ಹೊಸದಿಗಂತ ಡಿಜಿಟಲ್ ಡೆಸ್ಕ್
ಸರಕಾರಗಳು ಕೇವಲ ದೇವಸ್ಥಾನಗಳ ಮೇಲೆ ಮಾತ್ರ ತನ್ನ ಹಿಡಿತ ಸಾಧಿಸುವುದು ಮತ್ತೆ ಚರ್ಚೆಗೆ ಗ್ರಾಸವಾಗಿದೆ. ಈ ಸಲ ತೆಲುಗು ನಟ ಮತ್ತು ಜನಸೇನಾ ಪಕ್ಷದ ಮುಖ್ಯಸ್ಥ ಪವನ್ ಕಲ್ಯಾಣ್ ದೇವಾಲಯಗಳನ್ನು ಸರಕಾರದ ನಿಯಂತ್ರಣದಿಂದ ಮುಕ್ತಗೊಳಿಸಬೇಕು ಎಂದು ಆಗ್ರಹಿಸಿದ್ದಾರೆ.
ಆಂಧ್ರಪ್ರದೇಶದಲ್ಲಿ ಮುಖ್ಯಮಂತ್ರಿ ಜಗನ್ ಮೋಹನ್ ರೆಡ್ಡಿ ನೇತೃತ್ವದ ವೈಎಸ್‌ಆರ್‌ಸಿಪಿ ಸರಕಾರವು ದೇವಾಲಯಗಳ ಧ್ವಂಸ ಮತ್ತು ಹಿಂದುಗಳ ಮೇಲಿನ ದಾಳಿಗಾಗಿ ಟೀಕಿಸಿರುವ ಅವರು, ಜಾತ್ಯತೀತ ಪ್ರಜಾಸತ್ತಾತ್ಮಕ ದೇಶದಲ್ಲಿ ಸರಕಾರ ಇಸ್ಲಾಂ, ಕ್ರಿಶ್ಚಿಯನ್ ಧರ್ಮದಂತಹ ಇತರ ಧರ್ಮಗಳ ಆರಾಧನಾ ಸ್ಥಳಗಳನ್ನು ನಿಯಂತ್ರಿಸದಿರುವಾಗ ದೇವಾಲಯಗಳನ್ನು ನಿಯಂತ್ರಿಸಬಾರದು ಎಂದು ಹೇಳಿದ್ದಾರೆ.
ಪವನ್ ಕಲ್ಯಾಣ್ ದೇವಸ್ಥಾನಗಳ ಪರವಾಗಿ ಧ್ವನಿ ಎತ್ತುತ್ತಿರುವುದು ಇದೇ ಮೊದಲಲ್ಲ, 2020ರ ಸೆಪ್ಟೆಂಬರ್‌ನಲ್ಲಿ ಕಲ್ಯಾಣ್ ಅವರು ಹಿಂದು ದೇವಾಲಯಗಳ ಧ್ವಂಸ ಮತ್ತು ದೇವಾಲಯದ ರಥವನ್ನು ಸುಡುವುದನ್ನು ವಿರೋಧಿಸಿ 11 ತಾಸುಗಳ ಸುದೀರ್ಘ ಉಪವಾಸ ಸತ್ಯಾಗ್ರಹ ನಡೆಸಿದ್ದರು. ಪೂರ್ವ ಗೋದಾವರಿ ಜಿಲ್ಲೆಯ ಅಂತರವೇದಿ ಶ್ರೀ ಲಕ್ಷ್ಮೀನರಸಿಂಹ ಸ್ವಾಮಿ ದೇವಸ್ಥಾನದ ರಥವನ್ನು ಸುಟ್ಟು ಹಾಕಿರುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದ್ದರು.
ಡಿಸೆಂಬರ್ 2020ರಲ್ಲಿ, ಕಲ್ಯಾಣ್ ಆಂಧ್ರಪ್ರದೇಶದ ಹಿಂದು ದೇವಾಲಯಗಳ ಮೇಲಿನ ದಾಳಿಯ ಬಗ್ಗೆ ಸಿಬಿಐ ತನಿಖೆಗೆ ಒತ್ತಾಯಿಸಿದ್ದರು. ದೇವಾಲಯಗಳು ಮತ್ತು ಹಿಂದು ಧರ್ಮದ ಮೇಲಿನ ದಾಳಿಗಳನ್ನು ನಿಖರವಾಗಿ ಯೋಜಿಸಲಾಗಿದೆ ಎಂದು ಹೇಳಿದ್ದರು. ವಿಜಯನಗರ ಜಿಲ್ಲೆಯ ರಾಮತೀರ್ಥದಲ್ಲಿರುವ 400 ವರ್ಷಗಳಷ್ಟು ಹಳೆಯದಾದ ಶ್ರೀರಾಮನ ಪ್ರತಿಮೆಯನ್ನು ಕೆಡವಿ, ಶ್ರೀರಾಮನ ವಿಗ್ರಹದ ತಲೆಯನ್ನು ದೇವಾಲಯದ ತೊಟ್ಟಿಯಲ್ಲಿ ಎಸೆದಿರುವ ಬಗ್ಗೆ ತನಿಖೆ ನಡೆಸಬೇಕೆಂದು ಅವರು ಒತ್ತಾಯಿಸಿದ್ದರು.
