ಬೆಳಗಿನ ಜಾವ ಬಿಸಿಬಿಸಿ ಟೀ ಜೊತೆ ಗರಿಗರಿಯಾದ ಬಿಸ್ಕೆಟ್ ತಿನ್ನುವುದು ಅನೇಕರ ನೆಚ್ಚಿನ ಅಭ್ಯಾಸ. ಬಿಡುವಿಲ್ಲದ ದಿನಚರಿಯಲ್ಲಿ ಇದು ಸುಲಭ ಮತ್ತು ತ್ವರಿತ ಆಯ್ಕೆಯಂತೆ ಕಂಡರೂ, ದೀರ್ಘಕಾಲದಲ್ಲಿ ಇದು ಆರೋಗ್ಯದ ಮೇಲೆ ಬೀರುವ ಪರಿಣಾಮಗಳ ಬಗ್ಗೆ ಎಚ್ಚರಿಕೆ ವಹಿಸುವುದು ಅಗತ್ಯವಾಗಿದೆ.
ಮಾರುಕಟ್ಟೆಯಲ್ಲಿ ಸಿಗುವ ಬಹುತೇಕ ಬಿಸ್ಕೆಟ್ ಗಳಲ್ಲಿ ಸಂಸ್ಕರಿತ ಮೈದಾ, ಹೆಚ್ಚಿನ ಪ್ರಮಾಣದ ಸಕ್ಕರೆ ಮತ್ತು ಅನಾರೋಗ್ಯಕರ ಕೊಬ್ಬು ಇರುತ್ತದೆ. ನಾರಿನಂಶ ಕಡಿಮೆ ಇರುವ ಇವುಗಳನ್ನು ಬೆಳಗ್ಗೆ ಸೇವಿಸುವುದರಿಂದ ರಕ್ತದಲ್ಲಿ ಸಕ್ಕರೆಯ ಮಟ್ಟ ಏಕಾಏಕಿ ಏರಬಹುದು. ಮಧುಮೇಹ ಇರುವವರಿಗೆ ಮತ್ತು ತೂಕ ಇಳಿಸಿಕೊಳ್ಳಲು ಪ್ರಯತ್ನಿಸುವವರಿಗೆ ಈ ಅಭ್ಯಾಸ ತೊಡಕಾಗಬಹುದು. ಅತಿಯಾದ ಸಕ್ಕರೆ ಮತ್ತು ಕೊಬ್ಬಿನ ಸೇವನೆ ದೀರ್ಘಕಾಲದಲ್ಲಿ ಹೃದಯದ ಆರೋಗ್ಯದ ಮೇಲೂ ಪರಿಣಾಮ ಬೀರಬಲ್ಲದು.
ರಾತ್ರಿಯ ಸುದೀರ್ಘ ವಿರಾಮದ ನಂತರ ಬೆಳಗ್ಗೆ ಹೊಟ್ಟೆ ಖಾಲಿ ಇರುತ್ತದೆ. ಈ ಸಮಯದಲ್ಲಿ ಬಿಸ್ಕೆಟ್ ಹಾಗೂ ಟೀ ಸೇವನೆಯಿಂದ ಕೆಲವರಲ್ಲಿ ಆಮ್ಲೀಯತೆ, ಎದೆಯುರಿ, ಹೊಟ್ಟೆ ಉಬ್ಬರ ಅಥವಾ ಮಲಬದ್ಧತೆಯಂತಹ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ಬಿಸ್ಕೆಟ್ ನಲ್ಲಿರುವ ಕಡಿಮೆ ನಾರಿನಂಶ ಜೀರ್ಣಕ್ರಿಯೆಯನ್ನು ನಿಧಾನಗೊಳಿಸಬಹುದು.
ಬೆಳಗಿನ ಹೊತ್ತಿನಲ್ಲಿ ದೇಹಕ್ಕೆ ಅಗತ್ಯವಾದ ಶಕ್ತಿ ಮತ್ತು ಪೋಷಕಾಂಶಗಳು ದೊರೆಯಬೇಕು. ಬಿಸ್ಕೆಟ್ ನ ಬದಲು ನೆನೆಸಿದ ಬಾದಾಮಿ ಅಥವಾ ವಾಲ್ನಟ್ಸ್, ಹಣ್ಣುಗಳು, ಮೊಳಕೆ ಕಾಳುಗಳು ಅಥವಾ ರಾಗಿ-ಅವಲಕ್ಕಿಯಂತಹ ಸಾಂಪ್ರದಾಯಿಕ ಆರೋಗ್ಯಕರ ತಿಂಡಿಗಳನ್ನು ಆಯ್ಕೆ ಮಾಡಿಕೊಳ್ಳುವುದು ಉತ್ತಮ. ಟೀ ಕುಡಿಯುವ ಮುನ್ನ ಸ್ವಲ್ಪ ನೀರು ಕುಡಿಯುವುದು ಮತ್ತು ಟೀಗೆ ಸಕ್ಕರೆ ಕಡಿಮೆ ಬಳಸುವುದು ಕೂಡ ಒಳ್ಳೆಯದು.
ಒಟ್ಟಾರೆಯಾಗಿ, ಆಗಾಗ್ಗೆ ಟೀ ಜೊತೆ ಬಿಸ್ಕೆಟ್ ತಿನ್ನುವುದರಿಂದ ದೊಡ್ಡ ತೊಂದರೆಯಾಗದಿದ್ದರೂ, ಅದನ್ನೇ ನಿತ್ಯದ ಪ್ರಮುಖ ಆಹಾರವನ್ನಾಗಿ ಮಾಡಿಕೊಳ್ಳುವುದು ಆರೋಗ್ಯದ ದೃಷ್ಟಿಯಿಂದ ಸೂಕ್ತವಲ್ಲ. ಸರಿಯಾದ ಆಹಾರ ಆಯ್ಕೆಗಳ ಮೂಲಕ ಬೆಳಗಿನ ಆರಂಭವನ್ನು ಆರೋಗ್ಯಕರವಾಗಿಟ್ಟುಕೊಳ್ಳುವುದು ಎಲ್ಲರಿಗೂ ಒಳಿತು.



