ಹೊಸದಿಗಂತ ಡಿಜಿಟಲ್ ಡೆಸ್ಕ್:
ನೆಪೋಟಿಸಂ ಸಿನಿಮಾ ರಂಗದಲ್ಲಿ ಮುಗಿಯದ ಚರ್ಚೆ. ಸೆಲೆಬ್ರಿಟಿಗಳ ಮಕ್ಕಳಿಗೆ ಬೇಗ ಅವಕಾಶ ಸಿಗುತ್ತದೆ ಎಂದು ಅನೇಕರು ಬೊಬ್ಬೆ ಹೊಡೆಯುತ್ತಾರೆ. ಸ್ಯಾಂಡಲ್ವುಡ್, ಬಾಲಿವುಡ್ ಮಾತ್ರವಲ್ಲ ಹಾಲಿವುಡ್ ಮಂದಿ ಕೂಡ ಇದಕ್ಕೆ ಹೊರತಾಗಿಲ್ಲ.
ಹಾಲಿವುಡ್ನ ಖ್ಯಾತ ನಟ ಟಾಮ್ ಹ್ಯಾಂಕ್ಸ್ ಅವರು ಚಿತ್ರರಂಗದಲ್ಲಿ ತಮ್ಮದೇ ಛಾಪು ಮೂಡಿಸಿದ್ದಾರೆ. ಈಗ ಅವರ ಕಿರಿಯ ಪುತ್ರ ಟ್ರೂಮನ್ ಹ್ಯಾಂಕ್ಸ್ ಕೂಡ ಬಣ್ಣದ ಲೋಕಕ್ಕೆ ಎಂಟ್ರಿ ನೀಡಿದ್ದಾರೆ. ಅದರ ಇದೀಗ ನೆಪೋಟಿಸಂ ಟೀಕೆ ಜೋರಾಗಿದೆ.ಇದನ್ನು ಟಾಮ್ ಹ್ಯಾಂಕ್ಸ್ ಅವರು ಹೇಳಿಕೊಂಡಿದ್ದಾರೆ.
‘ಕಾಸ್ಟ್ ಅವೇ’, ‘ಫಾರೆಸ್ಟ್ ಗಂಪ್’, ‘ಸೇವಿಂಗ್ ಪ್ರೈವೇಟ್ ರಿಯಾನ್’ ಸೇರಿದಂತೆ ಹಲವು ಗಮನಾರ್ಹ ಸಿನಿಮಾ ನೀಡಿದ ಟಾಮ್ ಹ್ಯಾಂಕ್ಸ್ ಅವರಿಗೆ ಈಗ 66 ವರ್ಷ ವಯಸ್ಸು. ಇಂದಿಗೂ ಕೂಡ ಬಹುಬೇಡಿಕೆಯ ನಟನಾಗಿ ಟಾಮ್ ಹ್ಯಾಂಕ್ಸ್ ಗುರುತಿಸಿಕೊಂಡಿದ್ದಾರೆ.
ಇನ್ನು ಜನವರಿ 13ರಂದುಟಾಮ್ ಹ್ಯಾಂಕ್ಸ್ ನಟನೆಯ ಹೊಸ ಸಿನಿಮಾ ‘ಎ ಮ್ಯಾನ್ ಕಾಲ್ಡ್ ಆಟ್ಟೋ’ ಅಮೆರಿಕದ ಚಿತ್ರಮಂದಿರಗಳಲ್ಲಿ ರಿಲೀಸ್ ಆಗಲಿದೆ. ಈ ಸಿನಿಮಾಗೆ ಟಾಮ್ ಹ್ಯಾಂಕ್ಸ್ ನಿರ್ಮಾಪಕ ಕೂಡ ಹೌದು. ಅವರ ಕಿರಿಯ ಪುತ್ರ ಟ್ರೂಮನ್ ಹ್ಯಾಂಕ್ಸ್ ಅವರು ಈ ಚಿತ್ರದಲ್ಲಿ ನಟಿಸಿದ್ದಾರೆ. ಹಾಗಾಗಿ ನೆಪೋಟಿಸಂ ಟೀಕೆ ವ್ಯಕ್ತವಾಗಿದೆ. ಇದಕ್ಕೆ ಟಾಮ್ ಹ್ಯಾಂಕ್ಸ್ ಅವರು ತಮ್ಮದೇ ರೀತಿಯಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ.
ಇದು ನಮ್ಮ ಕುಟುಂಬದ ವ್ಯವಹಾರ. ಮೊದಲಿನಿಂದಲೂ ನಾವು ಇದನ್ನೇ ಮಾಡಿಕೊಂಡು ಬಂದಿದ್ದೇವೆ. ಇದರಲ್ಲೇ ನನ್ನೆಲ್ಲ ಮಕ್ಕಳು ದೊಡ್ಡವರಾಗಿದ್ದು. ನಮ್ಮದು ಪ್ಲಂಬಿಂಗ್ ಅಥವಾ ಹೂವಿನ ಬಿಸ್ನೆಸ್ ಆಗಿದ್ದರೆ ಅದರಲ್ಲೇ ನಮ್ಮ ಇಡೀ ಕುಟುಂಬ ತೊಡಗಿರುತ್ತಿತ್ತು ಎಂದು ಟಾಮ್ ಹ್ಯಾಂಕ್ಸ್ ಹೇಳಿದ್ದಾರೆ. ಸರ್ ನೇಮ್ ಯಾವುದು ಎಂಬುದು ಮುಖ್ಯ ಆಗುವುದಿಲ್ಲ. ಎಲ್ಲರೂ ಉತ್ತಮ ಕೆಲಸ ಮಾಡಲೇಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.