ವಿಹಿಂಪ ನಡೆಸುತ್ತಿದೆ ಆಂದೋಲನ
ವಿಶ್ವ ಹಿಂದು ಪರಿಷತ್ ದೇವಸ್ಥಾನಗಳನ್ನು ಸರಕಾರದ ನಿಯಂತ್ರಣದಿಂದ ಮುಕ್ತಗೊಳಿಸಲು ಆಂದೋಲನ ನಡೆಸುತ್ತಿದೆ. ಕಳೆದ ವರ್ಷ ಡಿಸೆಂಬರ್‌ನಲ್ಲಿ ಗುಜರಾತ್‌ನಲ್ಲಿ ನಡೆದ ತನ್ನ ಬೈಠಕ್‌ನಲ್ಲಿ ವಿಹಿಂಪ ತನ್ನ ‘ಮುಕ್ತ ದೇವಾಲಯ ಚಳವಳಿ’ಯನ್ನು ಮುಂದಕ್ಕೆ ಕೊಂಡೊಯ್ಯಲು ಮಾರ್ಗಸೂಚಿಯನ್ನು ಸಿದ್ಧಪಡಿಸಿತು. ಸಭೆಯಲ್ಲಿ ಈ ಕುರಿತು ನಿರ್ಣಯವನ್ನೂ ಅಂಗೀಕರಿಸಲಾಯಿತು.
ಅದರಲ್ಲಿ, ಮಠ-ಮಂದಿರಗಳು ಭಾರತದ ರಾಷ್ಟ್ರೀಯ ಸಮಾಜದ ನಂಬಿಕೆ, ನಂಬಿಕೆ ಮತ್ತು ಆರಾಧನೆಯ ಶ್ರದ್ಧಾಕೇಂದ್ರಗಳಾಗಿವೆ. ಸಂತ-ಶಾಸ್ತ್ರ-ಮಂದಿರ ಈ ಮೂರು ಸ್ತಂಭಗಳು ಹಿಂದು ರಾಷ್ಟ್ರದ ನಿರಂತರತೆ ಮತ್ತು ಮೃತ್ಯುಂಜಯಿ ಭಾರತದ ಅಮರತ್ವದ ರಹಸ್ಯವನ್ನು ರೂಪಿಸುತ್ತವೆ. ರಾಷ್ಟ್ರೀಯ ಜೀವನಕ್ಕೆ ಹೊಕ್ಕುಳಬಳ್ಳಿ, ಬೆನ್ನುಹುರಿ ಮತ್ತು ಕಂಠನಾಳದಂತೆ ಕಾರ್ಯನಿರ್ವಹಿಸುವ ಇಂತಹ ‘ಆಧ್ಯಾತ್ಮಿಕ-ಸಾಂಸ್ಕೃತಿಕ’ ಸಂಸ್ಥೆಗಳನ್ನು ‘ಜಾತ್ಯತೀತ’ ಸರಕಾರಗಳು ಮತ್ತು ಆಗಾಗ್ಗೆ ಗೌರವವಿಲ್ಲದ ಹಾಗೂ ದೇವಹೀನ ಸಂಸ್ಥೆಗಳಿಂದ ನಿಯಂತ್ರಿಸಲು ಬಿಡಲಾಗುವುದಿಲ್ಲ.
