ಮಹಿಳೆಯರ ಒಟ್ಟಾರೆ ಆರೋಗ್ಯ ಮತ್ತು ಸೃಷ್ಟಿಯ ಮೂಲಕ್ಕೆ ಗರ್ಭಕೋಶದ ಆರೋಗ್ಯವೇ ಪ್ರಮುಖ ಆಧಾರ. ಆದರೆ ಇತ್ತೀಚಿನ ಬದಲಾದ ಜೀವನಶೈಲಿ, ಅಸಮತೋಲಿತ ಆಹಾರ ಪದ್ಧತಿ ಮತ್ತು ಹಾರ್ಮೋನ್ಗಳ ಏರುಪೇರಿನಿಂದಾಗಿ ಯುವತಿಯರಿಂದ ಹಿಡಿದು ಮಧ್ಯವಯಸ್ಕ ಮಹಿಳೆಯರವರೆಗೆ ಗರ್ಭಕೋಶದ ಸಮಸ್ಯೆಗಳು ಗಣನೀಯವಾಗಿ ಹೆಚ್ಚುತ್ತಿವೆ. ಫೈಬ್ರಾಯ್ಡ್ ಗಡ್ಡೆಗಳು, ಪಿಸಿಓಡಿ, ಅನಿಯಮಿತ ಮುಟ್ಟು ಮತ್ತು ಅತಿಯಾದ ರಕ್ತಸ್ರಾವದಂತಹ ಸಮಸ್ಯೆಗಳು ಇಂದು ಲಕ್ಷಾಂತರ ಮಹಿಳೆಯರ ನೆಮ್ಮದಿ ಕೆಡಿಸುತ್ತಿವೆ. ದುರದೃಷ್ಟವಶಾತ್, ಅನೇಕ ಮಹಿಳೆಯರು ಇಂತಹ ಲಕ್ಷಣಗಳನ್ನು ಆರಂಭದಲ್ಲಿ ಸಾಮಾನ್ಯ ನೋವು ಎಂದು ನಿರ್ಲಕ್ಷಿಸಿ, ಸಮಸ್ಯೆ ಗಂಭೀರ ರೂಪ ಪಡೆದಾಗ ಆಸ್ಪತ್ರೆಗೆ ಧಾವಿಸುತ್ತಾರೆ. ಗರ್ಭಕೋಶದ ಸಮಸ್ಯೆಗಳ ಆರಂಭಿಕ ಮುನ್ಸೂಚನೆಗಳು ಯಾವುವು ಎಂಬುದನ್ನು ತಿಳಿಯೋಣ.
ಗರ್ಭಕೋಶದ ಸಮಸ್ಯೆಗಳ ಆರಂಭಿಕ ಮುನ್ಸೂಚನೆಗಳು:
ಋತುಚಕ್ರದ ದಿನಾಂಕಗಳು ಪದೇ ಪದೇ ಬದಲಾಗುವುದು, ಮುಟ್ಟು ತಡವಾಗಿ ಆಗುವುದು ಅಥವಾ ತಿಂಗಳಿಗೆ ಎರಡು ಬಾರಿ ಆಗುವುದು ಗರ್ಭಕೋಶದ ದೋಷದ ಪ್ರಮುಖ ಸುಳಿವೂ ಆಗಿದೆ.
ಮುಟ್ಟಿನ ದಿನಗಳಲ್ಲಿ ಅಸಾಮಾನ್ಯವಾಗಿ ಅತಿ ಹೆಚ್ಚು ರಕ್ತಸ್ರಾವವಾಗುವುದು ಅಥವಾ ದೀರ್ಘಕಾಲದವರೆಗೆ (7 ದಿನಗಳಿಗಿಂತ ಹೆಚ್ಚು) ಮುಟ್ಟು ಮುಂದುವರಿಯುವುದು ಫೈಬ್ರಾಯ್ಡ್ ಗಡ್ಡೆಗಳ ಲಕ್ಷಣವಿರಬಹುದು.
ಅತಿಯಾದ ಬಿಳಿ ಅಥವಾ ಹಳದಿ ಬಣ್ಣದ ಸ್ರಾವವಾಗುವುದು, ಅದರಲ್ಲಿ ರಕ್ತದ ಅಂಶ ಇರುವುದು ಅಥವಾ ತೀವ್ರ ದುರ್ವಾಸನೆ ಬರುವುದು ಗರ್ಭಕೋಶದ ಸೋಂಕನ್ನು ಸೂಚಿಸುತ್ತದೆ.
ಮುಟ್ಟಿನ ಸಮಯವಲ್ಲದಿದ್ದರೂ ಕೆಳಹೊಟ್ಟೆ ಹಾಗೂ ಸೊಂಟದ ಭಾಗದಲ್ಲಿ ಸದಾ ಭಾರವಾದ ಅನುಭವ, ಎಳೆಯುವಂತಹ ನೋವು ಅಥವಾ ತೀವ್ರ ಅಸ್ವಸ್ಥತೆ ಉಂಟಾಗುವುದು.
ಪ್ರತಿ ತಿಂಗಳು ಮುಟ್ಟಿನ ಸಮಯದಲ್ಲಿ ತಡೆದುಕೊಳ್ಳಲು ಸಾಧ್ಯವಾಗದಷ್ಟು ಅಸಹಜ ಹೊಟ್ಟೆನೋವು ಕಾಣಿಸಿಕೊಳ್ಳುವುದು ಎಂಡೊಮೆಟ್ರಿಯೊಸಿಸ್ ಸಮಸ್ಯೆಯ ಮುನ್ಸೂಚನೆಯಾಗಿದೆ.
ಗರ್ಭಕೋಶದಲ್ಲಿ ಗಡ್ಡೆಗಳಾದಾಗ (Fibroids) ಅವು ಮೂತ್ರಕೋಶದ ಮೇಲೆ ಒತ್ತಡ ಹೇರುತ್ತವೆ. ಇದರಿಂದ ಪದೇ ಪದೇ ಮೂತ್ರ ವಿಸರ್ಜನೆಯಾಗುವುದು ಅಥವಾ ಮೂತ್ರ ತಡೆ ಹಿಡಿಯಲು ಕಷ್ಟವಾಗುವುದು ಕಂಡುಬರುತ್ತದೆ.
ಹಾರ್ಮೋನ್ಗಳ ಏರುಪೇರಿನಿಂದ ಅಂಡಾಶಯದಲ್ಲಿ ಸಣ್ಣ ಸಣ್ಣ ನೀರ್ಗುಳ್ಳೆಗಳು ಕಾಣಿಸಿಕೊಳ್ಳುವುದು. ಇದು ಗರ್ಭಕೋಶದ ಆರೋಗ್ಯದ ಮೇಲೂ ಪ್ರಭಾವ ಬೀರುತ್ತದೆ.
