ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತದಲ್ಲಿ ಕ್ರಿಕೆಟ್ ಕೇವಲ ಒಂದು ಆಟವಲ್ಲ, ಅದೊಂದು ಧರ್ಮ ಎಂಬ ಮಾತು ಮತ್ತೊಮ್ಮೆ ನಿಜವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿರುವ ಒಂದು ಹೃದಯಸ್ಪರ್ಶಿ ವಿಡಿಯೋದಲ್ಲಿ, ಡೆಲಿವರಿ ಮುಗಿಸಿದ ಯುವಕನೊಬ್ಬ ಅಲ್ಲೇ ಇದ್ದ ಕ್ರಿಕೆಟ್ ಬ್ಯಾಟ್ ಕಂಡು ತನ್ನ ಬಾಲ್ಯದ ನೆನಪುಗಳನ್ನು ಮರುಕಳಿಸಿಕೊಂಡಿದ್ದಾನೆ. ಬ್ಯಾಟ್ ಹಿಡಿದು ಕೆಲವು ಶಾಟ್ಗಳನ್ನು ಆಡಿ, ಕೊನೆಯಲ್ಲಿ ಆ ಬ್ಯಾಟ್ಗೆ ಭಾವುಕನಾಗಿ ಮುತ್ತಿಟ್ಟು ತನ್ನ ಕೆಲಸಕ್ಕೆ ಮುನ್ನಡೆದಿರುವ ಈ ಮುಗ್ಧ ದೃಶ್ಯ ಈಗ ಕೋಟಿಗಟ್ಟಲೆ ಜನರ ಮನ ಗೆದ್ದಿದೆ. ಯಾರೋ ಒಬ್ಬರು ಈ ಮುದ್ದಾದ ಕ್ಷಣವನ್ನು ರೆಕಾರ್ಡ್ ಮಾಡಿದ್ದು, ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.
https://www.instagram.com/reels/DYhwZ7zt4rp
ವಿಡಿಯೋ ವೀಕ್ಷಿಸಿದವರು ಇದನ್ನು “ಭಾರತೀಯರ ಕ್ರಿಕೆಟ್ ಪ್ರೇಮದ ಪರಮೋಚ್ಚ ಕ್ಷಣ” ಎಂದು ಕರೆಯುತ್ತಿದ್ದಾರೆ. ಕ್ರಿಕೆಟ್ ಭಾರತದಲ್ಲಿ ದೈನಂದಿನ ಜೀವನದೊಂದಿಗೆ ಎಷ್ಟು ಆಳವಾಗಿ ಬೆಸೆದುಕೊಂಡಿದೆ ಎಂಬುದನ್ನು ಈ ಕ್ಷಣ ಅಚ್ಚುಕಟ್ಟಾಗಿ ಬಿಂಬಿಸುತ್ತದೆ ಎಂದು ಅನೇಕರು ಹೇಳಿದ್ದರೆ, ಇನ್ನು ಕೆಲವರು ಆ ಡೆಲಿವರಿ ಬಾಯ್ನ ಮುಗ್ಧ ಸಂತೋಷ ಮತ್ತು ಆಟದ ಮೇಲಿನ ಉತ್ಸಾಹವನ್ನು ಮೆಚ್ಚಿಕೊಂಡಿದ್ದಾರೆ.
ಆ ಹುಡುಗನಿಗೆ ಕ್ರಿಕೆಟರ್ ಆಗೋಕೆ ಇಷ್ಟ ಇತ್ತೇನೋ ಆದ್ರೆ ಅನಿವಾರ್ಯ ಅಂತ ಡೆಲಿವರಿ ಬಾಯ್ ಕೆಲಸ ಮಾಡ್ತಾ ಇರ್ಬೋದು ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಜನರ ಹೃದಯವನ್ನು ಕರಗಿಸಿದೆ.
ಒಂದು ಸಾಮಾನ್ಯ ಡೆಲಿವರಿ ಸ್ಟಾಪ್, ಭಾರತದ ಮೂಲೆ ಮೂಲೆಯಲ್ಲೂ ಕ್ರಿಕೆಟ್ ಹೇಗೆ ಜೀವಂತವಾಗಿದೆ ಎಂಬುದನ್ನು ತೋರಿಸುವ ಒಂದು ವೈರಲ್ ಕ್ಷಣವಾಗಿ ಬದಲಾಗಿದೆ.
