ಹೊಸದಿಗಂತ ಡಿಜಿಟಲ್ ಡೆಸ್ಕ್ :
ಭಾರತ ಕಂಡ ಶ್ರೇಷ್ಠ ಉದ್ಯಮಿಗಳ ಪೈಕಿ ಒಬ್ಬರಾದ ಮತ್ತು ಮಹೀಂದ್ರ ಅಂಡ್ ಮಹೀಂದ್ರ ಗ್ರೂಪ್ನ ಮಾಜಿ ಅಧ್ಯಕ್ಷರಾದ ಕೇಶುಬ್ ಮಹೀಂದ್ರ ಏಪ್ರಿಲ್ 12, ಬುಧವಾರದಂದು ನಿಧನರಾಗಿದ್ದಾರೆ.
99 ವರ್ಷದ ಕೇಶಬ್ ಮಹೀಂದ್ರ ನಿಧನರಾದರೆಂದು ಬಾಹ್ಯಾಕಾಶ ಇಲಾಖೆಯ ಇನ್ಸ್ಪೇಸ್ ಸಂಸ್ಥೆಯ (INSPACe) ಛೇರ್ಮನ್ ಪವನ್ ಕೆ ಗೋಯೆಂಕಾ ಇಂದು ತಮ್ಮ ಟ್ವೀಟ್ಮೂಲಕ ತಿಳಿಸಿದ್ದಾರೆ.
ಫೋರ್ಬ್ಸ್ನ ಅತ್ಯಂತ ಹಿರಿಯ ವಯಸ್ಸಿನ ಬಿಲಿಯನೇರ್ಗಳ ಪಟ್ಟಿಯಲ್ಲಿ ಕೇಶಬ್ ಅಗ್ರಸ್ಥಾನ ಪಡೆದಿದ್ದರು. ಇವರ ನಿಧನಕ್ಕೆ ಸಂತಾಪ ವ್ಯಕ್ತಪಡಿಸಿದ ಪವನ್ ಗೋಯಂಕಾ, ಔದ್ಯಮಿಕ ಜಗತ್ತು ಇವತ್ತು ಅತ್ಯುತ್ತಮ ವ್ಯಕ್ತಿತ್ವವನ್ನು ಕಳೆದುಕೊಂಡಿತು ಎಂದು ಹೇಳಿದ್ದಾರೆ. ಕಂಪನಿಯ ವಕ್ತಾರರು ಪ್ರತ್ಯೇಕವಾಗಿ ಸುದ್ದಿಯನ್ನು ಖಚಿತಪಡಿಸಿದ್ದಾರೆ.
ಮಹೀಂದ್ರ ಅಂಡ್ ಮಹೀಂದ್ರ ಗ್ರೂಪ್ನ ಹಾಲಿ ಛೇರ್ಮನ್ ಆನಂದ್ ಮಹೀಂದ್ರ ಕುಟುಂಬ ವರ್ಗದ ಹಿರಿಯರಾದ ಕೇಶಬ್ ಮಹೀಂದ್ರ 1947ರಲ್ಲಿ ಈ ಕಂಪನಿಗೆ ಸೇರಿದ್ದರು. 1963ರಲ್ಲಿ ಅವರು ಛೇರ್ಮನ್ ಆದರು. ಅಮೆರಿಕದ ಪೆನ್ಸಿಲ್ವೇನಿಯಾ ಯೂನಿವರ್ಸಿಟಿಯಲ್ಲಿ ಪದವಿ ಪಡೆದ ಅವರು ಸಾಯುವ ಮುನ್ನ ಸಂಸ್ಥೆಯ ಗೌರವ ಛೇರ್ಮನ್ ಸ್ಥಾನದಲ್ಲಿ ಮುಂದುವರಿದಿದ್ದರು.