ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಶ್ರೀಲಂಕಾ ಪ್ರವಾಸದಲ್ಲಿ ಭಾರತ ತಂಡ ಮತ್ತೊಂದು ಮಹತ್ವದ ಪಂದ್ಯಕ್ಕೆ ಸಜ್ಜಾಗಿದೆ. ಈಗಾಗಲೇ ಮೊದಲ ಟೆಸ್ಟ್ನಲ್ಲಿ ಗೆಲುವು ಸಾಧಿಸಿರುವ ಟೀಂ ಇಂಡಿಯಾ, ಸರಣಿಯನ್ನು ಗೆಲುವಿನೊಂದಿಗೆ ಮುಗಿಸುವ ಲೆಕ್ಕಾಚಾರದಲ್ಲಿದೆ.
ಕೊಲಂಬೊದಲ್ಲಿ ನಡೆಯಲಿರುವ ಎರಡನೇ ಟೆಸ್ಟ್ಗೂ ಮುನ್ನ ತಂಡದ ಸಿದ್ಧತೆ, ಆಟಗಾರರ ಆಯ್ಕೆ ಹಾಗೂ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಕುರಿತು ಕೋಚ್ ಗೌತಮ್ ಗಂಭೀರ್ ಮಾತನಾಡಿದ್ದಾರೆ. ಈ ವೇಳೆ ಕೆಲವು ಪ್ರಶ್ನೆಗಳಿಗೆ ಅವರು ನೀಡಿದ ನೇರ ಉತ್ತರಗಳು ಗಮನ ಸೆಳೆದಿವೆ.
WTC ಸ್ಥಾನಕ್ಕಿಂತ ತಂಡದ ಗುರಿಯೇ ಮುಖ್ಯ
ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಅಂಕಪಟ್ಟಿಯಲ್ಲಿ ಭಾರತ ಪ್ರಸ್ತುತ ಐದನೇ ಸ್ಥಾನದಲ್ಲಿದೆ. ಫೈನಲ್ ತಲುಪುವ ಅವಕಾಶದ ಕುರಿತು ಗಂಭೀರ್ ಅವರನ್ನು ಪ್ರಶ್ನಿಸಿದಾಗ, ಅಂಕಪಟ್ಟಿಯ ಸ್ಥಾನವನ್ನು ನೋಡಿ ಒತ್ತಡಕ್ಕೆ ಒಳಗಾಗುವ ಅಗತ್ಯವಿಲ್ಲ ಎಂಬ ಸಂದೇಶ ನೀಡಿದರು.
ತಂಡದ ಪ್ರಗತಿಗೆ ಯಾವ ರೀತಿಯ ಕ್ರಿಕೆಟ್ ಆಡಬೇಕು ಮತ್ತು ಅದಕ್ಕಾಗಿ ಯಾವ ನಿರ್ಧಾರಗಳು ಅಗತ್ಯ ಎಂಬುದರ ಕಡೆಗೆ ಹೆಚ್ಚಿನ ಗಮನ ಕೊಡುತ್ತಿದ್ದೇವೆ ಎಂದು ಅವರು ಹೇಳಿದರು. ಕೋಚ್ ಆಗಿ ತಮ್ಮ ಪ್ರಮುಖ ಉದ್ದೇಶ ಪಂದ್ಯಗಳನ್ನು ಗೆದ್ದು ತಂಡಕ್ಕೆ ಯಶಸ್ಸು ತಂದುಕೊಡುವುದೇ ಹೊರತು ಸಾಮಾಜಿಕ ಜಾಲತಾಣಗಳಲ್ಲಿನ ಅಭಿಪ್ರಾಯಗಳಲ್ಲ ಎಂದು ಗಂಭೀರ್ ಸ್ಪಷ್ಟಪಡಿಸಿದರು.
ಇದನ್ನೂ ಓದಿ:
‘ಸಾಮಾಜಿಕ ಜಾಲತಾಣದ ಪ್ರತಿಕ್ರಿಯೆ ನನಗೆ ಮುಖ್ಯವಲ್ಲ’
ತಮ್ಮ ನಿರ್ಧಾರಗಳು ವೀಕ್ಷಕರ ಅಭಿಪ್ರಾಯ, ಲೈಕ್ಸ್ ಅಥವಾ ಸಾಮಾಜಿಕ ಜಾಲತಾಣದ ಚರ್ಚೆಗಳನ್ನು ಆಧರಿಸಿರುವುದಿಲ್ಲ ಎಂದು ಗಂಭೀರ್ ಹೇಳಿದ್ದಾರೆ. ತಂಡದ ಅಗತ್ಯಕ್ಕೆ ತಕ್ಕಂತೆ ನಿರ್ಧಾರ ಕೈಗೊಳ್ಳುವುದು ಕೋಚ್ ಹಾಗೂ ನಾಯಕತ್ವದ ಜವಾಬ್ದಾರಿ ಎಂದು ಅವರು ಅಭಿಪ್ರಾಯಪಟ್ಟರು.
