ಯಶ್ ಕ್ರೇಜ್, ರಾಮಾಯಣ ಸೆಂಟಿಮೆಂಟ್: ತಮಿಳುನಾಡಿನಲ್ಲಿ ಇತಿಹಾಸ ಸೃಷ್ಟಿಸಿದ ಪೌರಾಣಿಕ ಚಿತ್ರ

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಭಾರತೀಯ ಚಿತ್ರರಂಗದ ಬಾಕ್ಸ್ ಆಫೀಸ್‌ನಲ್ಲಿ ರಣಬೀರ್ ಕಪೂರ್ ಹಾಗೂ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ಪೌರಾಣಿಕ ಚಿತ್ರ ‘ರಾಮಾಯಣ’ ಅಕ್ಷರಶಃ ಗಳಿಕೆಯಲ್ಲಿ ಸುನಾಮಿ ಎಬ್ಬಿಸಿದೆ. ವಿಶ್ವದಾದ್ಯಂತ ಈಗಾಗಲೇ 1100 ಕೋಟಿ ರೂಪಾಯಿಗೂ ಅಧಿಕ ಕಲೆಕ್ಷನ್ ಮಾಡಿರುವ ಈ ಮಹಾಕಾವ್ಯ, ಭಾಷೆ ಮತ್ತು ಪ್ರಾಂತ್ಯಗಳ ಗಡಿಯನ್ನು ಮೀರಿ ಪ್ರೇಕ್ಷಕರ ಮನಗೆಲ್ಲುತ್ತಿದೆ. ವಿಶೇಷವೆಂದರೆ, ಪರಭಾಷಾ ಚಿತ್ರಗಳಿಗೆ ಅಷ್ಟು ಸುಲಭವಾಗಿ ಮಣೆ ಹಾಕದ ತಮಿಳುನಾಡಿನ ನೆಲದಲ್ಲೂ ‘ರಾಮಾಯಣ’ ಚಿತ್ರದ ಹವಾ ಜೋರಾಗಿದೆ.

ತಮಿಳಿನ ಖ್ಯಾತ ನಟ ಸೂರ್ಯ ಅವರ ಬಹುನಿರೀಕ್ಷಿತ ‘ಸೀನ್’ ಸಿನಿಮಾ ಬಿಡುಗಡೆಯಾಗಿದ್ದರೂ, ಅದಕ್ಕೆ ತೀವ್ರ ಪೈಪೋಟಿ ನೀಡುವ ರೀತಿಯಲ್ಲಿ ‘ರಾಮಾಯಣ’ ಮುನ್ನುಗ್ಗುತ್ತಿದೆ. ತಮಿಳಿಗೆ ಡಬ್ ಆಗಿ ತೆರೆಕಂಡಿರುವ ಈ ಹಿಂದಿ ಸಿನಿಮಾ, ತಮಿಳುನಾಡಿನಲ್ಲಿ ಸ್ಥಳೀಯ ಚಿತ್ರವನ್ನೇ ಹಿಂದಿಕ್ಕಿ ಪ್ರಾಬಲ್ಯ ಸಾಧಿಸುತ್ತಿರುವುದು ಸಿನಿ ಪಂಡಿತರ ಹುಬ್ಬೇರಿಸಿದೆ. ಇದಕ್ಕೆ ಶನಿವಾರದ ಮುಂಗಡ ಟಿಕೆಟ್ ಕಾಯ್ದಿರಿಸುವಿಕೆಯೇ ದೊಡ್ಡ ಸಾಕ್ಷಿಯಾಗಿದೆ. ತಮಿಳುನಾಡಿನಲ್ಲಿ ‘ಸೀನ್’ ಚಿತ್ರಕ್ಕಿಂತ ‘ರಾಮಾಯಣ’ ಎರಡು ಪಟ್ಟು ಹೆಚ್ಚಿನ ಬುಕಿಂಗ್ ದಾಖಲಿಸುವ ಮೂಲಕ ಭರ್ಜರಿ ಮುನ್ನಡೆ ಕಾಯ್ದುಕೊಂಡಿದೆ.

ಈಗಾಗಲೇ ತಮಿಳುನಾಡು ಬಾಕ್ಸ್ ಆಫೀಸ್‌ನಲ್ಲಿ ‘ರಾಮಾಯಣ’ 30 ಕೋಟಿ ರೂಪಾಯಿಗೂ ಹೆಚ್ಚು ಗಳಿಕೆ ಕಂಡಿದ್ದು, ಇದೇ ವೇಗ ಮುಂದುವರಿದರೆ ಅತಿ ಶೀಘ್ರದಲ್ಲೇ 60 ಕೋಟಿ ರೂಪಾಯಿಯ ಗಡಿಯನ್ನು ಸುಲಭವಾಗಿ ದಾಟಲಿದೆ ಎಂದು ವಿಶ್ಲೇಷಕರು ಭವಿಷ್ಯ ನುಡಿದಿದ್ದಾರೆ.

ಈ ಅಭೂತಪೂರ್ವ ಯಶಸ್ಸಿನ ಹಿಂದೆ ರಾವಣನ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಕನ್ನಡಿಗ ಯಶ್ ಅವರ ಅಪಾರ ಅಭಿಮಾನಿ ಬಳಗದ ಕ್ರೇಜ್ ಹಾಗೂ ‘ರಾಮಾಯಣ’ ಕಥೆಯ ಮೇಲಿರುವ ಜನರ ಭಾವನಾತ್ಮಕ ನಂಟು ಪ್ರಮುಖ ಕಾರಣವಾಗಿದೆ. ಸಿನಿಪ್ರಿಯರಿಂದ ಸಿಗುತ್ತಿರುವ ಈ ಅದ್ಭುತ ಪ್ರತಿಕ್ರಿಯೆ ನೋಡಿದರೆ, ಮುಂಬರುವ ದಿನಗಳಲ್ಲಿ ಈ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ಇನ್ನಷ್ಟು ಹೊಸ ದಾಖಲೆಗಳನ್ನು ಬರೆಯುವುದರಲ್ಲಿ ಯಾವುದೇ ಅನುಮಾನವಿಲ್ಲ.