ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಮೈಸೂರು ದಸರಾ ಎಂದಾಕ್ಷಣ ಜಂಬೂಸವಾರಿ, ಜನಸಾಗರ, ಚಿನ್ನದ ಅಂಬಾರಿ ಹೊರುವ ಗಜರಾಜನ ಚಿತ್ರ ಕಣ್ಮುಂದೆ ಬರೋದು ಸಹಜ. ಪ್ರತಿ ವರ್ಷ ಅಂಬಾರಿ ಹೊರುವ ಆನೆಯ ಆಯ್ಕೆ ಕುತೂಹಲ ಮೂಡಿಸಿದರೂ, ಈ ಬಾರಿ ಈ ವಿಚಾರಕ್ಕೆ ವಿಶೇಷ ಮಹತ್ವ ಬಂದಿದೆ.
ಹಲವು ವರ್ಷಗಳಿಂದ ಅಂಬಾರಿಯ ಹೊಣೆ ಹೊತ್ತಿದ್ದ ಅಭಿಮನ್ಯು ನಿವೃತ್ತಿಯಾಗಿರುವ ಹಿನ್ನೆಲೆಯಲ್ಲಿ, ಆ ಸ್ಥಾನವನ್ನು ತುಂಬಲು ಅರಣ್ಯ ಇಲಾಖೆ ನಾಲ್ವರು ಆನೆಗಳನ್ನು ಗುರುತಿಸಿದೆ.
60 ವರ್ಷ ದಾಟಿದ ಅಭಿಮನ್ಯುವಿಗೆ ವಿಶ್ರಾಂತಿ
2020ರಿಂದ ಆರು ವರ್ಷಗಳ ಕಾಲ ಜಂಬೂಸವಾರಿಯಲ್ಲಿ ಸುಮಾರು 750 ಕೆ.ಜಿ. ತೂಕದ ಚಿನ್ನದ ಅಂಬಾರಿಯನ್ನು ಹೊರುತ್ತಿದ್ದ ಅಭಿಮನ್ಯು ಈಗ ವಯಸ್ಸಿನ ಕಾರಣದಿಂದ ಈ ಜವಾಬ್ದಾರಿಯಿಂದ ಮುಕ್ತಿ ನೀಡಲಾಗಿದೆ. ಇದರ ಜೊತೆಗೆ ಶಿಬಿರದಲ್ಲಿ ಆತನ ದಂತಕ್ಕೂ ಹಾನಿಯಾಗಿರುವುದು ನಿರ್ಧಾರಕ್ಕೆ ಮತ್ತೊಂದು ಕಾರಣವಾಗಿದೆ.
ಆದರೆ ದಸರಾದಿಂದ ಅಭಿಮನ್ಯು ಸಂಪೂರ್ಣವಾಗಿ ದೂರವಾಗುವುದಿಲ್ಲ. 2026ರ ದಸರೆಯಲ್ಲಿ ಆತ ನಿಶಾನೆ ಆನೆಯಾಗಿ ಪಾಲ್ಗೊಳ್ಳಲಿದ್ದು, ಅಂಬಾರಿ ಹೊರುವ ಜವಾಬ್ದಾರಿಯಿಂದ ನಿವೃತ್ತಿಯಾಗುತ್ತಿರುವ ಹಿರಿಯ ಗಜರಾಜನಿಗೆ ಗೌರವಪೂರ್ವಕ ವಿದಾಯ ನೀಡಲು ಅರಣ್ಯ ಇಲಾಖೆ ನಿರ್ಧರಿಸಿದೆ.
ಅಂಬಾರಿಗೆ ನಾಲ್ವರ ಪೈಪೋಟಿ
ಅಭಿಮನ್ಯುವಿನ ಸ್ಥಾನಕ್ಕೆ ಒಬ್ಬರನ್ನು ಆಯ್ಕೆ ಮಾಡುವ ಪ್ರಕ್ರಿಯೆ ಈಗಾಗಲೇ ಆರಂಭವಾಗಿದೆ. ಧನಂಜಯ, ಮಹೇಂದ್ರ, ಪ್ರಶಾಂತ ಹಾಗೂ ಏಕಲವ್ಯ ಈ ನಾಲ್ವರು ಆನೆಗಳನ್ನು ಪ್ರಮುಖವಾಗಿ ಪರಿಗಣಿಸಲಾಗಿದೆ.
