ಹೊಸದಿಗಂತ ವರದಿ ಮೈಸೂರು:
ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವದ ಸಂಭ್ರಮಕ್ಕೆ ಮತ್ತಷ್ಟು ಮೆರುಗು ನೀಡಿದ್ದ ಪಯಣ ಕಾರು ಸಂಗ್ರಹಾಲಯದ ‘ಪಯಣೋತ್ಸವ 2026’ ಸಾಂಸ್ಕೃತಿಕ ಕಾರ್ಯಕ್ರಮ ಯಶಸ್ವಿಯಾಗಿ ಮುಕ್ತಾಯಗೊಂಡಿದೆ. ಅಕ್ಟೋಬರ್ 11ರಿಂದ 19ರವರೆಗೆ ನಡೆದ 9 ದಿನಗಳ ಉತ್ಸವದಲ್ಲಿ ಸಂಗೀತ, ಜನಪದ ಕಲೆ, ವಾದ್ಯ ವೈಭವ ಹಾಗೂ ವರ್ಣರಂಜಿತ ಸಿಡಿಮದ್ದು ಪ್ರದರ್ಶನ ವೀಕ್ಷಕರ ಗಮನ ಸೆಳೆದವು.
ಮೈಸೂರು ಸಮೀಪದಲ್ಲಿರುವ ಪಯಣ ಕಾರು ಸಂಗ್ರಹಾಲಯದಲ್ಲಿ ನಡೆದ ಉತ್ಸವಕ್ಕೆ ಪ್ರತಿದಿನ ಸಾವಿರಾರು ವೀಕ್ಷಕರು ಭೇಟಿ ನೀಡಿದರು. ಅಪರೂಪದ ವಿಂಟೇಜ್ ಕಾರುಗಳ ವೀಕ್ಷಣೆಯ ಜೊತೆಗೆ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಆಸ್ವಾದಿಸುವ ಅವಕಾಶ ಪ್ರವಾಸಿಗರಿಗೆ ದೊರೆಯಿತು.
ಸಂಗೀತದ ರಸದೌತಣ
ಉತ್ಸವದ ಮೊದಲ ದಿನ ‘H2O’ ಬ್ಯಾಂಡ್ ತಂಡದ ಫ್ಯೂಷನ್ ವಾದ್ಯ ಸಂಗೀತ ಕಾರ್ಯಕ್ರಮ ಪ್ರೇಕ್ಷಕರನ್ನು ರಂಜಿಸಿತು. ಕರ್ನಾಟಕದ ಜನಪದ ಕಲಾ ಪರಂಪರೆಯನ್ನು ಪ್ರತಿನಿಧಿಸುವ ಡೊಳ್ಳು ಕುಣಿತ ಹಾಗೂ ವೀರಗಾಸೆ ಪ್ರದರ್ಶನಗಳು ಉತ್ಸವಕ್ಕೆ ವಿಶೇಷ ಕಳೆ ತಂದವು. ಕಲಾವಿದರ ಪ್ರದರ್ಶನಕ್ಕೆ ಪ್ರೇಕ್ಷಕರು ಉತ್ಸಾಹದಿಂದ ಸ್ಪಂದಿಸಿದರು.
ಉಳಿದ ದಿನಗಳಲ್ಲಿ ಕೀಬೋರ್ಡ್, ತಬಲಾ, ಸಿತಾರ್, ವೀಣೆ, ವಯೋಲಿನ್, ಕೊಳಲು ಮತ್ತು ಶೆಹನಾಯಿ ವಾದ್ಯಗಳ ನಾದ ಸಂಗ್ರಹಾಲಯದ ವಾತಾವರಣವನ್ನು ಸಂಗೀತಮಯವಾಗಿಸಿತು. ಬೆಂಗಳೂರಿನ ‘ಸೌತ್ ಸೈಡ್ ನಿರ್ವಾಣ’ ಫ್ಯೂಷನ್ ಬ್ಯಾಂಡ್ ತಂಡದ ಸಂಗೀತ ರಸಸಂಜೆಯೂ ಪ್ರೇಕ್ಷಕರನ್ನು ಮನರಂಜಿಸಿತು.
ಸಿಡಿಮದ್ದು ಪ್ರದರ್ಶನ ವಿಶೇಷ ಆಕರ್ಷಣೆ
ಈ ಬಾರಿಯ ಉತ್ಸವದಲ್ಲಿ ಸಂಗ್ರಹಾಲಯದ ಮುಂಭಾಗ ಆಯೋಜಿಸಿದ್ದ ವರ್ಣರಂಜಿತ ಸಿಡಿಮದ್ದು ಪ್ರದರ್ಶನ ವಿಶೇಷ ಆಕರ್ಷಣೆಯಾಯಿತು. ಆಕಾಶದಲ್ಲಿ ಮೂಡಿದ ಬಣ್ಣಬಣ್ಣದ ಚಿತ್ತಾರಗಳನ್ನು ವೀಕ್ಷಕರು ಕಣ್ತುಂಬಿಕೊಂಡರು. ಹಳೆಯ ಕಾರುಗಳ ಸೌಂದರ್ಯ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ ಸಿಡಿಮದ್ದು ಪ್ರದರ್ಶನವೂ ಉತ್ಸವದ ಸಂಭ್ರಮವನ್ನು ಹೆಚ್ಚಿಸಿತು.
ದಸರಾ ಸಂಭ್ರಮಕ್ಕೆ ಸಾಂಸ್ಕೃತಿಕ ಮೆರುಗು
9 ದಿನಗಳ ಕಾಲ ನಡೆದ ‘ಪಯಣೋತ್ಸವ 2026’ ವಿಂಟೇಜ್ ಕಾರುಗಳ ಪರಂಪರೆ ಮತ್ತು ಕರ್ನಾಟಕದ ಕಲಾ ವೈವಿಧ್ಯವನ್ನು ಒಂದೇ ವೇದಿಕೆಯಲ್ಲಿ ಪರಿಚಯಿಸಿತು. ಸಂಗೀತ, ಜನಪದ ಕಲೆ ಹಾಗೂ ಮನಮೋಹಕ ಪ್ರದರ್ಶನಗಳ ಮೂಲಕ ಸಾರ್ವಜನಿಕರ ಮೆಚ್ಚುಗೆ ಪಡೆದ ಉತ್ಸವವು ದಸರಾ ಪ್ರವಾಸಿಗರಿಗೆ ನೆನಪಿನಲ್ಲಿ ಉಳಿಯುವ ಅನುಭವ ನೀಡುವ ಮೂಲಕ ಯಶಸ್ವಿಯಾಗಿ ತೆರೆಕಂಡಿತು.
