ಹೊಸದಿಗಂತ ಡಿಜಿಟಲ್ ಡೆಸ್ಕ್:
ವಿಜ್ಞಾನ ಮತ್ತು ತಂತ್ರಜ್ಞಾನ ಬೆಳೆದಂತೆ ಆಡಳಿತ ವ್ಯವಸ್ಥೆಯೂ ಆಧುನಿಕಗೊಳ್ಳುತ್ತಿರುವುದಕ್ಕೆ ಅತ್ಯುತ್ತಮ ಉದಾಹರಣೆ ಎಂದರೆ ಕರ್ನಾಟಕ ವಿಧಾನಮಂಡಲದ ಡಿಜಿಟಲೀಕರಣ. ಮುಂಬರುವ ಜುಲೈ ತಿಂಗಳ ಮಾನ್ಸೂನ್ ಅಧಿವೇಶನದಿಂದ ರಾಜ್ಯ ವಿಧಾನಸಭೆ ಮತ್ತು ವಿಧಾನ ಪರಿಷತ್ ಸಂಪೂರ್ಣವಾಗಿ ಕಾಗದ ರಹಿತ (ಪೇಪರ್ಲೆಸ್) ಆಡಳಿತ ವ್ಯವಸ್ಥೆಗೆ ತೆರೆದುಕೊಳ್ಳುತ್ತಿವೆ.
ಕೇಂದ್ರ ಸರ್ಕಾರದ ರಾಷ್ಟ್ರೀಯ ಇ-ವಿಧಾನ್ ಅಪ್ಲಿಕೇಶನ್ (NeVA) ಯೋಜನೆಯಡಿ ಸಜ್ಜಾಗುತ್ತಿರುವ ಈ ಹೊಸ ವ್ಯವಸ್ಥೆಯಿಂದಾಗಿ, ಇನ್ಮುಂದೆ ಶಾಸಕರು ಸದನದಲ್ಲಿ ದೊಡ್ಡ ದೊಡ್ಡ ಕಾಗದದ ಕಟ್ಟುಗಳನ್ನು ಹೊತ್ತು ತರುವ ಅಗತ್ಯವಿರುವುದಿಲ್ಲ. ಬದಲಾಗಿ, ಬಯೋಮೆಟ್ರಿಕ್ ಸೌಲಭ್ಯವಿರುವ ಹೈಟೆಕ್ ಐಪ್ಯಾಡ್ಗಳ ಮೂಲಕ ಎಲ್ಲಾ ಮಸೂದೆಗಳು, ಪ್ರಶ್ನೋತ್ತರಗಳು ಮತ್ತು ಕಾರ್ಯಸೂಚಿಗಳನ್ನು ಕೇವಲ ಒಂದು ಕ್ಲಿಕ್ನಲ್ಲಿ ವೀಕ್ಷಿಸಬಹುದಾಗಿದೆ. ಸುಮಾರು 60 ಕೋಟಿ ರೂಪಾಯಿ ವೆಚ್ಚದ ಈ ಮಹತ್ವಾಕಾಂಕ್ಷಿ ಯೋಜನೆಯು ಕಾಗದದ ದುಂದುವೆಚ್ಚವನ್ನು ತಡೆಯುವುದಲ್ಲದೆ, ಸರ್ಕಾರದ ಆಡಳಿತದಲ್ಲಿ ಹೆಚ್ಚಿನ ಪಾರದರ್ಶಕತೆ ಮತ್ತು ವೇಗವನ್ನು ತರಲಿದೆ. ಇದು ಕರ್ನಾಟಕದ ಸಂಸದೀಯ ಇತಿಹಾಸದಲ್ಲೇ ಒಂದು ಪ್ರಮುಖ ಡಿಜಿಟಲ್ ಕ್ರಾಂತಿಯಾಗಿದೆ.
