ಚಳಿಗಾಲ ಬಂತೆಂದರೆ ಹೊದಿಕೆ ಒಳಗೆ ಬೆಚ್ಚಗೆ ಕೂರುವ ಮನಸ್ಸಾಗುತ್ತದೆ. ಆದರೆ ನಮ್ಮ ಜೇಬಿನಲ್ಲಿರುವ ಸ್ಮಾರ್ಟ್ಫೋನ್ಗೆ ಮಾತ್ರ ಈ ತಣ್ಣನೆಯ ವಾತಾವರಣ ಸವಾಲಾಗುತ್ತದೆ. ತಾಪಮಾನ ಕಡಿಮೆಯಾದಾಗ ಫೋನ್ನಲ್ಲಿರುವ ಬ್ಯಾಟರಿಯ ಒಳಗಿನ ರಾಸಾಯನಿಕ ಕ್ರಿಯೆ ನಿಧಾನವಾಗುತ್ತದೆ. ಇದರಿಂದ ಫೋನ್ ಬೇಗ ಡಿಸ್ಚಾರ್ಜ್ ಆಗುವುದು ಅಥವಾ ಇದ್ದಕ್ಕಿದ್ದಂತೆ ಆಫ್ ಆಗುವುದು ಸಾಮಾನ್ಯ. ಸರಳ ಅಭ್ಯಾಸಗಳನ್ನು ಅಳವಡಿಸಿಕೊಂಡರೆ ಚಳಿಗಾಲದಲ್ಲೂ ಫೋನ್ ಬ್ಯಾಟರಿ ಹೆಚ್ಚು ಸಮಯ ಬಾಳಿಕೆ ಬರುತ್ತದೆ.
ಹೊರಗೆ ತಣ್ಣನೆಯ ಗಾಳಿ ಇರುವಾಗ ಫೋನ್ ಅನ್ನು ಕೈಯಲ್ಲಿ ಹಿಡಿದುಕೊಂಡೇ ನಡೆಯುವುದನ್ನು ಕಡಿಮೆ ಮಾಡಿ. ಸಾಧ್ಯವಾದಷ್ಟು ಫೋನ್ ಅನ್ನು ಶರ್ಟ್ ಅಥವಾ ಜಾಕೆಟ್ನ ಒಳಗಿನ ಜೇಬಿನಲ್ಲಿ ಇಟ್ಟುಕೊಳ್ಳಿ. ದೇಹದ ಉಷ್ಣತೆಯು ಬ್ಯಾಟರಿಯನ್ನು ತಣ್ಣಗಾಗದಂತೆ ಕಾಪಾಡುತ್ತದೆ. ಹೊರಗೆ ಹೋದಾಗ ಫೋನ್ ಕವರ್ ಅಥವಾ ಪೌಚ್ ಬಳಸುವುದೂ ಒಳ್ಳೆಯದು.
ಚಳಿಗಾಲದಲ್ಲಿ ಅನಗತ್ಯವಾಗಿ ಹಿನ್ನೆಲೆಯಲ್ಲಿ ಕೆಲಸ ಮಾಡುವ ಆ್ಯಪ್ಗಳು ಬ್ಯಾಟರಿ ಶಕ್ತಿಯನ್ನು ಬೇಗ ಹೀರುತ್ತವೆ. ಬ್ಯಾಟರಿ ಸೇವರ್ ಅಥವಾ ಪವರ್ ಸೇವಿಂಗ್ ಮೋಡ್ ಆನ್ ಮಾಡಿದರೆ ಸ್ಕ್ರೀನ್ ಬ್ರೈಟ್ನೆಸ್ ಮತ್ತು ಹಿನ್ನೆಲೆ ಚಟುವಟಿಕೆ ಕಡಿಮೆಯಾಗುತ್ತದೆ. ಜೊತೆಗೆ ಸ್ಕ್ರೀನ್ ಟೈಮ್ಔಟ್ ಅವಧಿಯನ್ನು ಕಡಿಮೆ ಇಟ್ಟುಕೊಳ್ಳುವುದು ಬ್ಯಾಟರಿ ಉಳಿತಾಯಕ್ಕೆ ಸಹಕಾರಿ.
ಫೋನ್ ಬ್ಯಾಟರಿ ತಣ್ಣಗಾಗಿದೆ ಎಂಬ ಕಾರಣಕ್ಕೆ ನೇರವಾಗಿ ಹೀಟರ್, ಬಿಸಿ ನೀರಿನ ಬಾಟಲಿ ಅಥವಾ ಬಿಸಿಲಿನ ತೀವ್ರ ಶಾಖಕ್ಕೆ ಇಡಬೇಡಿ. ಇದರಿಂದ ಬ್ಯಾಟರಿಗೆ ಹಾನಿಯಾಗುವ ಅಪಾಯವಿದೆ. ಬದಲಾಗಿ ಕೋಣೆಯ ಸಾಮಾನ್ಯ ಉಷ್ಣಾಂಶದಲ್ಲಿಯೇ ಫೋನ್ ಅನ್ನು ಚಾರ್ಜ್ ಮಾಡಿ. ಫೋನ್ ತುಂಬಾ ತಣ್ಣಗಿದ್ದರೆ ಸ್ವಲ್ಪ ಸಮಯ ಸಾಮಾನ್ಯ ವಾತಾವರಣಕ್ಕೆ ಹೊಂದಿಕೊಳ್ಳಲು ಬಿಟ್ಟು ನಂತರ ಚಾರ್ಜ್ ಮಾಡುವುದು ಸುರಕ್ಷಿತ.
ಬೆಳಗಿನ ಜಾವ ಅಥವಾ ರಾತ್ರಿ ವೇಳೆ ಹೆಚ್ಚು ಪ್ರಯಾಣ ಮಾಡುವಾಗ ಪವರ್ ಬ್ಯಾಂಕ್ ಜೊತೆಗೆ ಇಟ್ಟುಕೊಳ್ಳುವುದು ಉತ್ತಮ. ತುರ್ತು ಕರೆ ಅಥವಾ ದಾರಿ ಹುಡುಕುವ ಸಂದರ್ಭದಲ್ಲಿ ಬ್ಯಾಟರಿ ಕೈಕೊಟ್ಟರೆ ತೊಂದರೆಯಾಗುವುದಿಲ್ಲ. ಒಟ್ಟಿನಲ್ಲಿ, ಚಳಿಗಾಲದಲ್ಲಿ ಫೋನ್ ಅನ್ನು ಬೆಚ್ಚಗೆ ಕಾಪಾಡುವುದು ಮತ್ತು ಅನಗತ್ಯ ಬಳಕೆ ತಗ್ಗಿಸುವುದೇ ಬ್ಯಾಟರಿ ಬಾಳಿಕೆ ಹೆಚ್ಚಿಸುವ ಮುಖ್ಯ ಗುಟ್ಟು.