54 ವರ್ಷದ ಪ್ರಶಾಂತ ಬರೋಬ್ಬರಿ 18 ವರ್ಷಗಳ ದಸರಾ ಅನುಭವ ಹೊಂದಿರುವ ಆನೆಯಾಗಿದ್ದು, ಅಂಬಾರಿ ಹೊರುವ ರೇಸ್ನಲ್ಲಿರುವ ಪ್ರಮುಖ ಅಭ್ಯರ್ಥಿಗಳಲ್ಲಿ ಒಬ್ಬನಾಗಿದ್ದಾನೆ. 41 ವರ್ಷದ ಏಕಲವ್ಯ ಕೂಡ ಬಲಿಷ್ಠನಾಗಿದ್ದು, ಈ ಬಾರಿ ತನ್ನ ಸಾಮರ್ಥ್ಯ ಪ್ರದರ್ಶಿಸಲು ಸಜ್ಜಾಗಿದ್ದಾನೆ. 42 ವರ್ಷದ ಮಹೇಂದ್ರ ಶಾಂತ ಸ್ವಭಾವ ಹಾಗೂ ಉತ್ತಮ ದೈಹಿಕ ಸಾಮರ್ಥ್ಯ ಹೊಂದಿದ್ದು, ಅಂಬಾರಿ ಹೊರುವ ಜವಾಬ್ದಾರಿಗೆ ಸೂಕ್ತ ಅಭ್ಯರ್ಥಿಯಾಗಿ ಪರಿಗಣಿಸಲಾಗಿದೆ. 45 ವರ್ಷದ ಧನಂಜಯ ದಸರೆಯಲ್ಲಿ ಹಲವು ವರ್ಷಗಳ ಅನುಭವ ಹೊಂದಿದ್ದು, ಸದ್ಯದ ಆಯ್ಕೆ ಪ್ರಕ್ರಿಯೆಯಲ್ಲಿ ಪ್ರಮುಖ ಸ್ಪರ್ಧಿಯಾಗಿದ್ದಾನೆ.
ಇದನ್ನೂ ಓದಿ:
ತಾಲೀಮು ಬಳಿಕವೇ ಅಂತಿಮ ನಿರ್ಧಾರ
ಅಂಬಾರಿ ಹೊರುವ ಆನೆಯನ್ನು ಕೇವಲ ವಯಸ್ಸು ಅಥವಾ ಅನುಭವದ ಆಧಾರದ ಮೇಲೆ ಆಯ್ಕೆ ಮಾಡುವುದಿಲ್ಲ. ಗಜರಾಜನ ದೈಹಿಕ ಸಾಮರ್ಥ್ಯ, ಮಾನಸಿಕ ಸ್ಥಿರತೆ ಹಾಗೂ ಜಂಬೂಸವಾರಿಯ ವೇಳೆ ಒತ್ತಡವನ್ನು ನಿಭಾಯಿಸುವ ಸಾಮರ್ಥ್ಯವನ್ನೂ ಪರೀಕ್ಷಿಸಲಾಗುತ್ತದೆ. ಇದಕ್ಕಾಗಿ ನಾಲ್ಕು ಆನೆಗಳಿಗೂ ವಿವಿಧ ಹಂತದ ತಾಲೀಮು ನೀಡಲಾಗುತ್ತದೆ. ಮರಳು ಮೂಟೆ ಹೊರುವ ಅಭ್ಯಾಸ, ಮರದ ಅಂಬಾರಿ ಹೊತ್ತು ನಡೆಯುವ ತರಬೇತಿ, ಫಿರಂಗಿ ಸಿಡಿಮದ್ದುಗಳ ಶಬ್ದಕ್ಕೆ ಹೊಂದಿಕೊಳ್ಳುವ ಪರೀಕ್ಷೆ ಹಾಗೂ ಜಂಬೂಸವಾರಿ ಸಾಗುವ ಮಾರ್ಗದಲ್ಲಿ ರಿಹರ್ಸಲ್ ನಡೆಸಲಾಗುತ್ತದೆ. ಈ ಎಲ್ಲಾ ಹಂತಗಳಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡುವ ಆನೆಯನ್ನೇ ಅಂತಿಮವಾಗಿ ಚಿನ್ನದ ಅಂಬಾರಿ ಹೊರುವ ಜವಾಬ್ದಾರಿಗೆ ಆಯ್ಕೆ ಮಾಡಲಾಗುತ್ತದೆ.
ಭೀಮನಿಗೆ ಸಿಗುತ್ತಾ ಅವಕಾಶ?
ಮೈಸೂರು ದಸರಾದ ಮತ್ತೊಂದು ಜನಪ್ರಿಯ ಗಜರಾಜ ಭೀಮನ ವಿಚಾರವೂ ಈ ಬಾರಿ ಸಾಕಷ್ಟು ಚರ್ಚೆಯಾಗುತ್ತಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಭೀಮ ದಸರಾ ಗಜಪಡೆಯ ಭಾಗವಾಗಲಿದ್ದಾನೆ ಎಂಬ ಮಾತುಗಳು ಹರಿದಾಡುತ್ತಿದ್ದರೂ, ಸದ್ಯ ಆತನನ್ನು ಮೀಸಲು ಪಟ್ಟಿಯಲ್ಲಿ ಇರಿಸಲಾಗಿದೆ.
