ಗ್ವಾಲಿಯರ್‌ ಗೆ ಬಂದಿಳಿದಿವೆ ನಮೀಬಿಯಾದ ಚೀತಾಗಳು: ಕೂನೊ ಉದ್ಯಾನಕ್ಕೆ ಅವುಗಳನ್ನು ಬಿಡಲಿದ್ದಾರೆ ಪ್ರಧಾನಿ ಮೋದಿ

ಹೊಸದಿಗಂತ ಡಿಜಿಟಲ್ ಡೆಸ್ಕ್:‌

ಆಫ್ರಿಕಾದ ನಮೀಬಿಯಾದಿಂದ ಭಾರತಕ್ಕೆ ತರಿಸಿಕೊಳ್ಳಲಾಗುತ್ತಿರೋ 8 ಚೀತಾಗಳ ಮೊದಲ ಬ್ಯಾಚ್‌ ಅನ್ನು ಹೊತ್ತು ತರುತ್ತಿರೋ ವಿಶೇಷ ಕಾರ್ಗೋ ವಿಮಾನವು ಗ್ವಾಲಿಯರ್‌ ವಿಮಾನ ನಿಲ್ದಾಣಕ್ಕೆ ಬಂದಿಳಿದಿದೆ. ಉಪಗ್ರಹ ಕಾಲರ್‌ಗಳು ಮತ್ತು ಚಿರತೆಗಳನ್ನು ಅಳವಡಿಸಲಾಗಿರುವ ತಾಂತ್ರಿಕ ಸಾಧನಗಳ ಕಸ್ಟಮ್ಸ್ ಕ್ಲಿಯರೆನ್ಸ್ ಇರಲಿದ್ದು ಆನಂತರ ವಿಶೇಷ ಹೆಲಿಕಾಪ್ಟರ್ ಮೂಲಕ ಚಿರತೆಗಳನ್ನು ಕುನೊ ರಾಷ್ಟ್ರೀಯ ಉದ್ಯಾನವನಕ್ಕೆ ಕಳುಹಿಸಲಾಗುತ್ತದೆ.

ಇಂದು ಜನ್ಮದಿನವನ್ನು ಆಚರಿಸಿಕೊಳ್ಳುತ್ತಿರೋ ಭಾರತದ ಹೆಮ್ಮೆಯ ಪ್ರಧಾನಿ ನರೇಂದ್ರ ಮೋದಿಯವರು ನವದೆಹಲಿಯಿಂದ ಶಿಯೋಪುರ್ ಜಿಲ್ಲೆಯ ಕುನೊ ರಾಷ್ಟ್ರೀಯ ಉದ್ಯಾನವನಕ್ಕೆ ಆಗಮಿಸಲಿದ್ದು ಅಲ್ಲಿ ಅವರು 10.45 ರ ಸುಮಾರಿಗೆ ಚಿರತೆಗಳನ್ನು ಕ್ವಾರಂಟೈನ್ ಆವರಣಗಳಿಗೆ ಬಿಡಲಿದ್ದಾರೆ.

ಭಾರತದ ಪ್ರಾಣಿ ಪರಿಸರದಲ್ಲಿ ಕಣ್ಮರೆಯಾಗಿರುವ ಚೀತಾಗಳನ್ನು ಭಾರತದ ಪರಿಸರ ವ್ಯವಸ್ಥೆಯಲ್ಲಿ ಮರು ಪರಿಚಯಿಸುವ ಕಾರ್ಯದ ಭಾಗವಾಗಿ ಇಂದು ಮೊದಲ ಬ್ಯಾಚ್‌ ಆಗಮನವಾಗಿದೆ. ಇದು ಪರಿಸರ ವ್ಯವಸ್ಥೆಯ ಸಮತೋಲದಲ್ಲಿ ಸಹಕಾರಿಯಾಗುತ್ತದೆ ಎನ್ನಲಾಗಿದೆ.

