ಹೊಸದಿಗಂತ ಡಿಜಿಟಲ್ ಡೆಸ್ಕ್:
ನಿಮ್ಮ ಕೇಶರಾಶಿ ಮೇಲ್ನೋಟಕ್ಕೆ ಎಷ್ಟೇ ಸ್ವಚ್ಛವಾಗಿ, ಸುಂದರವಾಗಿ ಕಂಡರೂ, ಅದರ ಮೂಲವಾಗಿರುವ ನೆತ್ತಿ ಆರೋಗ್ಯವಾಗಿದೆಯೇ ಎಂಬುದು ಅತ್ಯಂತ ಮುಖ್ಯ. ಗಿಡದ ಬೇರು ಗಟ್ಟಿಯಾಗಿದ್ದರೆ ಮಾತ್ರ ಮರ ಚೆನ್ನಾಗಿ ಬೆಳೆಯಲು ಸಾಧ್ಯ, ಹಾಗೆಯೇ ನೆತ್ತಿಯ ಆರೋಗ್ಯ ಉತ್ತಮವಾಗಿದ್ದರೆ ಮಾತ್ರ ತಲೆಗೂದಲು ಗಟ್ಟಿಯಾಗಿ ಬೆಳೆಯುತ್ತದೆ.
ನಾವು ಪ್ರತಿದಿನ ಕೂದಲನ್ನು ಶ್ಯಾಂಪೂ ಹಾಕಿ ತೊಳೆದು ಸ್ವಚ್ಛವಾಗಿಟ್ಟುಕೊಳ್ಳುತ್ತೇವೆ. ಕೂದಲು ರೇಷ್ಮೆಯಂತೆ ಮೆತ್ತಗಿದ್ದರೆ ಕೂದಲು ಆರೋಗ್ಯವಾಗಿದೆ ಅಂದುಕೊಳ್ಳುತ್ತೇವೆ. ಆದರೆ, ಕೂದಲಿಗೆ ಸಿಗುವ ಸೌಂದರ್ಯ ನೆತ್ತಿಯ ಆರೋಗ್ಯವನ್ನು ನಿರ್ಧರಿಸುವುದಿಲ್ಲ. ತಲೆಯ ನೆತ್ತಿಯು ಸತ್ತ ಜೀವಕೋಶಗಳು, ಹೆಚ್ಚುವರಿ ಎಣ್ಣೆ ಮತ್ತು ದೂಳಿನಿಂದ ಕೂಡಿರಬಹುದು. ಇದು ತಲೆಯ ಚರ್ಮದ ರಂಧ್ರಗಳನ್ನು ಮುಚ್ಚಿ, ಹೊಸ ಕೂದಲು ಬೆಳೆಯುವುದನ್ನು ತಡೆಯುತ್ತದೆ.
ನಿಮ್ಮ ನೆತ್ತಿ ಆರೋಗ್ಯವಾಗಿಲ್ಲ ಎನ್ನುವುದಕ್ಕೆ ದೇಹವೇ ಕೆಲವು ಸೂಚನೆಗಳನ್ನು ನೀಡುತ್ತದೆ. ತಲೆಯಲ್ಲಿ ವಿಪರೀತ ತುರಿಕೆ, ಕೆಂಪು ಮಚ್ಚೆಗಳು, ಅತಿಯಾದ ಹೊಟ್ಟು, ನೆತ್ತಿ ಅತಿಯಾಗಿ ಒಣಗುವುದು ಅಥವಾ ಅತಿಯಾಗಿ ಎಣ್ಣೆಯಾಗುವುದು ಇವೆಲ್ಲವೂ ನೆತ್ತಿ ಅನಾರೋಗ್ಯದಿಂದ ಕೂಡಿದೆ ಎಂಬುದರ ಸ್ಪಷ್ಟ ಲಕ್ಷಣಗಳು. ಇವುಗಳನ್ನು ಆರಂಭದಲ್ಲೇ ಗಮನಿಸದಿದ್ದರೆ ಕೂದಲು ಅತಿಯಾಗಿ ಉದುರಲು ಪ್ರಾರಂಭವಾಗುತ್ತದೆ.
ನಾವು ಬಳಸುವ ಬಣ್ಣಗಳು, ವಿವಿಧ ಬಗೆಯ ಸ್ಟೈಲಿಂಗ್ ಶ್ಯಾಂಪೂಗಳು ಮತ್ತು ಕೆಮಿಕಲ್ ಕ್ರೀಮ್‌ಗಳು ಕೂದಲಿಗೆ ತಾತ್ಕಾಲಿಕ ಹೊಳಪು ನೀಡಬಹುದು. ಆದರೆ ಇವು ನೆತ್ತಿಯ ನೈಸರ್ಗಿಕ ಎಣ್ಣೆಯಂಶವನ್ನು ಹಾಳುಮಾಡುತ್ತವೆ. ಇದರ ಪರಿಣಾಮವಾಗಿ ನೆತ್ತಿಯ ಮೇಲೆ ಕಿರಿಕಿರಿ ಉಂಟಾಗಿ, ಬ್ಯಾಕ್ಟೀರಿಯಾ ಅಥವಾ ಫಂಗಲ್ ಇನ್‌ಫೆಕ್ಷನ್ ಹರಡುವ ಸಾಧ್ಯತೆ ಹೆಚ್ಚಿರುತ್ತದೆ.
ಏನು ಮಾಡಬೇಕು?
ವಾರಕ್ಕೆ ಕನಿಷ್ಠ ಎರಡು ಬಾರಿಯಾದರೂ ಬೆಚ್ಚಗಿನ ಎಣ್ಣೆಯಿಂದ ತಲೆಗೆ ಹಗುರವಾಗಿ ಮಸಾಜ್ ಮಾಡಿ. ಇದು ರಕ್ತಸಂಚಲನೆಯನ್ನು ಹೆಚ್ಚಿಸುತ್ತದೆ.
ಅತಿಯಾದ ಸುಗಂಧ ಮತ್ತು ರಾಸಾಯನಿಕಗಳಿಲ್ಲದ ಶ್ಯಾಂಪೂಗಳನ್ನು ಬಳಸಿ.
ನಿಮ್ಮ ಆಹಾರದಲ್ಲಿ ವಿಟಮಿನ್ ಇ, ಬಯೋಟಿನ್ ಮತ್ತು ಒಮೆಗಾ-3 ಕೊಬ್ಬಿನಂಶವಿರುವ ಆಹಾರಗಳನ್ನು ಸೇರಿಸಿಕೊಳ್ಳಿ.
ಕೂದಲು ಸುಂದರವಾಗಿ ಕಾಣುವುದು ಎಷ್ಟು ಮುಖ್ಯವೋ, ಅದನ್ನು ಹಿಡಿದಿಟ್ಟುಕೊಳ್ಳುವ ನೆತ್ತಿ ಸ್ವಚ್ಛ ಹಾಗೂ ಆರೋಗ್ಯಕರವಾಗಿರುವುದು ಅಷ್ಟೇ ಅಗತ್ಯ. ಮೇಲ್ನೋಟದ ಮೆರುಗಿಗೆ ಮರುಳಾಗದೆ, ಇಂದಿನಿಂದಲೇ ನಿಮ್ಮ ನೆತ್ತಿಯ ಕಡೆಗೂ ಕೊಂಚ ಗಮನ ಕೊಡಿ.
