ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಪಂಜಾಬ್ ಪೊಲೀಸರು ಖಲಿಸ್ತಾನಿ ನಾಯಕ ಅಮೃತ್ಪಾಲ್ ಸಿಂಗ್ ಬಂಧನಕ್ಕಾಗಿ ಹುಡುಕುತ್ತಿದ್ದರೆ, ಇತ್ತ ದೆಹಲಿಯ ರಸ್ತೆಗಳಲ್ಲಿ ಸನ್ಗ್ಲಾಸ್, ಡೆನ್ಹಿಮ್ ಜಾಕೆಟ್ ಹಾಕಿಕೊಂಡು ಭರ್ಜರಿಯಾಗಿ ಓಡಾಟ ನಡೆಸುತ್ತಿದ್ದಾನೆ ಎಂದು ದೇಶಿಯ ಮಾಧ್ಯಮಗಳು ವರದಿ ಮಾಡಿವೆ.
ಯಾರಿಗೂ ಗುರುತು ಸಿಗುವುದಿಲ್ಲ ಎಂಬ ವಿಶ್ವಾಸದಲ್ಲಿನಡೆಯುತ್ತಿದ್ದಾನೆ. ಜತೆಗೆ ಸಹಚರ ಪಾಪಲ್ಪ್ರೀತ್ ಸಿಂಗ್ ಕೂಡ ಇದ್ದಾನೆ. ಸಿಸಿ ಟಿವಿ ಕ್ಯಾಮೆರಾವೊಂದರಲ್ಲಿ ಆತ ಬಿಂದಾಸ್ ಆಗಿ ಬೀದಿ ಸುತ್ತುತ್ತಿರುವ ವಿಡಿಯೊ ಸೆರೆಯಾಗಿದೆ.
ಮಾರ್ಚ್ 18ರಂದು ಅಮೃತ್ಪಾಲ್ ಸಿಂಗ್ ಬಂಧನಕ್ಕೆ ದೊಡ್ಡ ಮಟ್ಟದ ಕಾರ್ಯಾಚರಣೆ ನಡೆಸಿತ್ತು. 10 ದಿನಗಳಾದರೂ ಆತನ ಪತ್ತೆಯಿಲ್ಲ, ನೇಪಾಳದ ಮೂಲಕ ವಿದೇಶಕ್ಕೆ ಹಾರಿದ್ದಾನೆ, ಬಿಯರ್ ಕ್ಯಾನ್ ಹಿಡಿದುಕೊಂಡು ಆರಾಮಕ್ಕೆ ಇದ್ದಾನೆ ಎಂದೆಲ್ಲ ಹೇಳಲಾಗುತ್ತಿದ್ದರೂ ಪೊಲೀಸರಿಗೆ ಆತನ ಇರುವಿಕೆಯ ಬಗ್ಗೆ ಕಿಂಚಿತ್ತೂ ಮಾಹಿತಿ ಸಿಗುತ್ತಿಲ್ಲ. ಆದರೆ, ಇದೀಗ ಪೊಲೀಸರಿಗೆ ಅಮೃತ್ಪಾಲ್ನನ್ನು ದೆಹಲಿಯಲ್ಲಿ ಇದ್ದಿದ್ದು ವಿಡಿಯೊ ಫೂಟೇಜ್ ಮೂಲಕ ಗೊತ್ತಾಗಿದೆ.
ಪೊಲೀಸರು ಪಂಜಾಬ್ನಲ್ಲಿ ಅಮೃತ್ಪಾಲ್ಗಾಗಿ ಹುಡುಕುತ್ತಿರುವಾಗ ಆತ ನನ್ನ ಸಂಪರ್ಕಗಳನ್ನು ಬಳಸಿಕೊಂಡು ಹರಿಯಾಣದ ಕುರುಕ್ಷೇತ್ರದ ಮೂಲಕ ಡೆಲ್ಲಿ ತಲುಪಿರಬಹುದು ಎಂದು ಹೇಳಲಾಗುತ್ತಿದೆ. ಬಂದವನೇ ಮೊದಲು ತನ್ನ ಪ್ರಮುಖ ಗುರುತಾಗಿರುವ ಟರ್ಬನ್ ಕಿತ್ತು ಮೂಲೆಗಿಟ್ಟು ಚಂದದ ತಂಪುಕನ್ನಡಕ ಹಾಕಿಕೊಂಡು ಓಡಾಡುತ್ತಿದ್ದಾನೆ.
ಸೋಮವಾರ ಅಮೃತ್ಪಾಲ್ ಸಿಂಗ್ ಬಿಯರ್ ಟಿನ್ ಹಿಡಿದುಕೊಂಡು ಆರಾಮವಾಗಿ ಕುಳಿತಿರುವ ಫೋಟೋ ಒಂದು ಸೋಶಿಯಲ್ ಮೀಡಿಯಾಗಳಲ್ಲಿ ಹರಿದಾಡಿತ್ತು.
