ಮಣಿಪುರದಲ್ಲಿ ಇಂದು 2ನೇ ಹಂತದ ಮತದಾನ: 92 ಅಭ್ಯರ್ಥಿಗಳ ಭವಿಷ್ಯ ನಿರ್ಧಾರ

ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಮಣಿಪುರ ವಿಧಾನಸಭೆಗೆ ಎರಡನೇ ಹಾಗೂ ಕೊನೆಯ ಹಂತದ ಮತದಾನ ಪ್ರಕ್ರಿಯೆ ಇಂದು ನಡೆಯುತ್ತಿದೆ. 6 ಜಿಲ್ಲೆಗಳ, 22 ವಿಧಾನಸಭಾ ಕ್ಷೇತ್ರಗಳಲ್ಲಿ ಕಣದಲ್ಲಿರುವ ಒಟ್ಟು 92 ಅಭ್ಯರ್ಥಿಗಳ ಭವಿಷ್ಯ ಇಂದು ನಿರ್ಧಾರವಾಗಲಿದೆ.
ಬೆಳಗ್ಗೆ 7 ಗಂಟೆಯಿಂದ ಸಂಜೆ 4 ಗಂಟೆಯವರೆಗೆ ಮತದಾನ ನಡೆಯಲಿದೆ. ತೌಬಲ್​, ಚಾಂದೇಲ್​, ಉಕ್ರುಲ್​, ಸೇನಾಪಟಿ, ತಮೆಂಗ್ಲಾಂಗ್ ಮತ್ತು ಜಿರಿಬಾಮ್ ಜಿಲ್ಲೆಗಳಲ್ಲಿ 1242 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದ್ದು, 8.38 ಲಕ್ಷ ಜನರು ಮತದಾನದಲ್ಲಿ ಭಾಗಿಯಾಗಿಲಿದ್ದಾರೆ.
ಬಿಜೆಪಿ ಎಲ್ಲಾ ಕ್ಷೇತ್ರಗಳಲ್ಲಿ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದು, 22 ಅಭ್ಯರ್ಥಿಗಳು ಕಣದಲ್ಲಿದ್ದಾರೆ. ಕಾಂಗ್ರೆಸ್​​ನ 18, ನ್ಯಾಷನಲ್​ ಪೀಪಲ್​ ಪಾರ್ಟಿಯ 11, ಜನತಾ ದಳ(ಯುನೈಟೆಡ್​) ಮತ್ತು ನಾಗಾ ಪೀಪಲ್ಸ್​ ಫ್ರಂಟ್​​ನ 10, ಶಿವಸೇನೆ, ಎನ್‌ಸಿಪಿ, ಸಿಪಿಐ ಮತ್ತು 12 ಸ್ವಾತಂತ್ರ್ಯ ಅಭ್ಯರ್ಥಿಗಳು ಕಣದಲ್ಲಿದ್ದಾರೆ. ಮಣಿಪುರದಲ್ಲಿ ಮೊದಲ ಹಂತದ ಚುನಾವಣೆ ಫೆ 28 ರಂದು ನಡೆದಿತ್ತು.