ಹೊಸ ದಿಗಂತ ಡಿಜಿಟಲ್ ಡೆಸ್ಕ್:
ಉದ್ಯೋಗಕ್ಕಾಗಿ ನಗದು ಹಗರಣದಲ್ಲಿ ತನ್ನ ಹೆಸರನ್ನು ಆರೋಪಿಸಿದ ಆಮ್ ಆದ್ಮಿ ಪಕ್ಷದ ಸಂಸದ ಸಂಜಯ್ ಸಿಂಗ್ ವಿರುದ್ದ 100 ಕೋಟಿ ರೂಪಾಯಿ ನಷ್ಟ ಪರಿಹಾರ ಕೋರಿ ಸಿಎಂ ಪ್ರಮೋದ್ ಸಾವಂತ್ ಪತ್ನಿ ಸುಲಕ್ಷಣಾ ಸಾವಂತ್ ಸಲ್ಲಿಸಿದ್ದ ಮಾನನಷ್ಟ ಮೊಕದ್ದಮೆಗೆ ಸಂಬಂಧಿಸಿದಂತೆ ಗೋವಾದ ನ್ಯಾಯಾಲಯ (Goa Court) ಮಂಗಳವಾರ ಸಂಜಯ್ ಸಿಂಗ್ ಅವರಿಗೆ ನೋಟಿಸ್ ಜಾರಿ ಮಾಡಿದೆ.
ರಾಜ್ಯಸಭಾ ಸದಸ್ಯರಾಗಿರುವ ಸಿಂಗ್ ಅವರು ಇತ್ತೀಚೆಗೆ ದೆಹಲಿಯಲ್ಲಿ ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿದ್ದರು, ಅಲ್ಲಿ ಅವರು ಗೋವಾ ಸಿಎಂ ಪ್ರಮೋದ್ ಸಾವಂತ್ ಅವರ ಪತ್ನಿ ಸುಲಕ್ಷಣಾ ಸಾವಂತ್ ವಿರುದ್ಧ ಆರೋಪ ಮಾಡಿದರು.
ಇದರಿಂದ ಉತ್ತರ ಗೋವಾದ ಬಿಚೋಲಿಮ್ನಲ್ಲಿರುವ ಸಿವಿಲ್ ನ್ಯಾಯಾಲಯದಲ್ಲಿ ಸುಲಕ್ಷಣಾ ಸಾವಂತ್ ದೂರು ದಾಖಲಿಸಿದ್ದಾರೆ. ಹಾಂಗಾಮಿ ಸಿವಿಲ್ ನ್ಯಾಯಾಧೀಶರು ಮೊಕದ್ದಮೆಯನ್ನು ಆಲಿಸಿ, ಸಂಜಯ್ ಸಿಂಗ್ ಅವರಿಗೆ ನೋಟಿಸ್ ನೀಡಿದ್ದು, ಜನವರಿ 10, 2025 ರೊಳಗೆ ಉತ್ತರವನ್ನು ನ್ಯಾಯಾಲಯ ಕೇಳಿದೆ.
ಮಾನಹಾನಿಕರ ವೀಡಿಯೊ, ಲೇಖನ ಮತ್ತು ಸಂದರ್ಶನವು ಸುಳ್ಳು, ಸತ್ಯವನ್ನು ಆಧರಿಸಿಲ್ಲ ಮತ್ತು ಬೇಷರತ್ ಕ್ಷಮೆಯಾಚಿಸುವಂತೆ ಸಿಂಗ್ ಅವರಿಗೆ ಕ್ಷಮಾಪಣೆಯನ್ನು ಪ್ರಕಟಿಸುವಂತೆ ನಿರ್ದೇಶಿಸುವಂತೆ ಸುಲಕ್ಷಣಾ ಸಾವಂತ್ ಅವರು ತಮ್ಮ ವಕೀಲರ ಮೂಲಕ ನ್ಯಾಯಾಲಯವನ್ನು ಕೋರಿದರು. ಇದರ ನಡುವೆ ಸಾಮಾಜಿಕ ಜಾಲತಾಣವಾದ ವಾಟ್ಸಾಪ್, ಫೇಸ್ಬುಕ್, ಯೂಟ್ಯೂಬ್ ಮತ್ತು ಟ್ವಿಟರ್ನಂತಹ ಇತರ ಪ್ಲಾಟ್ಫಾರ್ಮ್ಗಳಲ್ಲಿ ನಿಷೇಧಾಜ್ಞೆ ಮೂಲಕ ತನ್ನನ್ನು ನಿಂದಿಸುವ ಯಾವುದೇ ಸಾರ್ವಜನಿಕ ಹೇಳಿಕೆಗಳನ್ನು ನೀಡದಂತೆ ಸಿಂಗ್ ಅವರನ್ನು ನಿರ್ಬಂಧಿಸಬೇಕೆಂದು ದೂರುದಾರರು ನ್ಯಾಯಾಲಯವನ್ನು ಒತ್ತಾಯಿಸಿದ್ದಾರೆ.
ಗೋವಾ ಸರ್ಕಾರದಲ್ಲಿ ಉದ್ಯೋಗ ಕಲ್ಪಿಸುವುದಾಗಿ ಭರವಸೆ ನೀಡಿದ ಕೆಲವರಿಗೆ ಲಕ್ಷಗಟ್ಟಲೇ ಹಣ ನೀಡುವಂತೆ ಒತ್ತಾಯಿಸಿದ್ದಾರೆ ಎಂದು ಆರೋಪಿಸಿ ಹಲವು ಆಕಾಂಕ್ಷಿಗಳು ಗೋವಾದಾದ್ಯಂತ ದೂರು ದಾಖಲಿಸಿದ್ದರು.