ಇಂಗ್ಲೆಂಡ್ ಪ್ರವಾಸದಿಂದ ಭಾರತ ಟೆಸ್ಟ್ ಕ್ರಿಕೆಟ್ನಲ್ಲಿ ಸಾಕಷ್ಟು ಉತ್ತಮ ಪ್ರಯತ್ನ ಮಾಡುತ್ತಿದೆ. ಫಲಿತಾಂಶಗಳ ಜತೆಗೆ ತಂಡದ ಆಟದ ಗುಣಮಟ್ಟದ ಮೇಲೂ ಗಮನ ಹರಿಸಲಾಗುತ್ತಿದೆ ಎಂದು ಅವರು ತಿಳಿಸಿದರು.
ಕುಲ್ದೀಪ್ಗೆ ಬೆಂಬಲ ಸೂಚಿಸಿದ ಕೋಚ್
ಕುಲ್ದೀಪ್ ಯಾದವ್ ಅವರ ಪಾತ್ರದ ಕುರಿತು ಮಾತನಾಡಿದ ಗಂಭೀರ್, ಅವರು ಭಾರತದ ಪ್ರಮುಖ ಸ್ಪಿನ್ನರ್ಗಳಲ್ಲಿ ಒಬ್ಬರು ಎಂದು ಹೇಳಿದರು. ತಂಡದ ಅಂತಿಮ ಸಂಯೋಜನೆ, ಪಿಚ್ನ ಪರಿಸ್ಥಿತಿ ಹಾಗೂ ನಾಯಕನ ನಿರ್ಧಾರ ಸೇರಿದಂತೆ ಹಲವು ಅಂಶಗಳು ಪ್ಲೇಯಿಂಗ್ ಇಲೆವೆನ್ ಆಯ್ಕೆಯಲ್ಲಿ ಪ್ರಭಾವ ಬೀರುತ್ತವೆ ಎಂದರು.
ಒಂದು ಪಂದ್ಯದಲ್ಲಿ ಕಡಿಮೆ ಅವಕಾಶ ಸಿಕ್ಕಿದ್ದಕ್ಕಾಗಿ ಆಟಗಾರನ ಸಾಮರ್ಥ್ಯದ ಬಗ್ಗೆ ಅನುಮಾನಿಸೋದು ಅಥವಾ ತೀರ್ಮಾನಿಸೋದು ಸರಿಯಲ್ಲ. ಕ್ರಿಕೆಟ್ನಲ್ಲಿ ಆಟಗಾರರು ಏರಿಳಿತ ಎದುರಿಸೋದು ಸಹಜವಾಗಿರುವುದರಿಂದ, ತಂಡ ತನ್ನ ಆಟಗಾರರಿಗೆ ಅಗತ್ಯವಾದ ಬೆಂಬಲ ನೀಡಲಿದೆ ಎಂದು ಗಂಭೀರ್ ತಿಳಿಸಿದರು.
ಶ್ರೀಲಂಕಾ ವಿರುದ್ಧದ ಎರಡನೇ ಟೆಸ್ಟ್ ಭಾರತ ತಂಡಕ್ಕೆ ಸರಣಿ ಗೆಲುವಿನ ದೃಷ್ಟಿಯಿಂದ ಮಹತ್ವದ್ದಾಗಿದೆ. ಅಂಕಪಟ್ಟಿ ಅಥವಾ ಹೊರಗಿನ ಟೀಕೆಗಳಿಗಿಂತ ಮೈದಾನದ ಪ್ರದರ್ಶನವೇ ಮುಖ್ಯ ಎಂಬ ಸಂದೇಶವನ್ನು ಗೌತಮ್ ಗಂಭೀರ್ ನೀಡಿದ್ದಾರೆ. ಆಟಗಾರರಿಗೆ ಬೆಂಬಲ ನೀಡುವ ಜೊತೆಗೆ ಗೆಲುವಿನತ್ತ ಗಮನಹರಿಸಿರುವ ಟೀಂ ಇಂಡಿಯಾ, ಕೊಲಂಬೊ ಟೆಸ್ಟ್ನಲ್ಲಿ ಮತ್ತೊಂದು ಪರಿಣಾಮಕಾರಿ ಪ್ರದರ್ಶನ ನೀಡುವ ನಿರೀಕ್ಷೆಯಲ್ಲಿದೆ.
