ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಎಚ್1ಬಿ ವೀಸಾ ನಿಯಮ ಪರ ಒಲವು ವ್ಯಕ್ತಪಡಿಸಿದ್ದಾರೆ.
ಪದಗ್ರಹಣದ ಬಳಿಕ ವಿಶ್ವದ ಕೆಲ ಪ್ರಮುಖ ಉದ್ಯಮಿಗಳೊಂದಿಗೆ ಶ್ವೇತಭವನದಲ್ಲಿ ಜಂಟಿ ಸುದ್ದಿಗೋಷ್ಠಿ ಉದ್ದೇಶಿಸಿ ಮಾತನಾಡುತ್ತಿದ್ದ ಅವರು, ಎಚ್1ಬಿ ವೀಸಾ ಯೋಜನೆಯಿಂದ ದೇಶಕ್ಕೆ ಗುಣಮಟ್ಟದ ಕೆಲಸಗಾರರು ಬರಲು ಸಾಧ್ಯವಾಗುತ್ತೆ ಎಂದು ಹೇಳಿದ್ದಾರೆ.
ಅಮೆರಿಕಕ್ಕೆ ಉತ್ಕೃಷ್ಟ ಎಂಜಿನಿಯರುಗಳು ಮಾತ್ರವಲ್ಲ, ಎಲ್ಲಾ ಸ್ತರಗಳಿಂದಲೂ ಗುಣಮಟ್ಟದ ಕೆಲಸಗಾರರು ಬರುವಂತಾಗಬೇಕು ಎಂಬುದು ಅವರ ಅನಿಸಿಕೆ. ‘ನನಗೆ ಎರಡೂ ಕಡೆಯ ವಾದದಲ್ಲಿ ಒಪ್ಪಿಗೆ ಇದೆ. ಆದರೆ, ನಮ್ಮ ದೇಶಕ್ಕೆ ಸ್ಪರ್ಧಾತ್ಮಕ ಜನರು ಬರಬೇಕೆಂದು ಬಯಸುತ್ತೇನೆ. ಇತರ ಜನರಿಗೆ ಅವರು ಬಂದು ತರಬೇತಿ ಕೊಡುತ್ತಾರೆಂದೂ ಸರಿ. ನನಗೆ ಇದನ್ನು (ಎಚ್1ಬಿ ವೀಸಾ) ನಿಲ್ಲಿಸುವುದು ಬೇಕಿಲ್ಲ. ಎಂಜಿನಿಯರುಗಳಿಗೆ ಮಾತ್ರವೇ ಈ ವಲಸೆ ಸೀಮಿತವಾಗದೆ, ಎಲ್ಲಾ ಮಟ್ಟದ ವ್ಯಕ್ತಿಗಳೂ ಬರುವಂತಾಗಬೇಕು’ ಎಂದು ಟ್ರಂಪ್ ಅಭಿಪ್ರಾಯಪಟ್ಟಿದ್ದಾರೆ.
ನನಗೆ ಎಚ್1ಬಿ ವೀಸಾ ಯೋಜನೆ ಬಗ್ಗೆ ಚೆನ್ನಾಗಿ ಗೊತ್ತಿದೆ. ನಾನೂ ಕೂಡ ಇದನ್ನು ಬಳಸುತ್ತೇನೆ. ವೈನ್ ಎಕ್ಸ್ಪರ್ಟ್ಸ್, ಒಳ್ಳೆಯ ವೇಟರ್ಸ್ ಹೀಗೆ ಅತ್ಯುತ್ತಮ ಕೆಲಸಗಾರರನ್ನು ಕರೆಸಬಹುದು. ಲ್ಯಾರಿಯಂತಹ ಜನರಿಗೆ ಉತ್ತಮ ಎಂಜಿನಿಯರುಗಳ ಅಗತ್ಯ ಇದೆ ಎಂದು ಟ್ರಂಪ್ ಹೇಳಿದ್ದಾರೆ.
ಡೊನಾಲ್ಡ್ ಟ್ರಂಪ್ ಅವರ ಜೊತೆ ಜಂಟಿ ಸುದ್ದಿಗೋಷ್ಠಿಯಲ್ಲಿ ಒರೇಕಲ್ ಸಿಟಿಒ ಲ್ಯಾರಿ ಎಲಿಸನ್, ಸಾಫ್ಟ್ಬ್ಯಾಂಕ್ ಸಿಇಒ ಮಸಾಯೋಶಿ ಸೋನ್, ಓಪನ್ ಎಐ ಸಿಇಒ ಸ್ಯಾಮ್ ಆಲ್ಟ್ಮ್ಯಾನ್ ಅವರೂ ಇದ್ದರು.
ಎಚ್-1ಬಿ ವೀಸಾ ಪರವಾಗಿ ಮಾತನಾಡಿದ ಇಲಾನ್ ಮಸ್ಕ್
ಡೊನಾಲ್ಡ್ ಟ್ರಂಪ್ ಅವರ ಬೆಂಬಲಿಗರಲ್ಲಿ ಪ್ರಮುಖರಾಗಿರುವ, ಮತ್ತು ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿ ಎನಿಸಿರುವ ಉದ್ಯಮಿ ಇಲಾನ್ ಮಸ್ಕ್ ಅವರು ಎಚ್1ಬಿ ವೀಸಾ ಯೋಜನೆಯನ್ನು ಬಲವಾಗಿ ಸಮರ್ಥಿಸಿದ್ದಾರೆ. ಈ ರೀತಿಯ ವೀಸಾ ವ್ಯವಸ್ಥೆ ಮೂಲಕ ಅರ್ಹ ಟೆಕ್ ವೃತ್ತಿಪರರನ್ನು ನೇಮಕ ಮಾಡಿಕೊಳ್ಳಲು ಸಾಧ್ಯ ಎಂದಿದ್ದಾರೆ.
ಸ್ಟೇಸ್ ಎಕ್ಸ್, ಟೆಸ್ಲಾ ಹಾಗೂ ಇತರ ನೂರಾರು ಕಂಪನಿಗಳನ್ನು ಕಟ್ಟಲು ನನ್ನನ್ನೂ ಒಳಗೊಂಡಂತೆ ಹಲವು ವ್ಯಕ್ತಿಗಳು ಅಮೆರಿಕಕ್ಕೆ ಬರಲು ಮತ್ತು ಈ ದೇಶವನ್ನು ಬಲಶಾಲಿಯಾಗಿ ಮಾಡಲು ಕಾರಣವಾಗಿರುವುದೇ ಎಚ್1ಬಿ ಎಂದು ಮಸ್ಕ್ ತಿಳಿಸಿದ್ದಾರೆ.