ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಇಂದಿನಿಂದ ನಂದಿನ ಹಾಲಿನ ದರ ಲೀಟರ್‌ಗೆ ಮೂರು ರೂಪಾಯಿ ಏರಿಕೆಯಾಗಿದೆ, ಜತೆಗೆ ಅಗತ್ಯ ವಸ್ತುಗಳ ಬೆಲೆಯೂ ಹೆಚ್ಚಾದ ಹಿನ್ನೆಲೆಯಲ್ಲಿ ಹೊಟೇಲ್ ಊಟ,ತಿಂಡಿ ಮೇಲೆಯೂ ಶೇ.10ರಷ್ಟು ದರ ಏರಿಕೆಯಾಗಿದೆ.
ಬೆಲೆ ಏರಿಕೆಯಿಂದ ಮಧ್ಯಮವರ್ಗದವರಿಗೆ ಪೆಟ್ಟು ಬಿದ್ದಿದ್ದು, ಅಗತ್ಯ ವಸ್ತುಗಳನ್ನು ಖರೀದಿ ಮಾಡಲು ಹಿಂದೆಮುಂದೆ ನೋಡುವಂತಾಗಿದೆ. ಈಗಾಗಲೇ ಟೊಮ್ಯಾಟೊ ದರ ಏರಿಕೆಯಿಂದ ಬೇಸತ್ತ ಜನರಿಗೆ ಮತ್ತೊಂದು ಶಾಕ್ ಆಗಿದೆ. ಟೊಮ್ಯಾಟೊ ಬೆಲೆಯೂ ಏಕಾಏಕಿ ಮತ್ತೆ ಏರಿಕೆಯಾಗಿದ್ದು, ಕೆಲವೆಡೆ ಕೆಜಿಗೆ 200 ರೂಪಾಯಿಯಂತೆ ಮಾರಾಟ ಮಾಡಲಾಗುತ್ತಿದೆ.
ಟೋನ್ಡ್ ಹಾಲು ಈ ಹಿಂದೆ ಲೀಟರ್‌ಗೆ 39ರೂಪಾಯಿಗಳಾಗಿದ್ದು, ಇದೀಗ 42 ರೂಪಾಯಿ ಆಗಿದೆ. ಹೋಮೋಜಿನೈಸ್ಡ್ ಹಾಲಿನ ಬೆಲೆ 43 ರೂಪಾಯಿ ಆಗಿದೆ. ಹಸುವಿನ ಹಾಲಿನ ಗ್ರೀನ್ ಪ್ಯಾಕೆಟ್ ಬೆಲೆ 46 ರೂಪಾಯಿ ಆಗಿದೆ. ಮೊಸರು ಪ್ರತೀ ಲೀಟರ್‌ಗೆ 50 ರೂಪಾಯಿ ಆಗಿದೆ.
ಹೊಟೇಲ್‌ಗಳಲ್ಲಿ ಕಾಫಿ ದರ ಏರಿಕೆಯಾಗಿದ್ದು, ಒಂದು ಲೋಟ ಕಾಫಿಗೆ ಈ ಮೊದಲು 10 ರೂಪಾಯಿ ಇದ್ದು, ಇದೀಗ ಇದನ್ನು 13 ರೂಪಾಯಿಗೆ ಏರಿಕೆ ಮಾಡಲಾಗಿದೆ. ತಿಂಡಿ ಹಾಗೂ ಊಟದ ಬೆಲೆ 5-10ರೂಪಾಯಿ ಹೆಚ್ಚಾಗುವ ಸಾಧ್ಯತೆ ಇದೆ.
