ಇಂದಿನ ಡಿಜಿಟಲ್ ಯುಗದಲ್ಲಿ ತಡರಾತ್ರಿಯವರೆಗೆ ಮೊಬೈಲ್ ಸ್ಕ್ರಾಲ್ ಮಾಡುವುದು, ವೆಬ್ ಸೀರೀಸ್ ನೋಡುವುದು ಅಥವಾ ಕೆಲಸ ಮಾಡುವುದು ಒಂದು ಹವ್ಯಾಸವಾಗಿ ಮಾರ್ಪಟ್ಟಿದೆ. “ನಾನು ರಾತ್ರಿ 2 ಗಂಟೆಗೆ ಮಲಗಿ ಬೆಳಿಗ್ಗೆ 9 ಗಂಟೆಗೆ ಏಳುತ್ತೇನೆ, ದಿನಕ್ಕೆ 7 ಗಂಟೆ ನಿದ್ರೆ ಮುಗಿಯುತ್ತದಲ್ಲವೇ?” ಎಂದು ಅನೇಕರು ಭಾವಿಸುತ್ತಾರೆ. ಆದರೆ ಬರಿ ನಿದ್ರೆಯ ಗಂಟೆಗಳು ಮುಖ್ಯವಲ್ಲ, ಮಲಗುವ ಸಮಯ ಕೂಡ ಅಷ್ಟೇ ಮುಖ್ಯ. ರಾತ್ರಿ 12ರ ನಂತರ ಮಲಗುವುದರಿಂದ ನಮ್ಮ ದೇಹದ ನೈಸರ್ಗಿಕ ಜೈವಿಕ ಗಡಿಯಾರ ಸಂಪೂರ್ಣವಾಗಿ ಹದಗೆಡುತ್ತದೆ. ಇದರಿಂದ ದೇಹದ ಮೇಲಾಗುವ ಗಂಭೀರ ದುಷ್ಪರಿಣಾಮಗಳನ್ನು ಪ್ರತಿಯೊಬ್ಬರೂ ತಿಳಿಯಲೇಬೇಕು.
ರೋಗನಿರೋಧಕ ಶಕ್ತಿ ಕ್ಷೀಣಿಸುತ್ತದೆ
ನಾವು ರಾತ್ರಿ ಗಾಢ ನಿದ್ರೆಯಲ್ಲಿದ್ದಾಗ ನಮ್ಮ ದೇಹವು ‘ಸೈಟೊಕಿನ್ಸ್’ ಎಂಬ ಪ್ರೊಟೀನ್ಗಳನ್ನು ಬಿಡುಗಡೆ ಮಾಡುತ್ತದೆ. ಇವು ಸೋಂಕು ಮತ್ತು ಉರಿಯೂತದ ವಿರುದ್ಧ ಹೋರಾಡಲು ನೆರವಾಗುತ್ತವೆ. ತಡವಾಗಿ ಮಲಗುವುದರಿಂದ ಈ ಪ್ರೊಟೀನ್ಗಳ ಉತ್ಪತ್ತಿ ಕಡಿಮೆಯಾಗಿ, ದೇಹವು ಪದೇ ಪದೇ ಕೆಮ್ಮು, ನೆಗಡಿ ಮತ್ತು ಕಾಲೋಚಿತ ಜ್ವರಕ್ಕೆ ತುತ್ತಾಗುತ್ತದೆ.
ಮಧುಮೇಹ ಮತ್ತು ಹೃದಯದ ಕಾಯಿಲೆಗಳ ಅಪಾಯ
ಮಧ್ಯರಾತ್ರಿಯ ನಂತರ ಮಲಗುವವರಲ್ಲಿ ಇನ್ಸುಲಿನ್ ಕಾರ್ಯಕ್ಷಮತೆ ಕಡಿಮೆಯಾಗುತ್ತದೆ. ಇದು ರಕ್ತದಲ್ಲಿ ಸಕ್ಕರೆಯ ಮಟ್ಟವನ್ನು ಹೆಚ್ಚಿಸಿ ಮಧುಮೇಹಕ್ಕೆ ಕಾರಣವಾಗುತ್ತದೆ. ಜತೆಗೆ, ತಡರಾತ್ರಿಯ ವರೆಗೆ ಎದ್ದಿರುವುದರಿಂದ ರಕ್ತದೊತ್ತಡ ಹೆಚ್ಚಾಗಿ, ಭವಿಷ್ಯದಲ್ಲಿ ಹೃದಯಾಘಾತದಂತಹ ಗಂಭೀರ ಕಾಯಿಲೆಗಳ ಅಪಾಯ ದುಪ್ಪಟ್ಟಾಗುತ್ತದೆ.