ಈ ಬಗ್ಗೆ ವಿಧಾನಸಭಾ ಸ್ಪೀಕರ್ ಯು.ಟಿ. ಖಾದರ್ ಮಾತನಾಡಿ, ಈ ಯೋಜನೆಗೆ ಅಂದಾಜು 60 ಕೋಟಿ ರೂಪಾಯಿ ವೆಚ್ಚವಾಗಲಿದ್ದು, ಇದರಲ್ಲಿ ರಾಜ್ಯ ಸರ್ಕಾರದ ಪಾಲು ಶೇಕಡಾ 40 ರಷ್ಟು ಇರಲಿದೆ. ನಾವು ಎರಡೂ ಸದನಗಳನ್ನು ಡಿಜಿಟಲೀಕರಣಗೊಳಿಸಲು ಬಯಸುತ್ತೇವೆ. ಶಾಸಕರಿಗೆ ನೀಡಲಾಗುವ ಕಾರ್ಯಸೂಚಿ, ಚುಕ್ಕೆ ಗುರುತಿನ ಮತ್ತು ಚುಕ್ಕೆ ಗುರುತಿಲ್ಲದ ಪ್ರಶ್ನೋತ್ತರಗಳು ಹಾಗೂ ಮಸೂದೆಗಳು ಸೇರಿದಂತೆ ಎಲ್ಲಾ ದಾಖಲೆಗಳನ್ನು ಇ-ಫಾರ್ಮ್ಯಾಟ್ ಮೂಲಕ ಕಳುಹಿಸಲಾಗುವುದು, ಈ ವ್ಯವಸ್ಥೆಯು ಇನ್ಬಿಲ್ಟ್ ಸಾಫ್ಟ್ವೇರ್ ಹೊಂದಿರಲಿದ್ದು, ಬಳಸಲು ಅತ್ಯಂತ ಸುಲಭವಾಗಿರುತ್ತದೆ ಎಂದು ತಿಳಿಸಿದ್ದಾರೆ.
ಖಾದರ್ ಪ್ರಕಾರ, ಈ ಉಪಕ್ರಮವು ಪ್ರಸ್ತುತ ಭರಿಸಲಾಗುತ್ತಿರುವ ವಿವಿಧ ವೆಚ್ಚಗಳನ್ನು ಕಡಿಮೆ ಮಾಡುವ ನಿರೀಕ್ಷೆಯಿದೆ. ಅಲ್ಲದೆ, ಕಾಗದಪತ್ರಗಳು ಕಳೆದುಹೋಗುವ ಪ್ರಶ್ನೆಯೇ ಉದ್ಭವಿಸುವುದಿಲ್ಲ. ಎಲ್ಲಾ ಶಾಸಕರಿಗೆ ಈ ವ್ಯವಸ್ಥೆಯನ್ನು ಬಳಸುವ ಬಗ್ಗೆ ತರಬೇತಿ ನೀಡಲಾಗುವುದು. ಹೆಚ್ಚಿನ ಶಾಸಕರು ಈಗಾಗಲೇ ಸ್ಮಾರ್ಟ್ಫೋನ್ ಬಳಸುತ್ತಿರುವುದರಿಂದ ಇದನ್ನು ಬಳಸುವುದು ಅವರಿಗೆ ಕಷ್ಟವಾಗುವುದಿಲ್ಲ, ಎಂದು ಹೇಳಿದ್ದಾರೆ.
ಮಾಹಿತಿ ಅಥವಾ ವಿವಿಧ ಜನಕೇಂದ್ರಿತ ಸಮಸ್ಯೆಗಳ ಬಗ್ಗೆ ಹುಡುಕಲು ಶಾಸಕರು ಸದನದಲ್ಲಿ ತಮ್ಮ ಫೋನ್ಗಳನ್ನು ಬಳಸಲು ಅನುಮತಿಸಲಾಗಿದೆ. ಹೊಸ ವ್ಯವಸ್ಥೆಯ ಸುಗಮ ಬಳಕೆಗೆ ಅನುಕೂಲವಾಗುವಂತೆ ಜಾಮರ್ಗಳನ್ನು ತೆರವುಗೊಳಿಸಲು ನಾನು ಅಧಿಕಾರಿಗಳಿಗೆ ಸೂಚಿಸಿದ್ದೇನೆ ಎಂದು ತಿಳಿಸಿದ್ದಾರೆ.
ವಿಶ್ವೇಶ್ವರ ಹೆಗಡೆ ಕಾಗೇರಿ ಸ್ಪೀಕರ್ ಆಗಿದ್ದ ಅವಧಿಯಲ್ಲಿ ಈ ಪ್ರಸ್ತಾವನೆಯನ್ನು ಸದನದ ಮುಂದೆ ಇಡಲಾಗಿತ್ತು. ಕರ್ನಾಟಕವು ಕೇಂದ್ರ ಸರ್ಕಾರದ ‘ನೆವಾ’ (NeVA) ವ್ಯವಸ್ಥೆಯನ್ನು ಅಳವಡಿಸಿಕೊಳ್ಳಬೇಕೇ ಅಥವಾ ಸ್ವಂತ ಸಾಫ್ಟ್ವೇರ್ ಹೊಂದಿರಬೇಕೇ ಎಂಬ ಬಗ್ಗೆ ಚರ್ಚೆ ನಡೆದಿತ್ತು. ಆದರೆ ಈಗ, ಸದನವು ಈ ಮಹತ್ವದ ಡಿಜಿಟಲ್ ಉಪಕ್ರಮವನ್ನು ಜಾರಿಗೆ ತರಲು ಸಂಪೂರ್ಣವಾಗಿ ಸಜ್ಜಾಗಿದೆ.
