ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಆದಾಯ ತೆರಿಗೆ ರಿಟರ್ನ್ (ITR) ಸಲ್ಲಿಸುವ ಅವಧಿ ಹತ್ತಿರವಾಗುತ್ತಿದೆ. ಪ್ರಸಕ್ತ ಹಣಕಾಸು ವರ್ಷದ ತೆರಿಗೆ ಸಲ್ಲಿಕೆಗೆ ಜುಲೈ 31 ಅಂತಿಮ ದಿನವಾಗಿದ್ದು, ತೆರಿಗೆದಾರರು ತಕ್ಷಣವೇ ಕಾರ್ಯಪ್ರವೃತ್ತರಾಗಬೇಕಿದೆ. ಈ ಬಾರಿ ಗಡುವು ವಿಸ್ತರಣೆಯಾಗುವ ಮುನ್ಸೂಚನೆಗಳಿಲ್ಲದ ಕಾರಣ, ಕೊನೆಯ ಕ್ಷಣದವರೆಗೆ ಕಾಯುವುದು ಸೂಕ್ತವಲ್ಲ ಎಂದು ಆರ್ಥಿಕ ತಜ್ಞರು ಎಚ್ಚರಿಸಿದ್ದಾರೆ.
ಡೆಡ್ಲೈನ್ ಮಿಸ್ ಆದ್ರೆ ದಂಡ ಎಷ್ಟು?
ನಿಗದಿತ ಸಮಯದೊಳಗೆ ಐಟಿಆರ್ ಫೈಲ್ ಮಾಡದಿದ್ದರೆ, ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 234F ಅಡಿಯಲ್ಲಿ ವಿಳಂಬ ಶುಲ್ಕ (Late Fee) ಪಾವತಿಸಬೇಕಾಗುತ್ತದೆ. ಡಿಸೆಂಬರ್ 31ರ ಒಳಗೆ ವಿಳಂಬಿತ ರಿಟರ್ನ್ ಸಲ್ಲಿಸಲು ಅವಕಾಶವಿದ್ದರೂ, ಅದಕ್ಕೆ ಈ ಕೆಳಗಿನಂತೆ ಪೆನಾಲ್ಟಿ ಅನ್ವಯವಾಗುತ್ತದೆ:
- ರೂ. 5 ಲಕ್ಷಕ್ಕಿಂತ ಹೆಚ್ಚು ಆದಾಯ: ಜುಲೈ 31ರ ನಂತರ ರಿಟರ್ನ್ ಸಲ್ಲಿಸಿದರೆ ರೂ. 5,000 ದಂಡ ತೆರಬೇಕಾಗುತ್ತದೆ.
- ರೂ. 5 ಲಕ್ಷದವರೆಗಿನ ಆದಾಯ: ಸಣ್ಣ ಪ್ರಮಾಣದ ತೆರಿಗೆದಾರರಿಗೆ ಈ ವಿಳಂಬ ಶುಲ್ಕವನ್ನು ರೂ. 1,000 ಕ್ಕೆ ಸೀಮಿತಗೊಳಿಸಲಾಗಿದೆ.
- ವಿನಾಯಿತಿ ಮಿತಿಗಿಂತ ಕಡಿಮೆ ಆದಾಯ: ನಿಮ್ಮ ಒಟ್ಟು ಆದಾಯವು ತೆರಿಗೆ ವಿನಾಯಿತಿ ಮಿತಿಗಿಂತ ಒಳಗಿದ್ದರೆ, ಯಾವುದೇ ದಂಡ ಇರುವುದಿಲ್ಲ.
ಇತರ ನಷ್ಟಗಳು
ಕೇವಲ ದಂಡ ಮಾತ್ರವಲ್ಲದೆ, ತಡವಾಗಿ ಐಟಿಆರ್ ಸಲ್ಲಿಸುವುದರಿಂದ ಬಾಕಿ ಇರುವ ತೆರಿಗೆಯ ಮೇಲೆ ಹೆಚ್ಚಿನ ಬಡ್ಡಿ ಪಾವತಿಸಬೇಕಾಗಬಹುದು ಮತ್ತು ನಷ್ಟಗಳನ್ನು ಮುಂದಿನ ವರ್ಷಕ್ಕೆ ಕ್ಯಾರಿ ಫಾರ್ವರ್ಡ್ ಮಾಡಲು ಸಾಧ್ಯವಾಗುವುದಿಲ್ಲ. ಆದ್ದರಿಂದ ಇಂದೇ ನಿಮ್ಮ ITR ಫೈಲ್ ಮಾಡಿ ನಿಶ್ಚಿಂತರಾಗಿರಿ.