ತೂಕ ಹೆಚ್ಚಳ ಮತ್ತು ಬೊಜ್ಜು
ತಡವಾಗಿ ಮಲಗುವಾಗ ದೇಹದಲ್ಲಿ ಹಸಿವನ್ನು ನಿಯಂತ್ರಿಸುವ ‘ಲೆಪ್ಟಿನ್’ ಮತ್ತು ‘ಗ್ರೆಲಿನ್’ ಎಂಬ ಹಾರ್ಮೋನ್ಗಳ ಸಮತೋಲನ ಏರುಪೇರಾಗುತ್ತದೆ. ಪರಿಣಾಮವಾಗಿ, ರಾತ್ರಿ 12ರ ನಂತರ ಜಂಕ್ ಫುಡ್ ಅಥವಾ ಹೈ-ಕ್ಯಾಲೋರಿ ಸ್ನ್ಯಾಕ್ಸ್ ತಿನ್ನುವ ಹಂಬಲ ಹೆಚ್ಚಾಗುತ್ತದೆ. ಇದು ದೇಹದಲ್ಲಿ ಕೊಬ್ಬು ಶೇಖರಣೆಯಾಗಲು ಮತ್ತು ಬೊಜ್ಜು ಬೆಳೆಯಲು ನೇರ ಕಾರಣವಾಗುತ್ತದೆ.
ಮಾನಸಿಕ ಒತ್ತಡ, ಆತಂಕ ಮತ್ತು ಖಿನ್ನತೆ
ಮೆದುಳಿನ ಹಾರ್ಮೋನ್ಗಳಾದ ಸೆರೊಟೋನಿನ್ ಮತ್ತು ಡೋಪಮೈನ್ ಉತ್ಪತ್ತಿಗೆ ರಾತ್ರಿಯ ಆಳವಾದ ನಿದ್ರೆ ಅಗತ್ಯ. ತಡವಾಗಿ ಮಲಗುವುದರಿಂದ ಮೆದುಳಿಗೆ ಸರಿಯಾದ ವಿಶ್ರಾಂತಿ ಸಿಗದೆ ಹಾರ್ಮೋನ್ ವ್ಯತ್ಯಾಸವಾಗುತ್ತದೆ. ಇದು ಮರುದಿನ ಚಿತ್ತವಿಕಲತೆ, ಅತಿಯಾದ ಕೋಪ, ನಿರಂತರ ಆತಂಕ ಮತ್ತು ದೀರ್ಘಕಾಲದಲ್ಲಿ ತೀವ್ರ ಖಿನ್ನತೆಗೆ ದಾರಿ ಮಾಡಿಕೊಡುತ್ತದೆ.
ಚರ್ಮದ ಸೌಂದರ್ಯ ಮತ್ತು ಕೂದಲು ಉದುರುವಿಕೆ
ರಾತ್ರಿ 11 ರಿಂದ 2 ಗಂಟೆಯ ಅವಧಿಯಲ್ಲಿ ಚರ್ಮದ ಕೋಶಗಳು ಪುನಶ್ಚೇತನಗೊಳ್ಳುತ್ತವೆ. ತಡವಾಗಿ ಮಲಗುವುದರಿಂದ ಕಣ್ಣಿನ ಸುತ್ತ ಕಪ್ಪು ವರ್ತುಲಗಳು, ಮುಖದ ಮೇಲೆ ಸುಕ್ಕುಗಳು ಮೂಡುವುದು ಮತ್ತು ಅಕಾಲಿಕ ವಯಸ್ಸಾಗುವಿಕೆಯ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಅಲ್ಲದೆ, ನೆತ್ತಿಯ ಭಾಗಕ್ಕೆ ರಕ್ತಸಂಚಲನ ಸರಿಯಾಗಿ ಆಗದೆ ಕೂದಲು ತೀವ್ರವಾಗಿ ಉದುರಲಾರಂಭಿಸುತ್ತದೆ.
ಜ್ಞಾಪಕ ಶಕ್ತಿ ಮತ್ತು ಏಕಾಗ್ರತೆಯ ಕೊರತೆ
ನಾವು ಮಲಗಿದಾಗ ಮೆದುಳು ಹಗಲಿನಲ್ಲಿ ಕಲಿತ ವಿಷಯಗಳನ್ನು ವ್ಯವಸ್ಥಿತವಾಗಿ ಶೇಖರಿಸಿಟ್ಟುಕೊಳ್ಳುತ್ತದೆ. ತಡವಾಗಿ ಮಲಗುವುದರಿಂದ ಮೆದುಳಿನ ಕಾರ್ಯಕ್ಷಮತೆ ಮಂದಗತಿಯಾಗುತ್ತದೆ. ಇದರಿಂದಾಗಿ ಮರುದಿನ ಕೆಲಸದ ಮೇಲೆ ಗಮನ ಹರಿಸಲು ಸಾಧ್ಯವಾಗುವುದಿಲ್ಲ ಮತ್ತು ಸಣ್ಣಪುಟ್ಟ ವಿಷಯಗಳನ್ನೂ ಮರೆಯುವ ಜ್ಞಾಪಕ ಶಕ್ತಿಯ ದೋಷ ಕಾಣಿಸಿಕೊಳ್ಳುತ್ತದೆ.
