ಹೊಸದಿಗಂತ ಡಿಜಿಟಲ್‌ ಡೆಸ್ಕ್
ಸೋಷಿಯಲ್‌ ಮಿಡಿಯಾ ಪ್ಲಾಟ್‌ಫಾರ್ಮ್‌ ಟಿಕ್‌ ಟಾಕ್‌ ನಲ್ಲಿ 95 ಸಾವಿರಕ್ಕೂ ಹೆಚ್ಚು ಅನುಯಾಯಿಗಳನ್ನು ಹೊಂದಿರುವ ಪ್ರಸಿದ್ಧ ತಾರೆ ತಾನ್ಯಾ ಪರ್ದಾಜಿ(21) ಸ್ಕೈ ಡೈವಿಂಗ್ ಅಪಘಾತದಲ್ಲಿ ಸಾವನ್ನಪ್ಪಿದ್ದಾರೆ. ಆಕಾಶದಿಂದ ಜಿಗಿಯುವಾಗ ತಾನ್ಯಾ ಪ್ಯಾರಾಚೂಟ್ ಅನ್ನು ತಡವಾಗಿ ತೆಗೆದಿದ್ದಾರೆ. ಈ ವೇಳೆ ನೆಲಕ್ಕೆ ಅಪ್ಪಳಿಸಿ ದುರಂತ ಸಾವು ಕಂಡಿದ್ದಾರೆ.
ದುರದೃಷ್ಟಕರ ಅಪಘಾತ ಸಂಭವಿಸಿದಾಗ ಇದು ತಾನ್ಯಾ ಅವರ ಮೊದಲ ಏಕವ್ಯಕ್ತಿ ಸ್ಕೈಡೈವಿಂಗ್ ಕೋರ್ಸ್ ಆಗಿತ್ತು. ಕೆನಡಾದ ಒಂಟಾರಿಯೊದಲ್ಲಿ ಈ ದುರಂತ ನಡೆದಿದೆ. ತಾನ್ಯಾ ಪ್ಯಾರಾಚ್ಯೂಟ್‌ ಅನ್ನು ನಿಧಾನವಾಗಿ ತೆರೆದಿದ್ದಾಳೆ. ಆದ್ದರಿಂದ ಪ್ಯಾರಾಚ್ಯೂಟ್‌ ಸರಿಯಾಗಿ ಬಿಚ್ಚಿಕೊಂಡಿಲ್ಲ. ಆಕೆಯಿದ್ದ ಪ್ಯಾರಾಚೂಟ್ 4,000 ಅಡಿಗಳಿಂದ ನೇರವಾಗಿ ನೆಲಕ್ಕೆ ಅಪ್ಪಿಳಿಸಿದೆ.
ಕೂಡಲೇ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ ಆಕೆ ಆ ವೇಳೆಗೆ ಮೃತಪಟ್ಟಿದ್ದಳು ಎಂದು ತಿಳಿದುಬಂದಿದೆ.
ತಾನ್ಯ ಬಹುಮುಖ ಪ್ರತಿಭೆಯಾಗಿದ್ದರು. ಸ್ಕಾರ್ಬರೋದ ಟೊರೊಂಟೊ ವಿಶ್ವವಿದ್ಯಾಲಯದಲ್ಲಿ ತತ್ವಶಾಸ್ತ್ರದ ವಿದ್ಯಾರ್ಥಿನಿಯಾಗಿದ್ದಳು. ತನ್ನ ಕಾಲೇಜಿನ ಚೀರ್‌ಲೀಡಿಂಗ್ ತಂಡದ ಅವಿಭಾಜ್ಯ ಅಂಗವಾಗಿದ್ದಳು. ತಾನ್ಯಾ 2017 ರಲ್ಲಿಮಿಸ್ ಕೆನಡಾ ಸೌಂದರ್ಯ ಸ್ಪರ್ಧೆಯ ಸೆಮಿ-ಫೈನಲಿಸ್ಟ್‌ಗಳಲ್ಲಿ ಒಬ್ಬರಾಗಿದ್ದರು. ಅವಳು ಮನೋವಿಜ್ಞಾನದಲ್ಲಿ ಹೆಚ್ಚು ಆಸಕ್ತಿ ಹೊಂದಿದ್ದಳು. ಜೊತೆಗೆ ಕೆನಡಾದಲ್ಲಿ ವ್ಯಾಪಕವಾಗಿ ಜನಪ್ರಿಯವಾದ ಟಿಕ್‌ಟಾಕ್ ನಲ್ಲಿ ಸುಮಾರು 95 ಸಾವಿರ ಅನುಯಾಯಿಗಳನ್ನು ಮತ್ತು 2 ಮಿಲಿಯನ್ ಲೈಕ್‌ಗಳನ್ನು ಹೊಂದಿದ್ದಾಳೆ.
ಅಭಿಮಾನಿಗಳು ತಾನ್ಯಾ ಅಕಾಲಿಕ ಸಾವಿಗೆ ಶೋಕಿಸುತ್ತಿದ್ದಾರೆ. ಆಕೆಯ ಸ್ನೇಹಿತರು ʼಆಕೆ ಪ್ರತಿ ಸೆಕೆಂಡ್‌ ಅನ್ನೂ ಸಹ ಸಂಪೋರ್ಣವಾಗಿ ಆನಂದಿಸುತ್ತಾ ಬದುಕಿದ ವ್ಯಕ್ತಿ ಅವಳುʼ ಎಂದು ನೆನಪಿಸಿಕೊಳ್ಳುತ್ತಾರೆ.
