ಇಂದಿನ ವೇಗದ ಜೀವನಶೈಲಿಯಲ್ಲಿ ಮಕ್ಕಳ ದೈಹಿಕ ಹಾಗೂ ಮಾನಸಿಕ ಆರೋಗ್ಯಕ್ಕೆ ಯೋಗ ಬಹಳ ಉಪಯುಕ್ತ. ಆದರೆ ಮಕ್ಕಳಿಗೆ ಯೋಗವನ್ನು “ಪಾಠ”ದಂತೆ ಅಲ್ಲ, “ಆಟ”ದಂತೆ ಪರಿಚಯಿಸಿದಾಗ ಮಾತ್ರ ಅವರು ಆಸಕ್ತಿಯಿಂದ ಕಲಿಯುತ್ತಾರೆ. ಸರಿಯಾದ ವಿಧಾನದಲ್ಲಿ ಯೋಗ ಅಭ್ಯಾಸ ಮಾಡಿಸಿದರೆ ಏಕಾಗ್ರತೆ, ಶಾಂತಿ ಮತ್ತು ದೇಹದ ಲವಚಿಕತೆ ಹೆಚ್ಚುತ್ತದೆ.
ಮೊದಲು ಮಕ್ಕಳಿಗೆ ಸರಳ ಆಸನಗಳಿಂದ ಆರಂಭಿಸಬೇಕು. ತಾಡಾಸನ, ವೃಕ್ಷಾಸನ, ಭುಜಂಗಾಸನದಂತಹ ಸುಲಭ ಆಸನಗಳನ್ನು ಕಲಿಸಿದರೆ ಅವರು ಬೇಗ ಅರ್ಥಮಾಡಿಕೊಳ್ಳುತ್ತಾರೆ. ಕಷ್ಟವಾದ ಆಸನಗಳನ್ನು ಮೊದಲೇ ಮಾಡಿಸಲು ಯತ್ನಿಸಬಾರದು.
ಯೋಗ ಸಮಯವನ್ನು ಆಟದ ಕ್ಷಣವನ್ನಾಗಿ ಮಾಡುವುದು ಮುಖ್ಯ. ಉದಾಹರಣೆಗೆ, ವೃಕ್ಷಾಸನವನ್ನು “ಮರದಂತೆ ನಿಲ್ಲೋ ಆಟ” ಎಂದು ಹೇಳಿದರೆ ಮಕ್ಕಳು ಆಸಕ್ತಿಯಿಂದ ಪ್ರಯತ್ನಿಸುತ್ತಾರೆ. ಪ್ರಾಣಿಗಳ ಹೆಸರಿನ ಆಸನಗಳು ಮಕ್ಕಳಿಗೆ ಇನ್ನಷ್ಟು ಮೋಜು ನೀಡುತ್ತವೆ.
ಇದನ್ನೂ ಓದಿ:
ಪ್ರತಿ ದಿನ ಒಂದೇ ಸಮಯದಲ್ಲಿ 10 ರಿಂದ 15 ನಿಮಿಷ ಯೋಗ ಅಭ್ಯಾಸ ಮಾಡಿಸುವುದು ಒಳ್ಳೆಯದು. ಬೆಳಿಗ್ಗೆ ಅಥವಾ ಸಂಜೆ ಶಾಂತ ವಾತಾವರಣದಲ್ಲಿ ಮಾಡಿಸಿದರೆ ಮಕ್ಕಳ ಮನಸ್ಸು ಹೆಚ್ಚು ಕೇಂದ್ರೀಕರಿಸುತ್ತದೆ.
ಉಸಿರಾಟ ಅಭ್ಯಾಸಗಳನ್ನೂ ಸೇರಿಸಬೇಕು. ಆಳವಾಗಿ ಉಸಿರೆಳೆಯುವುದು ಮತ್ತು ನಿಧಾನವಾಗಿ ಬಿಡುವುದನ್ನು ಕಲಿಸಿದರೆ ಮಕ್ಕಳಲ್ಲಿ ಒತ್ತಡ ಕಡಿಮೆಯಾಗುತ್ತದೆ ಹಾಗೂ ಮನಸ್ಸು ಶಾಂತವಾಗಿರುತ್ತದೆ.
ಪೋಷಕರು ಮಕ್ಕಳ ಜೊತೆಯಲ್ಲೇ ಯೋಗ ಮಾಡಿದರೆ ಅವರು ಇನ್ನಷ್ಟು ಪ್ರೇರೇಪಿತರಾಗುತ್ತಾರೆ. ಇದರಿಂದ ಯೋಗವು ಒಂದು ಆರೋಗ್ಯಕರ ಕುಟುಂಬ ಅಭ್ಯಾಸವಾಗುತ್ತದೆ.