ಉತ್ತರಾಖಂಡದಲ್ಲಿ ಕಾಯ್ದೆ ರದ್ದತಿಗೆ ನಿರ್ಧಾರ
ಕಳೆದ ನವೆಂಬರ್‌ನಲ್ಲಿ ಉತ್ತರಾಖಂಡ ಮುಖ್ಯಮಂತ್ರಿ ಪುಷ್ಕರ್ ಸಿಂಗ್ ಧಾಮಿ ಅವರು ಉತ್ತರಾಖಂಡ್ ಚಾರ್ ಧಾಮ್ ದೇವಸ್ತಾನಂ ಮ್ಯಾನೇಜ್‌ಮೆಂಟ್ ಆ್ಯಕ್ಟ್ 2019 ಅನ್ನು ರದ್ದುಗೊಳಿಸಿದ್ದರು. ಜನರ ಭಾವನೆಗಳು ಮತ್ತು ಹಿತಾಸಕ್ತಿಗಳನ್ನು ಪರಿಗಣಿಸಿ, ಮನೋಹರ್ ಕಾಂತ್ ಧ್ಯಾನಿ ಅವರ ನೇತೃತ್ವದಲ್ಲಿ ಚಾರ್ ಧಾಮ್‌ಗೆ ಸಂಬಂಧಿಸಿದ ಅರ್ಚಕರು, ನಿರ್ಣಯಕಾರರು ಮತ್ತು ಇತರ ಗಣ್ಯರಿದ್ದು ರಚಿಸಲಾದ ಉನ್ನತ ಮಟ್ಟದ ಸಮಿತಿಯ ವರದಿಯ ಆಧಾರದಲ್ಲಿ ಸರಕಾರವು ದೇವಸ್ತಾನಂ ಮಂಡಳಿ ಕಾಯ್ದೆಯನ್ನು ರದ್ದುಗೊಳಿಸಲು ನಿರ್ಧರಿಸಿದೆ ಎಂದು ಮುಖ್ಯಮಂತ್ರಿ ಧಾಮಿ ಹೇಳಿದ್ದರು. ಬೃಹತ್ ಕೋಲಾಹಲಕ್ಕೆ ಕಾರಣವಾದ ಮಸೂದೆಯು ಬದರಿನಾಥ್, ಕೇದಾರನಾಥ, ಗಂಗೋತ್ರಿ ಮತ್ತು ಯಮುನೋತ್ರಿ ಹಾಗೂ 49 ಇತರ ದೇವಾಲಯಗಳನ್ನು ಉದ್ದೇಶಿತ ಚಾರ್ ಧಾಮ್ ದೇವಾಲಯ ಮಂಡಳಿಯ ವ್ಯಾಪ್ತಿಯಲ್ಲಿ ತರುವ ಗುರಿಯನ್ನು ಹೊಂದಿದೆ.
ಕರ್ನಾಟಕ ಬಜೆಟ್‌ನಲ್ಲಿ ಘೋಷಣೆ
ಕರ್ನಾಟಕ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಮಾ. 4ರಂದು ತಮ್ಮ ಸರಕಾರವು ರಾಜ್ಯದ ದೇವಾಲಯಗಳನ್ನು ಸರಕಾರದ ನಿಯಂತ್ರಣದಿಂದ ಮುಕ್ತಗೊಳಿಸುವುದಾಗಿ ಘೋಷಿಸಿದರು.
ದೇವಸ್ಥಾನಗಳ ಮೇಲಿನ ಸರಕಾರದ ನಿಯಂತ್ರಣವನ್ನು ತೆಗೆದುಹಾಕಬೇಕೆಂಬ ಬಹುದಿನಗಳ ಬೇಡಿಕೆಯಿದೆ. ಭಕ್ತರ ಈ ಬೇಡಿಕೆಗಳನ್ನು ಪರಿಗಣಿಸಿ ದತ್ತಿ ಇಲಾಖೆ ವ್ಯಾಪ್ತಿಗೆ ಬರುವ ದೇವಸ್ಥಾನಗಳಿಗೆ ಸ್ವಾಯತ್ತತೆ ನೀಡಲಾಗುವುದು. ಅಭಿವೃದ್ಧಿ ಕಾಮಗಾರಿಗಳ ವಿವೇಚನೆಯನ್ನು ದೇವಸ್ಥಾನಗಳಿಗೆ ವಹಿಸಲು ಅಗತ್ಯ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಮುಖ್ಯಮಂತ್ರಿ ಬೊಮ್ಮಾಯಿ ಅವರು ಬಜೆಟ್ ಮಂಡನೆ ವೇಳೆ ವಿಧಾನಸಭೆಯಲ್ಲಿ ಹೇಳಿದ್ದರು.
ಅನೇಕ ಹೈಕೋರ್ಟ್‌ಗಳು ಕಾಲಕಾಲಕ್ಕೆ ದೇವಾಲಯಗಳನ್ನು ಸರಕಾರದ ನಿಯಂತ್ರಣದಿಂದ ಮುಕ್ತಗೊಳಿಸುವುದನ್ನು ಗಮನಿಸಿವೆ. ಪ್ರಸ್ತುತ, ದೇವಾಲಯಗಳಿಂದ ಬರುವ ಆದಾಯವನ್ನು ಬಳಸಲು ದೇವಾಲಯದ ಆಡಳಿತ ಮಂಡಳಿಯು ಸರಕಾರದ ಅನುಮತಿಯನ್ನು ಪಡೆಯಬೇಕಾಗಿದೆ. ದೇವಸ್ಥಾನಗಳ ಅಭಿವೃದ್ಧಿ ಹಾಗೂ ಹಣ ಬಳಕೆಗೆ ಯೋಜನೆಗೆ ಸರಕಾರದಿಂದ ಪೂರ್ವಾನುಮತಿ ಪಡೆಯಬೇಕಿದೆ.
