ಬೆಳಿಗ್ಗೆ ಎದ್ದ ಕೂಡಲೇ ದೇಹ ಭಾರವಾಗಿರುತ್ತೆ, ಮನಸ್ಸು ಕೂಡ ನಿಧಾನವಾಗಿ ಸ್ಟಾರ್ಟ್ ಆಗುತ್ತೆ ಅಲ್ವಾ? ಇಂತಹ ಸಮಯದಲ್ಲಿ ಜಿಮ್, ಉಪಕರಣ, ದೊಡ್ಡ ತಯಾರಿ ಯಾವುದೂ ಇಲ್ಲದೆ ಇಡೀ ದೇಹವನ್ನು ಆಕ್ಟಿವ್ ಮಾಡೋ ಒಂದು ಸರಳ ಯೋಗವಿಧಾನವಿದೆ – ಅದೇ ಸೂರ್ಯನಮಸ್ಕಾರ. ಇದನ್ನು ಕೇವಲ ವ್ಯಾಯಾಮ ಅಂತ ಅಲ್ಲ, ದೇಹ–ಮನಸ್ಸಿನ ಸಮತೋಲನ ತರುವ ಸಂಪೂರ್ಣ ಅಭ್ಯಾಸ ಅಂತ ಹೇಳಬಹುದು.
ಸೂರ್ಯನಮಸ್ಕಾರದಲ್ಲಿ ಒಟ್ಟು 12 ಹಂತಗಳಿವೆ. ಪ್ರತಿಯೊಂದು ಹಂತದಲ್ಲೂ ದೇಹದ ಬೇರೆ ಬೇರೆ ಭಾಗಗಳು ಚಲಿಸುತ್ತವೆ. ಕುತ್ತಿಗೆ, ಭುಜ, ಬೆನ್ನು, ಹೊಟ್ಟೆ, ಕಾಲುಗಳು ಯಾವುದೂ ಸುಮ್ಮನೆ ಇರುವುದಿಲ್ಲ. ಒಂದೇ ಸುತ್ತಿನಲ್ಲಿ ಸ್ಟ್ರೆಚಿಂಗ್, ಶಕ್ತಿ ಮತ್ತು ಉಸಿರಾಟ ಎಲ್ಲವೂ ಒಟ್ಟಿಗೆ ಕೆಲಸ ಮಾಡುತ್ತವೆ. ಅದಕ್ಕೇ ಇದನ್ನು “ಫುಲ್ ಬಾಡಿ ವರ್ಕೌಟ್” ಅಂತ ಕರೆಯಲಾಗುತ್ತದೆ.
ಇದನ್ನೂ ಓದಿ:
ಈ ಯೋಗಾಭ್ಯಾಸವನ್ನು ಪ್ರತಿದಿನ ಮಾಡಿದರೆ ರಕ್ತಸಂಚಾರ ಉತ್ತಮವಾಗುತ್ತದೆ. ಬೆಳಿಗ್ಗೆಯ ನಿಶ್ಚಲತೆಯಿಂದ ದೇಹ ಹೊರಬಂದು ಚುರುಕಾಗುತ್ತದೆ. ಜೀರ್ಣಕ್ರಿಯೆ ಚುರುಕಾಗುತ್ತದೆ, ಮೆಟಾಬಾಲಿಸಂ ವೇಗ ಪಡೆಯುತ್ತದೆ. ತೂಕ ಇಳಿಸಲು ಪ್ರಯತ್ನಿಸುತ್ತಿರುವವರಿಗೆ ಇದು ಸಹಜ ಸಹಾಯಕ.
ಸೂರ್ಯನಮಸ್ಕಾರದ ಮತ್ತೊಂದು ದೊಡ್ಡ ಲಾಭ ಮನಸ್ಸಿನ ಮೇಲೆ. ಉಸಿರಾಟದ ಜೊತೆಗೆ ಚಲನೆ ನಡೆಯುವುದರಿಂದ ಏಕಾಗ್ರತೆ ಹೆಚ್ಚುತ್ತದೆ. ಆತಂಕ, ಒತ್ತಡ ನಿಧಾನವಾಗಿ ಕಡಿಮೆಯಾಗುತ್ತವೆ. ದಿನಪೂರ್ತಿ ಎನರ್ಜಿ ಇರುವ ಅನುಭವ ಬರುತ್ತದೆ.
ಹೆಚ್ಚು ಸಮಯವಿಲ್ಲ, ಹೆಚ್ಚು ಶಕ್ತಿ ಬೇಕಿಲ್ಲ. ದಿನಕ್ಕೆ 10–15 ನಿಮಿಷ ಸೂರ್ಯನಮಸ್ಕಾರ ಮಾಡಿದರೂ ದೇಹದಲ್ಲೂ ಮನಸ್ಸಲ್ಲೂ ಸ್ಪಷ್ಟ ಬದಲಾವಣೆ ಕಾಣಬಹುದು. ಅದಕ್ಕೇ ಇಡೀ ದೇಹವನ್ನು ಆಕ್ಟಿವ್ ಮಾಡಲು ಸೂರ್ಯನಮಸ್ಕಾರ ಬೆಸ್ಟ್ ಯೋಗ ಅಂತ ಹೇಳೋದು ತಪ್ಪಲ್ಲ.
