ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಲಂಡನ್‌ನಿಂದ ಅಮೆರಿಕದ ಚಿಕಾಗೋಗೆ ಹೊರಟಿದ್ದ ಬ್ರಿಟಿಷ್ ಏರ್‌ವೇಸ್ ವಿಮಾನವೊಂದು ಹಾರಾಟದ ಮಧ್ಯೆಯೇ ತುರ್ತು ಪರಿಸ್ಥಿತಿಗೆ ಸಿಲುಕಿ, ತನ್ನ ಪ್ರಯಾಣವನ್ನು ಸ್ಥಗಿತಗೊಳಿಸಿ ಲಂಡನ್ ಹೀತ್ರೋ ವಿಮಾನ ನಿಲ್ದಾಣದತ್ತ ಮರಳಿರುವ ಘಟನೆ ನಡೆದಿದೆ.
ಐರ್ಲೆಂಡ್‌ ಮೇಲೆ ಹಾರಾಟ ನಡೆಸುತ್ತಿದ್ದ ವೇಳೆ ವಿಮಾನವು ಅತಿ ವೇಗವಾಗಿ ಕುಸಿದಿದ್ದು, ಬಳಿಕ ತುರ್ತು ಸಂಕೇತ ನೀಡಿರುವುದು ಆತಂಕಕ್ಕೆ ಕಾರಣವಾಗಿದೆ.
ಟೇಕಾಫ್ ಆದ 1 ಗಂಟೆಯಲ್ಲಿ ಘಟನೆ
ಬ್ರಿಟಿಷ್ ಏರ್‌ವೇಸ್‌ನ BA295 ವಿಮಾನವು ಬೋಯಿಂಗ್ 777-200ER ಮಾದರಿಯದ್ದಾಗಿದ್ದು, ಲಂಡನ್ ಹೀತ್ರೋ ವಿಮಾನ ನಿಲ್ದಾಣದ ಟರ್ಮಿನಲ್ 5ರಿಂದ ಬೆಳಗ್ಗೆ 10.50ರ ಸುಮಾರಿಗೆ ಚಿಕಾಗೋ ಓ’ಹೇರ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದತ್ತ ಪ್ರಯಾಣ ಆರಂಭಿಸಿತ್ತು. ಸುಮಾರು 8 ಗಂಟೆ 40 ನಿಮಿಷಗಳ ಪ್ರಯಾಣದ ಬಳಿಕ ಚಿಕಾಗೋ ತಲುಪಬೇಕಿದ್ದ ವಿಮಾನ, ಟೇಕಾಫ್ ಆದ ಸುಮಾರು ಒಂದು ಗಂಟೆಯ ನಂತರ 37 ಸಾವಿರ ಅಡಿ ಎತ್ತರದಲ್ಲಿ ಹಾರಾಟ ನಡೆಸುತ್ತಿತ್ತು.
ಇದನ್ನೂ ಓದಿ:
ಈ ವೇಳೆ ವಿಮಾನದ ಎತ್ತರದಲ್ಲಿ ದಿಢೀರ್ ಬದಲಾವಣೆ ಕಂಡುಬಂದಿದೆ. ವಿಮಾನ ಸಂಚಾರದ ಮಾಹಿತಿಯ ಪ್ರಕಾರ, ಕೆಲವೇ ನಿಮಿಷಗಳಲ್ಲಿ ವಿಮಾನವು ಸುಮಾರು 9 ಸಾವಿರ ಅಡಿ ಎತ್ತರದವರೆಗೆ ಇಳಿದಿದೆ. ಬಳಿಕ ಐರ್ಲೆಂಡ್‌ ಮೇಲೆ ತನ್ನ ಹಾರಾಟದ ದಿಕ್ಕನ್ನು ಬದಲಿಸಿಕೊಂಡು ಅಟ್ಲಾಂಟಿಕ್ ಸಾಗರದತ್ತ ಮುಂದುವರಿಯುವ ಬದಲು ಲಂಡನ್‌ನತ್ತ ಮರಳಿದೆ.
ಈ ಕುಸಿತಕ್ಕೆ ಕಾರಣ ಸಿಕ್ಕಿಲ್ಲ
ಇದೇ ಸಂದರ್ಭದಲ್ಲಿ ವಿಮಾನ ಸಿಬ್ಬಂದಿ ‘ಸ್ಕ್ವಾಕ್ 7700’ ಎಂಬ ತುರ್ತು ಸಂಕೇತವನ್ನು ಏರ್ ಟ್ರಾಫಿಕ್ ಕಂಟ್ರೋಲ್‌ಗೆ ರವಾನಿಸಿದ್ದಾರೆ. ವಿಮಾನದಲ್ಲಿ ತುರ್ತು ಪರಿಸ್ಥಿತಿ ಉಂಟಾದಾಗ ಈ ಸಂಕೇತವನ್ನು ಬಳಸಲಾಗುತ್ತದೆ. ಆದರೆ 7700 ಕೋಡ್‌ನಿಂದ ಯಾವ ಸಮಸ್ಯೆ ಎದುರಾಗಿದೆ ಎಂಬುದು ಸ್ಪಷ್ಟವಾಗಿ ತಿಳಿಯುವುದಿಲ್ಲ. ತಾಂತ್ರಿಕ ದೋಷ, ವೈದ್ಯಕೀಯ ತುರ್ತು ಪರಿಸ್ಥಿತಿ ಅಥವಾ ಇತರ ಯಾವುದೇ ತುರ್ತು ಸಂದರ್ಭಗಳಲ್ಲಿ ಈ ಕೋಡ್‌ ಬಳಸಬಹುದಾಗಿದೆ.
ಪ್ರಯಾಣಿಕರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ವಿಮಾನವನ್ನು ಮಧ್ಯದಲ್ಲೇ ತಿರುಗಿಸಿರುವುದು, ವಾಯುಯಾನ ಕ್ಷೇತ್ರದಲ್ಲಿ ತುರ್ತು ಪರಿಸ್ಥಿತಿಗಳನ್ನು ಎದುರಿಸುವ ವ್ಯವಸ್ಥೆಗಳು ಎಷ್ಟು ಮಹತ್ವದ್ದಾಗಿವೆ ಎಂಬುದನ್ನು ಮತ್ತೊಮ್ಮೆ ತೋರಿಸಿದೆ.