ಕಾಗದ ಪತ್ರಗಳು ಸೇರಿದಂತೆ ಅಗತ್ಯ ಔಪಚಾರಿಕತೆಗಳ ನಂತರ ಗ್ವಾಲಿಯರ್‌ನಲ್ಲಿ ಚಿನೂಕ್ ಸೇರಿದಂತೆ ಎರಡು ಹೆಲಿಕಾಪ್ಟರ್‌ಗಳಲ್ಲಿ ಚಿರತೆಗಳನ್ನು ಶಿಯೋಪುರ್ ಜಿಲ್ಲೆಯ ಪಾಲ್ಪುರ್ ಗ್ರಾಮಕ್ಕೆ ಹಾರಿಸಲಾಗುತ್ತದೆ. ಪಾಲ್ಪುರ್‌ನಿಂದ ಚೀತಾಗಳನ್ನು ರಸ್ತೆಯ ಮೂಲಕ ಶಿಯೋಪುರ್ ಜಿಲ್ಲೆಯ ಕುನೊ ರಾಷ್ಟ್ರೀಯ ಉದ್ಯಾನವನಕ್ಕೆ (ಕೆಎನ್‌ಪಿ) ತರಲಾಗುತ್ತದೆ ಮತ್ತು ನಂತರ ಅಭಯಾರಣ್ಯದೊಳಗಿನ ಕ್ವಾರಂಟೈನ್ ಆವರಣಗಳಲ್ಲಿ ಬಿಡುಗಡೆ ಮಾಡಲಾಗುತ್ತದೆ.

ಕೂನೊ ಉದ್ಯಾನವೇ ಏಕೆ ?
ಮಧ್ಯಪ್ರದೇಶದ ವಿಶಾಲವಾದ ಅರಣ್ಯ ಭೂದೃಶ್ಯದಲ್ಲಿ 748 ಚದರ ಕಿಲೋಮೀಟರ್‌ಗಳಷ್ಟು ಹರಡಿರುವ ಕುನೋ ಪಾಲ್ಪುರ್ ರಾಷ್ಟ್ರೀಯ ಉದ್ಯಾನವು ಎಂಟು ಆಫ್ರಿಕನ್ ಚಿರತೆಗಳಿಗೆ ಶೀಘ್ರದಲ್ಲೇ ಹೊಸ ನೆಲೆಯಾಗಲಿದೆ. ಈ ಪ್ರದೇಶದಲ್ಲಿ ಯಾವುದೇ ಮಾನವ ವಸಾಹತುಗಳಿಲ್ಲ. ಅಲ್ಲದೇ ಈ ಪ್ರದೇಶವು ಕೊರಿಯಾದ ಸಾಲ್ ಕಾಡುಗಳಿಗೆ ಬಹಳ ಹತ್ತಿರದಲ್ಲಿದೆ, ಅಲ್ಲಿ ಸ್ಥಳೀಯ ಏಷ್ಯಾಟಿಕ್ ಚಿರತೆ ಸುಮಾರು 70 ವರ್ಷಗಳ ಹಿಂದೆ ಕೊನೆಯದಾಗಿ ಕಂಡುಬಂದಿತ್ತು ಎನ್ನಲಾಗಿದೆ. ಚೀತಾಗಳಿಗೆ ಅನುಕೂಲಕರವಾಗಿರುವ ವಾತಾವರಣವೂ ಇರುವುದರಿಂದ ಕುನೊ ಉದ್ಯಾನಕ್ಕೆ ಚಿರತೆಗಳನ್ನು ಬಿಡಲಾಗುತ್ತಿದೆ.

ಈ ಸುದ್ದಿಯನ್ನು ಇತರರ ಜೊತೆಗೂ ಹಂಚಿಕೊಳ್ಳಿ

LEAVE A REPLY

Please enter your comment!
Please enter your name here

error: Content is protected !!