ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಸುಗಂಧ ದ್ರವ್ಯದ ಜಾಹೀರಾತಿನಲ್ಲಿ ಮಹಿಳೆಯರ ಬಗ್ಗೆ ಪ್ರಚೋದನಾತ್ಮಕ ಮತ್ತು ಅವಹೇಳನಕಾರಿಯಾಗಿ ತೋರಿಸಿದ ಆರೋಪ ಕೇಳಿ ಬಂದ ಹಿನ್ನೆಲೆ ಆ ಜಾಹೀರಾತನ್ನು ಕೂಡಲೇ ಅಮಾನತುಗೊಳಿಸಲು ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯ ಆದೇಶಿಸಿದೆ.
ಮಹಿಳೆಯರನ್ನು ಅವಹೇಳನಕಾರಿಯಾಗಿ ತೋರಿಸಲಾದ ಜಾಹೀರಾತಿನ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ಆಕ್ರೋಶ ವ್ಯಕ್ತವಾಗಿದೆ. ಇದು ಗಮನಕ್ಕೆ ಬಂದ ಕೆಲವೇ ಗಂಟೆಗಳಲ್ಲಿ ಕೇಂದ್ರ ಸರ್ಕಾರ ಈ ಕ್ರಮಕೈಗೊಂಡಿದೆ.ಜಾಹೀರಾತಿನ ವಿಡಿಯೋವನ್ನು ತಕ್ಷಣವೇ ತೆಗೆದು ಹಾಕುವಂತೆ ಟ್ವಿಟರ್ ಮತ್ತು ಯೂಟ್ಯೂಬ್ಗೂ ಪತ್ರ ಬರೆದು ಸಚಿವಾಲಯ ಸೂಚಿಸಿದೆ.ಅಲ್ಲದೇ, ಜಾಹೀರಾತು ಕೋಡ್ನ ಪ್ರಕಾರ ತನಿಖೆಯನ್ನೂ ಪ್ರಾರಂಭಿಸಿದೆ.
ಅಡ್ವರ್ಟೈಸಿಂಗ್ ಸ್ಟ್ಯಾಂಡರ್ಡ್ ಕೌನ್ಸಿಲ್ ಆಫ್ ಇಂಡಿಯಾ (ಎಎಸ್ಸಿಐ) ಕೂಡ ಈ ಬಗ್ಗೆ ಟ್ವೀಟ್ ಮಾಡಿದೆ. ಈ ಜಾಹೀರಾತು ಎಎಸ್ಸಿಐ ಕಾಯ್ದೆಯ ಗಂಭೀರ ಉಲ್ಲಂಘನೆ ಮತ್ತು ಸಾರ್ವಜನಿಕ ಹಿತಾಸಕ್ತಿಗಳಿಗೆ ವಿರುದ್ಧವಾಗಿದೆ. ಹೀಗಾಗಿ, ಇದರ ಬಗ್ಗೆ ತಕ್ಷಣ ಕ್ರಮಕೈಗೊಳ್ಳಲಾಗಿದೆ. ಈ ಜಾಹೀರಾತನ್ನು ಅಮಾನತುಗೊಳಿಸುವಂತೆ ಜಾಹೀರಾತುದಾರರಿಗೆ ಸೂಚಿಸಲಾಗಿದೆ. ಜೊತೆಗೆ ಈ ಕುರಿತು ತನಿಖೆಯನ್ನೂ ನಡೆಸಲಾಗುತ್ತಿದೆ ಎಂದು ತಿಳಿಸಿದೆ.
ಈ ಜಾಹೀರಾತಿನಲ್ಲಿ ಏನಿದೆ? :
ಸುಗಂಧ ದ್ರವ್ಯದ ‘ಶಾಟ್’ ಎಂಬ ಬ್ರಾಂಡ್ನ ಜಾಹೀರಾತು ಆಗಿದೆ. ಶಾಪಿಂಗ್ ಮಾಲ್ನಲ್ಲಿ ಓರ್ವ ಮಹಿಳೆಯ ಹಿಂದೆ ನಾಲ್ವರು ಪುರುಷರು ನಿಂತಿರುತ್ತಾರೆ. ಆಗ ಆ ಪುರುಷರು ನಾವು ನಾಲ್ವರು ಇದ್ದೇವೆ. ಇದು (ಶಾಟ್ ಸುಗಂಧ ದ್ರವ್ಯ) ಒಂದೇ ಇದೆ. ಇದನ್ನು ಯಾರು ತೆಗೆದುಕೊಳ್ಳುತ್ತಾರೆ ಅಂತಾರೆ.ಹೀಗಾಗಿ, ಅಲ್ಲಿದ್ದ ಮಹಿಳೆ ತಕ್ಷಣ ಆಘಾತಕ್ಕೊಳಗಾಗುತ್ತಾಳೆ. ಅಷ್ಟರಲ್ಲೇ ನಾಲ್ವರಲ್ಲಿ ಒಬ್ಬ ರ್ಯಾಕ್ನಲ್ಲಿದ್ದ ಒಂದು ‘ಶಾಟ್’ ಬಾಟಲಿಯನ್ನು ತೆಗೆದುಕೊಳ್ಳುತ್ತಾನೆ. ಆದ್ದರಿಂದ ಜಾಹೀರಾತಿನಲ್ಲಿ ಆ ಮಹಿಳೆಯನ್ನೇ ಉದ್ದೇಶಿಸಿ ಇದನ್ನು ತೋರಿಸಿದಂತಾಗಿದೆ ಎಂಬ ಆರೋಪ ಕೇಳಿ ಬಂದಿದೆ. ಅಲ್ಲದೇ, ಇದು ಅತ್ಯಾಚಾರಕ್ಕೆ ಉತ್ತೇಜಿಸಿದಂತೆ ಆಗಿದೆ ಎಂದೂ ನೆಟಿಜನ್ಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.