ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಶಿವೇಲುಚ್ ಜ್ವಾಲಾಮುಖಿ ಸ್ಫೋಟಕ್ಕೆ ರಷ್ಯಾ ತತ್ತರಿಸಿದೆ. ಶಿವೆಲುಚ್ ವಿಶ್ವದ ಅತ್ಯಂತ ಸಕ್ರಿಯ ಜ್ವಾಲಾಮುಖಿಗಳಲ್ಲಿ ಒಂದಾಗಿದೆ. ಮಂಗಳವಾರ ಮುಂಜಾನೆ ಈ ಜ್ವಾಲಾಮುಖಿ ಸ್ಫೋಟಗೊಂಡಿದೆ ಎಂದು ರಷ್ಯಾದ ಅಧಿಕಾರಿಗಳು ಬಹಿರಂಗಪಡಿಸಿದ್ದಾರೆ. ಪೂರ್ವ ಕಮ್ಚಟ್ಕಾ ಪರ್ಯಾಯ ದ್ವೀಪದಲ್ಲಿರುವ ಈ ಜ್ವಾಲಾಮುಖಿಯು ಅಪಾರ ಪ್ರಮಾಣದ ಬೂದಿಯನ್ನು ಉಗುಳುತ್ತಿದೆ. ಸ್ಫೋಟದ ನಂತರ, ಬೂದಿ ಆಕಾಶಕ್ಕೆ ಹರಡಿತು. ಇದು ಮಧ್ಯರಾತ್ರಿ ಶುರುವಾದ ಜ್ವಾಲಾಮುಖಿ ಸುಮಾರು 6 ಗಂಟೆಗಳ ಕಾಲ ಸಕ್ರಿಯವಾಗಿತ್ತು ಎಂದು ರಷ್ಯಾ ಹೇಳಿದೆ.
ರಷ್ಯಾದ ಅಕಾಡೆಮಿ ಆಫ್ ಸೈನ್ಸಸ್ನ ಜಿಯೋಫಿಸಿಕಲ್ ಸಮೀಕ್ಷೆಯ ಕಮ್ಚಟ್ಕಾ ಶಾಖೆಯ ಪ್ರಕಾರ ಬೂದಿ ಮೋಡವು 108,000 ಚದರ ಕಿಲೋಮೀಟರ್ ಪ್ರದೇಶವನ್ನು ಆವರಿಸಿದೆ. ಸಮೀಪದ ಗ್ರಾಮಗಳಲ್ಲಿ ಜನಜೀವನ ಅಸ್ತವ್ಯಸ್ತಗೊಂಡಿದೆ. ದೊಡ್ಡ ಪ್ರದೇಶಗಳೆಲ್ಲವೂ ಬೂದಿಯಿಂದ ಮುಚ್ಚಿ ಹೋಗಿದೆ. ಜ್ವಾಲಾಮುಖಿಯಿಂದ ಲಾವಾ ಉಗುಳುವುದರಿಂದ ಹತ್ತಿರದ ಹಿಮ ಕರಗುತ್ತಿದೆ. ಮಣ್ಣು ಹರಿಯುವ ಸಾಧ್ಯತೆಯಿರುವುದರಿಂದ ಅಧಿಕಾರಿಗಳು ಎಚ್ಚರಿಕೆ ನೀಡಿದ್ದಾರೆ. ಸ್ಫೋಟದ ನಂತರ ವಿಮಾನಗಳಿಗೆ ರೆಡ್ ಅಲರ್ಟ್ ಕೊಡಲಾಗಿದೆ. ರಷ್ಯಾದ ವಾಯುಯಾನ ಪ್ರಾಧಿಕಾರ ರೊಸಾವಿಯಾಟ್ಸಿಯಾ ನಿಯಮಿತವಾಗಿ ಪರಿಸ್ಥಿತಿಯನ್ನು ಪರಿಶೀಲಿಸುತ್ತಿದೆ. ಬೂದಿ ಮೋಡಗಳು ಸುಮಾರು 15 ಕಿಮೀ ಎತ್ತರದವರೆಗೆ ಹರಡುವ ನಿರೀಕ್ಷೆಯಿರುವುದರಿಂದ ಅಂತರರಾಷ್ಟ್ರೀಯ ಮತ್ತು ಕಡಿಮೆ ಹಾರುವ ವಿಮಾನಗಳ ಮೇಲೆ ಪರಿಣಾಮ ಬೀರಬಹುದು ಎಂದು ಸರ್ಕಾರ ಎಚ್ಚರಿಸಿದೆ.
ಪ್ರಸ್ತುತ ಜ್ವಾಲಾಮುಖಿಯ ಸುತ್ತಲಿನ ಮೂರು ಹಳ್ಳಿಗಳು – ಕ್ಲೈಯುಚಿ, ಕೊಜಿರೆವ್ಸ್ಕ್ ಮತ್ತು ಮೆಸ್ಕೋಯ್ – ಹೆಚ್ಚು ಪರಿಣಾಮ ಬೀರುತ್ತವೆ. ಕಮ್ಚಟ್ಕಾ ಗವರ್ನರ್ ವ್ಲಾಡಿಮಿರ್ ಸೊಲೊಡೊವ್ ಜನರನ್ನು ಮನೆಯಲ್ಲಿಯೇ ಇರುವಂತೆ ಕೇಳಿಕೊಂಡರು. ಎರಡು ದಿನಗಳ ಕಾಲ ಶಾಲೆಗಳನ್ನು ಮುಚ್ಚುವುದಾಗಿ ಘೋಷಿಸಲಾಯಿತು. ಶಿವೆಲುಚ್ ಜ್ವಾಲಾಮುಖಿ 60,000-70,000 ವರ್ಷಗಳಷ್ಟು ಹಳೆಯದಾದ ಜ್ವಾಲಾಮುಖಿಯಾಗಿದೆ.
🌋 The mighty #Shiveluch volcano in Russia's Kamchatka has gone full eruption mode – volcanic ash emissions has reached 20km, right into the stratosphere. #HappeningNow
Gorgeous video of the ash cloud to remind us of the beauty and the force of nature 👇 pic.twitter.com/eQ6TNgfLR1
— Russia 🇷🇺 (@Russia) April 10, 2023