗದ ಓಟ

ಭಾರತದ ನವೀಕರಿಸಬಹುದಾದ ಇಂಧನ ಸಾಮರ್ಥ್ಯದ ಬೆಳವಣಿಗೆಯನ್ನು ವಿವರಿಸಿದ ಸಚಿವರು, ಮೊದಲ 100 GW ಸಾಮರ್ಥ್ಯ ತಲುಪಲು ಹಲವು ದಶಕಗಳು ಬೇಕಾಗಿದ್ದವು ಎಂದು ತಿಳಿಸಿದರು. ಆದರೆ ನಂತರದ 100 GW ಅನ್ನು ಏಳು ವರ್ಷಗಳಲ್ಲಿ ಹಾಗೂ ಮೂರನೇ 100 GW ಅನ್ನು 2024ರಿಂದ 2026ರ ನಡುವೆ ಕೇವಲ ಎರಡು ವರ್ಷಗಳಲ್ಲಿ ಸಾಧಿಸಿರುವುದು ದೇಶದ ಇಂಧನ ವಿಸ್ತರಣೆಯ ವೇಗವನ್ನು ತೋರಿಸುತ್ತದೆ ಎಂದರು.

2030-35ರ ವೇಳೆಗೆ 800 GW ಗುರಿ

ದೇಶದ ಶುದ್ಧ ಇಂಧನ ಉತ್ಪಾದನಾ ಗುರಿಯನ್ನು 500 GWನಿಂದ 800 GWಗೆ ವಿಸ್ತರಿಸಲಾಗಿದೆ. ನಿಗದಿತ 500 GW ಗುರಿಯನ್ನು ನಿರೀಕ್ಷಿತ ಅವಧಿಗೂ ಮುನ್ನವೇ ಸಾಧಿಸುವ ವಿಶ್ವಾಸವನ್ನೂ ಜೋಷಿ ವ್ಯಕ್ತಪಡಿಸಿದರು. ಈ ವಿಸ್ತರಣೆ ಭಾರತದ ಇಂಧನ ಭದ್ರತೆ ಮತ್ತು ಪರಿಸರ ಸ್ನೇಹಿ ಅಭಿವೃದ್ಧಿಗೆ ಮಹತ್ವದ ಹೆಜ್ಜೆಯಾಗಲಿದೆ.

ಇದನ್ನೂ ಓದಿ:

BRES 2026ಕ್ಕೆ ಜಾಗತಿಕ ಮನ್ನಣೆ

ನಾಲ್ಕು ದಿನಗಳ ಸಮ್ಮೇಳನದಲ್ಲಿ 75,000ಕ್ಕೂ ಹೆಚ್ಚು ಸಂದರ್ಶಕರು, ಎಂಟು ಪಾಲುದಾರ ರಾಷ್ಟ್ರಗಳು ಹಾಗೂ 32 ಅಂತಾರಾಷ್ಟ್ರೀಯ ಸಚಿವರು ಭಾಗವಹಿಸಿದ್ದರು. ಭಾರತದಲ್ಲಿ ನಡೆದ ಅತಿದೊಡ್ಡ ನವೀಕರಿಸಬಹುದಾದ ಇಂಧನ ಕಾರ್ಯಕ್ರಮವೆಂದು BRES 2026 ಅನ್ನು ಸಚಿವರು ಬಣ್ಣಿಸಿದರು.

ಹಸಿರು ಇಂಧನಕ್ಕೆ 400 ಬಿಲಿಯನ್ ಡಾಲರ್ ಹೂಡಿಕೆ

ಭಾರತದ ಹಸಿರು ಇಂಧನ ಮತ್ತು ಸಂಬಂಧಿತ ಕ್ಷೇತ್ರಗಳಲ್ಲಿ ಸುಮಾರು 400 ಬಿಲಿಯನ್ ಡಾಲರ್ ಹೂಡಿಕೆಗೆ ಹೂಡಿಕೆದಾರರು ಆಸಕ್ತಿ ತೋರಿಸಿದ್ದಾರೆ. ಹೂಡಿಕೆಗಳ ಕ್ಷೇತ್ರಗಳನ್ನು ಪರಿಶೀಲಿಸಲಾಗುತ್ತಿದೆ ಎಂದು ಜೋಷಿ ತಿಳಿಸಿದರು.