ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಇತ್ತೀಚಿನ ದಿನಗಳಲ್ಲಿ ಭಾರತ-ಪಾಕಿಸ್ತಾನ ಗಡಿಯಲ್ಲಿ ಭಾರತೀಯ ಸೇನೆ ಡ್ರೋನ್‌ಗಳನ್ನು ಹೊಡೆದುರುಳಿಸುವ ಘಟನೆಗಳು ಆಗಾಗ ನಡೆಯುತ್ತಿವೆ. ಪಾಕಿಸ್ತಾನದಿಂದ ಭಾರತದ ವಾಯುಪ್ರದೇಶಕ್ಕೆ ಡ್ರೋನ್‌ಗಳ ನುಸುಳುವಿಕೆ ಹೆಚ್ಚಾಗಿದೆ. ನಮ್ಮ ಸೇನೆ ಡ್ರೋನ್ ಅತಿಕ್ರಮ ಪ್ರವೇಶವನ್ನು ಗ್ರಹಿಸಿ ಪರಿಣಾಮಕಾರಿಯಾಗಿ ನಾಶಪಡಿಸುತ್ತಿದೆ. ಗಡಿ ಭದ್ರತಾ ಪಡೆಗಳಿಗೆ ಇದೊಂದು ನಿರಂತರ ಕೆಲಸವಾಗಿದೆ.
ಈ ಕ್ರಮದಲ್ಲಿ, ಭಾರತೀಯ ವಾಯುಪ್ರದೇಶವನ್ನು ಪ್ರವೇಶಿಸುವ ಯಾವುದೇ ಡ್ರೋನ್ ಅನ್ನು ನಾಶಮಾಡಲು ಭಾರತೀಯ ಸೇನೆಯು ವಿನೂತನ ವಿಧಾನವನ್ನು ಅಳವಡಿಸಿಕೊಳ್ಳುತ್ತಿದೆ. ಡ್ರೋನ್‌ಗಳನ್ನು ಹೊಡೆದುರುಳಿಸಲು ಹದ್ದು ಹಾಗೂ ಗಿಡುಗಗಳಿಗೆ ತರಬೇತಿ ನೀಡಲಾಗುತ್ತಿದೆ. ಡ್ರೋನ್‌ಗಳನ್ನು ನಿಯಂತ್ರಿಸಲು ಗಿಡುಗ ಮತ್ತು ಹದ್ದು ಬಳಸುತ್ತಿರುವುದು ಇದೇ ಮೊದಲು.
ಪ್ರಸ್ತುತ ಉತ್ತರಾಖಂಡದಲ್ಲಿ, ಭಾರತ ಮತ್ತು ಯುನೈಟೆಡ್ ಸ್ಟೇಟ್ಸ್ ನಡೆಸಿದ ಜಂಟಿ ಮಿಲಿಟರಿ ವ್ಯಾಯಾಮದ ಭಾಗವಾಗಿ ಗಿಡುಗಗಳು ಡ್ರೋನ್‌ಗಳನ್ನು ನಾಶಪಡಿಸುವ ಪ್ರದರ್ಶನವನ್ನು ಪ್ರದರ್ಶಿಸಿವೆ. ಸೇನಾ ಸಿಬ್ಬಂದಿ ಗಾಳಿಯಲ್ಲಿ ಡ್ರೋನ್ ಹಾರಿಸಿದ್ದು, ಸೇನಾ ಶ್ವಾನವೊಂದು ಅದನ್ನು ಪತ್ತೆ ಹಚ್ಚಿ ಸಿಬ್ಬಂದಿಗೆ ಎಚ್ಚರಿಕೆ ನೀಡಿದೆ.
ತಕ್ಷಣವೇ, ಸಿಬ್ಬಂದಿ ತಮ್ಮ ತರಬೇತಿ ಪಡೆದ ಅರ್ಜುನ್ ಎಂಬ ಹದ್ದನ್ನು ಡ್ರೋನ್ ಕಡೆಗೆ ಹಾರಿಸಿದರು ಅರ್ಜುನ್ ಡ್ರೋನ್ ಅನ್ನು ಗುರುತಿಸಿ ಮತ್ತು ಅದನ್ನು ಯಶಸ್ವಿಯಾಗಿ ಹೊಡೆದುರುಳಿಸಿತು. ಭಾರತೀಯ ಸೇನೆಯು ಡ್ರೋನ್‌ಗಳನ್ನು ಪತ್ತೆಹಚ್ಚಲು ಹದ್ದು, ಗಿಡುಗಗಳಿಗೆ ಮಾತ್ರವಲ್ಲದೆ ನಾಯಿಗಳಿಗೂ ತರಬೇತಿ ನೀಡಿದೆ. ಇನ್ನು ಮುಂದೆ ಭಾರತದ ವಾಯುಪ್ರದೇಶವನ್ನು ಪ್ರವೇಶಿಸುವ ಯಾವುದೇ ಡ್ರೋನ್ ಅನ್ನುನಮ್ಮ ಪಕ್ಷಿಗಳ ಪ್ರತಿಭೆಯಿಂದ ಗುರುತಿಸಿ ನಾಶಪಡಿಸುವುದು ಖಚಿತ.
