ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌:
ಅಮೆರಿಕ ಸರ್ಕಾರವು ವಲಸಿಗರ ವೀಸಾದ ಕಾಲಾವಧಿಯನ್ನು ವಿಸ್ತರಿಸಿದೆ. ಈ ಮೂಲಕ ಗ್ರೀನ್ ಕಾರ್ಡ್‌ಗಳನ್ನು ಬಯಸುವವರು ಮತ್ತು ಪತಿ-ಪತ್ನಿಯ ಎಚ್-1ಬಿ ವೀಸಾ ಸೇರಿ ಕೆಲ ವಲಸಿಗರಿಗೆ ಕೆಲಸದ ಪರವಾನಗಿಯನ್ನು ಹೆಚ್ಚುವರಿ 18 ತಿಂಗಳವರೆಗೆ ಬಳಸಲು ಅನುಮತಿಸಲಾಗಿದೆ. ಇದರಿಂದ ಅಮೆರಿಕದಲ್ಲಿ ಕೆಲಸ ಮಾಡುವ ಸಾವಿರಾರು ಭಾರತೀಯರಿಗೆ ಅನುಕೂಲವಾಗಿದೆ.
ಜೋ ಬೈಡನ್ ಸರ್ಕಾರದ ಈ ಘೋಷಣೆಯ ಇಂದಿನಿಂದಲೇ (ಮೇ 4) ಜಾರಿಗೆ ಬಂದಿದೆ. ಹೆಚ್ಚುವರಿ 180 ದಿನಗಳೊಂದಿಗೆ ಈ ಕಾರ್ಡ್ಗಳ ಅವಧಿ 540 ದಿನಗಳಿಗೆ ಸ್ವಯಂಪ್ರೇರಿತವಾಗಿ ವಿಸ್ತರಣೆಯಾಗಲಿದೆ ಎಂದು ಗೃಹ ಭದ್ರತೆ ಇಲಾಖೆ ಹೇಳಿದೆ.
ಅಮೆರಿಕದ ಈ ಕ್ರಮದಿಂದ ಸುಮಾರು 87,000 ವಲಸಿಗರಿಗೆ ತಕ್ಷಣಕ್ಕೆ ಅನುಕೂಲವಾಗಿದೆ. 30 ದಿನಗಳಲ್ಲಿ ಕಾರ್ಡ್ ಅವಧಿ ಮುಗಿಯುವುದು ತಪ್ಪಲಿದೆ. ಅಲ್ಲದೇ, ಒಟ್ಟಾರೆಯಾಗಿ 4.20 ಲಕ್ಷ ಜನರಿಗೆ ಇದರಿಂದ ಸಹಾಯವಾಗಲಿದೆ.
ಗ್ರೀನ್ ಕಾರ್ಡ್ ಅಂದರೆ ಅಧಿಕೃತವಾಗಿ ಅನುಮತಿ ವಾಸದ ಕಾರ್ಡ್ ಎಂದೇ ಕರೆಯಲ್ಪಡುತ್ತದೆ. ಇದು ವಲಸಿಗರಿಗೆ ನೀಡಲಾದ ದಾಖಲೆಯಾಗಿದ್ದು, ಅಮೆರಿಕದಲ್ಲಿ ಶಾಶ್ವತವಾಗಿ ವಾಸಿಸುವ ಸವಲತ್ತು ನೀಡಲಾಗಿದೆ ಎಂಬುದಕ್ಕೆ ಇದು ಒಂದು ಸಾಕ್ಷಿ ಅಥವಾ ದಾಖಲೆಯಾಗಿದೆ.