ಭೀಮನಿಗೆ ಮದ ಬಂದಿರುವ ಹಿನ್ನೆಲೆಯಲ್ಲಿ ಮೊದಲ ಹಂತದ ಗಜಪಡೆಯೊಂದಿಗೆ ಕರೆತರಲಾಗುತ್ತಿಲ್ಲ. ಪರಿಸ್ಥಿತಿ ಅನುಕೂಲಕರವಾಗಿ ಆತನ ಮದ ಕಡಿಮೆಯಾದರೆ, ಎರಡನೇ ಹಂತದಲ್ಲಿ ದಸರಾ ಗಜಪಡೆಗೆ ಸೇರಿಸುವ ಸಾಧ್ಯತೆಯಿದೆ. ಮೊದಲ ಹಂತದಲ್ಲಿ ಧನಂಜಯ, ಪ್ರಶಾಂತ, ಗೋಪಿ, ಶ್ರೀರಾಮ, ಸುಗ್ರೀವ, ಕಾವೇರಿ, ಮಹೇಂದ್ರ, ಲಕ್ಷ್ಮೀ ಮತ್ತು ಏಕಲವ್ಯ ಆಗಮಿಸಲಿದ್ದಾರೆ. ಎರಡನೇ ಹಂತದಲ್ಲಿ ರೂಪ, ಚೈತ್ರಾ ಮತ್ತು ಶ್ರೀಕಂಠ ಮೈಸೂರಿಗೆ ಬರಲಿದ್ದಾರೆ.
ಮೈಸೂರಿಗೆ ಗಜಪಯಣ
ಈ ವರ್ಷದ ದಸರಾ ಗಜಪಡೆಯ ಮೊದಲ ಹಂತದ ಪ್ರಯಾಣ ಆಗಸ್ಟ್ 26ರಂದು ನಾಗರಹೊಳೆಯ ವೀರನಹೊಸಹಳ್ಳಿಯಿಂದ ಆರಂಭವಾಗಲಿದೆ. ಆಗಸ್ಟ್ 28ರಂದು ಶುಭ ತುಲಾ ಲಗ್ನದಲ್ಲಿ ಆನೆಗಳು ಮೈಸೂರು ತಲುಪಲಿವೆ.
ಅರಮನೆಗೆ ಆಗಮಿಸಿದ ಬಳಿಕ ಗಜಪಡೆ ಸುಮಾರು 50 ದಿನಗಳ ಕಾಲ ವಿಶೇಷ ಆರೈಕೆ ಮತ್ತು ತರಬೇತಿಯಲ್ಲಿ ಇರಲಿದೆ. ಈ ಅವಧಿಯಲ್ಲಿ ಆನೆಗಳ ಆಹಾರ, ಪೋಷಣೆ ಹಾಗೂ ನಿರ್ವಹಣೆಗಾಗಿ ಅರಣ್ಯ ಇಲಾಖೆ ಸರ್ಕಾರದಿಂದ ಸುಮಾರು 2 ಕೋಟಿ ರೂ ಅನುದಾನ ಕೋರಿ ಪ್ರಸ್ತಾವನೆ ಸಲ್ಲಿಸಿದೆ.
ಅಭಿಮನ್ಯುವಿನ ನಿವೃತ್ತಿಯ ಬಳಿಕ ಮೈಸೂರು ದಸರಾದ ಚಿನ್ನದ ಅಂಬಾರಿಗೆ ಹೊಸ ಗಜರಾಜನ ಆಯ್ಕೆ ಈ ಬಾರಿಯ ಪ್ರಮುಖ ಕುತೂಹಲವಾಗಿದೆ. ಪ್ರಶಾಂತ, ಏಕಲವ್ಯ, ಮಹೇಂದ್ರ ಹಾಗೂ ಧನಂಜಯ ನಡುವೆ ನಡೆಯಲಿರುವ ಕಠಿಣ ತಾಲೀಮು ಮತ್ತು ಪರೀಕ್ಷೆಗಳ ಬಳಿಕವೇ ಅಂತಿಮ ನಿರ್ಧಾರ ಕೈಗೊಳ್ಳಲಾಗುತ್ತದೆ. ಇದೇ ವೇಳೆ ಭೀಮನಿಗೂ ಎರಡನೇ ಹಂತದಲ್ಲಿ ಅವಕಾಶ ಸಿಗುವ ಸಾಧ್ಯತೆ ಇರುವುದರಿಂದ, ಈ ಬಾರಿಯ ದಸರಾ ಗಜಪಡೆಯತ್ತ ರಾಜ್ಯದ ಜನರ ಗಮನ ಮತ್ತಷ್ಟು ಹೆಚ್ಚಾಗಿದೆ. ಚಿನ್ನದ ಅಂಬಾರಿಯ ಭಾರ ಹೊತ್ತು ಜಂಬೂಸವಾರಿಯ ಮುನ್ನಡೆಸುವ ಹೊಸ ‘ಕ್ಯಾಪ್ಟನ್’ ಯಾರು ಎಂಬುದು ಶೀಘ್ರದಲ್ಲೇ ಬಹಿರಂಗವಾಗಲಿದೆ.
