ನಾಲಿಗೆಗೆ ರುಚಿ ನೀಡುವ, ಕರುಮ್ ಕುರುಮ್ ಎಂದು ಸದ್ದು ಮಾಡುವ ಆಲೂಗಡ್ಡೆ ಚಿಪ್ಸ್ ಎಂದರೆ ಯಾರಿಗೆ ಇಷ್ಟವಿಲ್ಲ? ಆದರೆ, ದಿನಾಲೂ ಒಂದು ಪ್ಯಾಕೆಟ್ ಚಿಪ್ಸ್ ಖಾಲಿ ಮಾಡುವ ಅಭ್ಯಾಸ ನಿಮಗಿದ್ದರೆ, ನೀವು ‘ಆರೋಗ್ಯದ ಟೈಮ್ ಬಾಂಬ್’ ಮೇಲೆ ಕುಳಿತಿದ್ದೀರಿ ಎಂದೇ ಅರ್ಥ.
ಅತಿಯಾದ ಆಲೂಗಡ್ಡೆ ಚಿಪ್ಸ್ ಸೇವನೆಯಿಂದ ಆಗುವ ಪ್ರಮುಖ ಅಡ್ಡಪರಿಣಾಮಗಳು ಇಲ್ಲಿವೆ:
ಚಿಪ್ಸ್‌ಗಳಲ್ಲಿ ಕ್ಯಾಲರಿ ಮತ್ತು ಕೊಬ್ಬಿನಂಶ ಅತಿಯಾಗಿರುತ್ತದೆ. ಇದು ಅತಿ ವೇಗವಾಗಿ ದೇಹದ ತೂಕವನ್ನು ಹೆಚ್ಚಿಸಿ, ಬೊಜ್ಜು ಬೆಳೆಯಲು ಕಾರಣವಾಗುತ್ತದೆ.
ಇವುಗಳಲ್ಲಿ ಸ್ಯಾಚುರೇಟೆಡ್ ಫ್ಯಾಟ್ ಮತ್ತು ಟ್ರಾನ್ಸ್ ಫ್ಯಾಟ್ ಹೆಚ್ಚಿರುವುದರಿಂದ, ರಕ್ತದಲ್ಲಿನ ಕೆಟ್ಟ ಕೊಲೆಸ್ಟ್ರಾಲ್ ಮಟ್ಟ ಏರಿ ಹೃದಯಾಘಾತದ ಅಪಾಯವನ್ನು ಹೆಚ್ಚಿಸುತ್ತದೆ.
ಚಿಪ್ಸ್ ರುಚಿಯಾಗಿರಲು ಅತಿಯಾದ ಉಪ್ಪನ್ನು (ಸೋಡಿಯಂ) ಬಳಸಲಾಗುತ್ತದೆ. ಇದು ರಕ್ತದೊತ್ತಡವನ್ನು ಹೆಚ್ಚಿಸಿ ಕಿಡ್ನಿಗಳ ಮೇಲೂ ಒತ್ತಡ ಹೇರುತ್ತದೆ.
ಹೊಟ್ಟೆ ತುಂಬಿದ ಅನುಭವ ನೀಡಿದರೂ, ದೇಹಕ್ಕೆ ಬೇಕಾದ ಪ್ರೊಟೀನ್ ಅಥವಾ ವಿಟಮಿನ್ ಚೂರು ಕೂಡ ಇದರಲ್ಲಿ ಇರುವುದಿಲ್ಲ. ಇದನ್ನು ‘ಖಾಲಿ ಕ್ಯಾಲರಿ’ ಎನ್ನಲಾಗುತ್ತದೆ.
ಆಲೂಗಡ್ಡೆಯನ್ನು ಅತಿ ಹೆಚ್ಚಿನ ತಾಪಮಾನದಲ್ಲಿ ಕರಿದಾಗ ‘ಅಕ್ರಿಲಮೈಡ್’ ಎಂಬ ರಾಸಾಯನಿಕ ಬಿಡುಗಡೆಯಾಗುತ್ತದೆ. ಇದು ಕ್ಯಾನ್ಸರ್ ಕಾರಕವಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಎಚ್ಚರಿಸುತ್ತಾರೆ.
