ಹೊಸದಿಗಂತ ಡಿಜಿಟಲ್ ಡೆಸ್ಕ್:
ತೆಲುಗು ಸೂಪರ್ಸ್ಟಾರ್ ರಾಮ್ ಚರಣ್ ತಮ್ಮ ಮುಂಬರುವ ಚಿತ್ರದ ಪ್ರಚಾರದ ವೇಳೆ ಭಾರತದ ಸ್ಟಾರ್ ವೇಗದ ಬೌಲರ್ ಜಸ್ಪ್ರೀತ್ ಬುಮ್ರಾ ಅವರನ್ನು ತಪ್ಪಾಗಿ ʻಫುಟ್ಬಾಲರ್ʼ ಎಂದು ಕರೆದಿದ್ದಕ್ಕಾಗಿ ಸಾಮಾಜಿಕ ಜಾಲತಾಣದಲ್ಲಿ ಬಹಿರಂಗವಾಗಿ ಕ್ಷಮೆಯಾಚಿಸಿದ್ದಾರೆ. ಭೋಪಾಲ್ನಲ್ಲಿ ನಡೆದ ತಮ್ಮ ಹೊಸ ಸಿನಿಮಾ ‘ಪೆದ್ದಿ’ ಚಿತ್ರದ ಸಂಗೀತ ಬಿಡುಗಡೆ ಸಮಾರಂಭದಲ್ಲಿ ನಡೆದ ಈ ಎಡವಟ್ಟು ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿದೆ.
ವೇದಿಕೆಯಲ್ಲಿ ನಡೆದಿದ್ದೇನು?: ರಾಪಿಡ್ ಫೈರ್ ರೌಂಡ್ ಎಡವಟ್ಟು
ಮಧ್ಯಪ್ರದೇಶದ ಭೋಪಾಲ್ನಲ್ಲಿ ಆಯೋಜನೆಗೊಂಡಿದ್ದ ಬಿಗ್ ಬಜೆಟ್ ಚಿತ್ರ ‘ಪೆದ್ದಿ’ ಕಾರ್ಯಕ್ರಮದಲ್ಲಿ ರಾಮ್ ಚರಣ್, ನಟಿ ಜಾನ್ವಿ ಕಪೂರ್ ಮತ್ತು ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ ಭಾಗವಹಿಸಿದ್ದರು. ಈ ವೇಳೆ ನಿರೂಪಕರು ರಾಮ್ ಚರಣ್ ಅವರೊಂದಿಗೆ ಭಾರತೀಯ ಕ್ರಿಕೆಟಿಗರ ಬಗ್ಗೆ ಒಂದು ಸಣ್ಣ ‘ರಾಪಿಡ್ ಫೈರ್’ ರೌಂಡ್ ಆಟ ಆಡಿದರು.
ಸಚಿನ್ ತೆಂಡೂಲ್ಕರ್, ಎಂ.ಎಸ್. ಧೋನಿ, ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಹೆಸರು ಬಂದಾಗ ರಾಮ್ ಚರಣ್ ಅತ್ಯಂತ ಆಕರ್ಷಕವಾಗಿ ಉತ್ತರಿಸಿದರು. ಆದರೆ, ಕೊನೆಯಲ್ಲಿ ನಿರೂಪಕರು “ಮತ್ತೆ ಜಸ್ಪ್ರೀತ್ ಬುಮ್ರಾ?” ಎಂದು ಕೇಳಿದಾಗ ರಾಮ್ ಚರಣ್ ಭಾವುಕರಾಗಿ, “ಜಸ್ಪ್ರೀತ್ ಬುಮ್ರಾ ಜೀ, ನಾನು ನಿಮ್ಮ ಅತಿ ದೊಡ್ಡ ಅಭಿಮಾನಿ. ನನಗೆ ಫುಟ್ಬಾಲ್ ಎಂದರೆ ತುಂಬಾ ಇಷ್ಟ, ನೀವು ಫುಟ್ಬಾಲ್ ಆಟವನ್ನು ಭಾರತದಲ್ಲಿ ಇಷ್ಟೊಂದು ಎತ್ತರಕ್ಕೆ ಕೊಂಡೊಯ್ಯುತ್ತಿದ್ದೀರಿ, ಲವ್ ಯೂ ಸರ್” ಎಂದು ಉತ್ತರಿಸಿದರು.
ನೆಟ್ಟಿಗರ ಟ್ರೋಲ್: ರಾಮ್ ಚರಣ್ ಸೋಷಿಯಲ್ ಮೀಡಿಯಾ ಪೋಸ್ಟ್
ವಿಶ್ವದ ನಂಬರ್ ಒನ್ ಕ್ರಿಕೆಟ್ ಬೌಲರ್ ಬುಮ್ರಾರನ್ನು ಫುಟ್ಬಾಲ್ ಆಟಗಾರ ಎಂದು ಕರೆದ ಈ ವಿಡಿಯೋ ತುಣುಕು ಕ್ಷಣಾರ್ಧದಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಮೀಮ್ಸ್ಗಳ ಪ್ರವಾಹವೇ ಹರಿಯಿತು. ತಕ್ಷಣವೇ ಎಚ್ಚೆತ್ತುಕೊಂಡ ರಾಮ್ ಚರಣ್ ತಮ್ಮ ಎಕ್ಸ್ (X) ಖಾತೆಯಲ್ಲಿ ಬರೆದುಕೊಂಡು ಕ್ಷಮೆ ಕೇಳಿದ್ದಾರೆ.
ಅಯ್ಯೋ… ನನಗೆ ಕೆಲವು ಬಾರಿ ಹೆಸರುಗಳ ವಿಷಯದಲ್ಲಿ ತುಂಬಾ ಮರೆತುಹೋಗುವ ಅಭ್ಯಾಸವಿದೆ. ವೇದಿಕೆಯ ಮೇಲಿನ ಗಡಿಬಿಡಿ ಮತ್ತು ಜನರ ಉತ್ಸಾಹದ ಮಧ್ಯೆ ನಡೆದ ಈ ಎಡವಟ್ಟಿಗೆ ಜಸ್ಪ್ರೀತ್ ಬುಮ್ರಾ ಜೀ ಅವರಲ್ಲಿ ಕ್ಷಮೆ ಕೇಳುತ್ತೇನೆ. ನೀವು ಕ್ರೀಡಾಂಗಣದಲ್ಲಿ ಬ್ಯಾಟರ್ಗಳನ್ನು ಕಂಗಾಲುಗೊಳಿಸಿ ಪ್ರತಿ ಭಾರತೀಯನೂ ಹೆಮ್ಮೆ ಪಡುವಂತೆ ಮಾಡುತ್ತೀರಿ, ಎಂದು ರಾಮ್ ಚರಣ್ ಗೌರವಪೂರ್ವಕವಾಗಿ ಟ್ವೀಟ್ ಮಾಡಿದ್ದಾರೆ.
