ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಸೂಪರ್‌ಸ್ಟಾರ್ ರಜನಿಕಾಂತ್ ಅಭಿನಯದ ‘ಜೈಲರ್ 2’ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಆರಂಭ ಪಡೆದಿದ್ದು, ಎರಡನೇ ದಿನದ ಗಳಿಕೆಯಲ್ಲಿ ಕೊಂಚ ಇಳಿಕೆ ಕಂಡರೂ ವಿಶ್ವಾದ್ಯಂತ 200 ಕೋಟಿ ರೂ ಗಡಿ ದಾಟಿ ಸದ್ದು ಮಾಡುತ್ತಿದೆ.
ಮೊದಲ ದಿನವೇ ದೊಡ್ಡ ಮೊತ್ತ ಗಳಿಸಿದ್ದ ಚಿತ್ರಕ್ಕೆ ಎರಡನೇ ದಿನ ಕೊಂಚ ಹಿನ್ನಡೆಯಾದರೂ, ಒಟ್ಟಾರೆ ಕಲೆಕ್ಷನ್ ಮಾತ್ರ ಗಮನ ಸೆಳೆಯುತ್ತಿದೆ. ವಿಮರ್ಶಕರು ಮತ್ತು ಪ್ರೇಕ್ಷಕರಿಂದ ಚಿತ್ರಕ್ಕೆ ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿರುವುದು ಚಿತ್ರತಂಡಕ್ಕೆ ಮತ್ತಷ್ಟು ನಿರೀಕ್ಷೆ ಮೂಡಿಸಿದೆ.
ಎರಡನೇ ದಿನದ ಗಳಿಕೆ ಎಷ್ಟು?
ವರದಿಗಳ ಪ್ರಕಾರ, ಬಿಡುಗಡೆಯ ಎರಡನೇ ದಿನ ‘ಜೈಲರ್ 2’ ಭಾರತದಲ್ಲಿ 35.60 ಕೋಟಿ ನಿವ್ವಳ ಗಳಿಕೆ ದಾಖಲಿಸಿದೆ. ಮೊದಲ ದಿನ 59.70 ಕೋಟಿ ಗಳಿಸಿದ್ದ ಸಿನಿಮಾ, ಎರಡನೇ ದಿನ ಸುಮಾರು ಶೇ.40.4ರಷ್ಟು ಇಳಿಕೆ ಕಂಡಿದೆ. ಆದರೂ ಎರಡು ದಿನಗಳ ಒಟ್ಟು ದೇಶೀಯ ನಿವ್ವಳ ಕಲೆಕ್ಷನ್ 95.30 ಕೋಟಿಗೆ ತಲುಪಿದೆ. ತೆರಿಗೆ ಸೇರಿಸಿದ ದೇಶೀಯ ಒಟ್ಟು ಗಳಿಕೆ 112.10 ಕೋಟಿ ಎಂದು ವರದಿಯಾಗಿದೆ.
ಇದನ್ನೂ ಓದಿ:
ಭಾಷಾವಾರು ಗಳಿಕೆಯಲ್ಲಿ ತಮಿಳು ಆವೃತ್ತಿ ಮುಂಚೂಣಿಯಲ್ಲಿದೆ. ತಮಿಳಿನಲ್ಲಿ 25.25 ಕೋಟಿ, ತೆಲುಗಿನಲ್ಲಿ 7.25 ಕೋಟಿ ಹಾಗೂ ಹಿಂದಿ ಆವೃತ್ತಿಯಲ್ಲಿ 2.75 ಕೋಟಿ ಗಳಿಕೆ ದಾಖಲಾಗಿದೆ.
ವಿದೇಶದಲ್ಲೂ ‘ಜೈಲರ್ 2’ ಹವಾ!
ವಿದೇಶಿ ಮಾರುಕಟ್ಟೆಯಲ್ಲಿಯೂ ಸಿನಿಮಾ ಉತ್ತಮ ಪ್ರದರ್ಶನ ನೀಡಿದೆ. ವರದಿಯ ಪ್ರಕಾರ, ವಿದೇಶಗಳಲ್ಲಿ ಎರಡನೇ ದಿನದ ಗಳಿಕೆ 40 ಕೋಟಿ ಆಗಿದ್ದು, ಒಟ್ಟು ವಿದೇಶಿ ಕಲೆಕ್ಷನ್ 97 ಕೋಟಿಗೆ ಏರಿದೆ. ದೇಶೀಯ ಮತ್ತು ವಿದೇಶಿ ಗಳಿಕೆಯನ್ನು ಸೇರಿಸಿದಾಗ ಚಿತ್ರದ ವಿಶ್ವಾದ್ಯಂತ ಒಟ್ಟು ಕಲೆಕ್ಷನ್ 209.10 ಕೋಟಿಯಾಗಿದೆ. ಹೀಗಾಗಿ, ಬಿಡುಗಡೆಯಾದ ಕೇವಲ ಎರಡು ದಿನಗಳಲ್ಲೇ ಸಿನಿಮಾ 200 ಕೋಟಿ ಮೈಲಿಗಲ್ಲು ದಾಟಿದೆ.
ಮತ್ತೆ ಅಬ್ಬರಿಸಿದ ಟೈಗರ್ ಪಾಂಡಿಯನ್!
2023ರಲ್ಲಿ ಬಿಡುಗಡೆಯಾಗಿ ಯಶಸ್ಸು ಕಂಡಿದ್ದ ‘ಜೈಲರ್’ ಚಿತ್ರದ ಮುಂದುವರಿದ ಭಾಗವೇ ‘ಜೈಲರ್ 2’. ಈ ಸಿನಿಮಾದಲ್ಲಿ ರಜನಿಕಾಂತ್ ಮತ್ತೊಮ್ಮೆ ಮುತ್ತುವೇಲ್ ‘ಟೈಗರ್’ ಪಾಂಡಿಯನ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಆರಂಭದಲ್ಲಿ ಶಾಂತ ಜೀವನ ನಡೆಸುತ್ತಿರುವಂತೆ ತೋರುವ ನಾಯಕನನ್ನು, ಹಳೆಯ ಘಟನೆಗಳು ಮತ್ತೆ ಹಿಂಸಾತ್ಮಕ ಜಗತ್ತಿನತ್ತ ಸೆಳೆಯುತ್ತವೆ. ರಜನಿಕಾಂತ್ ಅವರ ಸ್ಟೈಲ್, ಆಕ್ಷನ್ ದೃಶ್ಯಗಳು ಮತ್ತು ಪಾತ್ರದ ಖದರ್ ಚಿತ್ರಕ್ಕೆ ಪ್ರಮುಖ ಆಕರ್ಷಣೆಯಾಗಿವೆ.
ಸನ್ ಪಿಕ್ಚರ್ಸ್ ನಿರ್ಮಾಣದ ಈ ಚಿತ್ರಕ್ಕೆ ಅನಿರುದ್ಧ್ ರವಿಚಂದರ್ ಸಂಗೀತ ಸಂಯೋಜಿಸಿದ್ದಾರೆ. ಹೃತಿಕ್ ರೋಷನ್, ಮೋಹನ್‌ಲಾಲ್, ವಿದ್ಯಾ ಬಾಲನ್, ಎಸ್.ಜೆ. ಸೂರ್ಯ, ಮಿಥುನ್ ಚಕ್ರವರ್ತಿ ಮತ್ತು ಜಾಕಿ ಶ್ರಾಫ್ ಸೇರಿದಂತೆ ಹಲವು ಕಲಾವಿದರು ಅತಿಥಿ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.
