ಹೊಸ ದಿಗಂತ ಡಿಜಿಟಲ್ ಡೆಸ್ಕ್
ಗೂಗಲ್, ಫೇಸ್ಬುಕ್ ಥರದ ತಂತ್ರಜ್ಞಾನ ದೈತ್ಯರು ನೀವು ಏನನ್ನು ನೋಡಬೇಕು, ಏನನ್ನು ಖರೀದಿಸಬೇಕು ಎಂಬುದನ್ನೆಲ್ಲ ಬಹುತೇಕ ಅವುಗಳ ಮೂಲಕವೇ ನಿರ್ಧರಿಸುವಂತೆ ಮಾಡುತ್ತಿರುವುದು ಒಂದು ಜಾಗತಿಕ ವಿದ್ಯಮಾನ. ಈ ನಿಟ್ಟಿನಲ್ಲಿ ಇದನ್ನು ನಿಯಂತ್ರಿಸುವ ವ್ಯವಸ್ಥೆಯೊಂದನ್ನು ತರುವುದಕ್ಕೆ ಬ್ರಿಟಿಷ್ ಸರ್ಕಾರ ಚಿಂತಿಸುತ್ತಿರುವುದಾಗಿ ಬಿಬಿಸಿ ವರದಿ ಮಾಡಿದೆ.
ಮುಖ್ಯವಾಗಿ ಈ ಹೊಸ ವ್ಯವಸ್ಥೆಯು ತಂತ್ರಜ್ಞಾನ ವಿಭಾಗದಲ್ಲಿ ಏಕಸ್ವಾಮ್ಯ ಸಾಧಿಸುವ ದೈತ್ಯ ಕಂಪನಿಗಳ ಓಟಕ್ಕೆ ಬ್ರೇಕ್ ಹಾಕಲಿದೆ.
- ಗೂಗಲ್, ಫೇಸ್ಬುಕ್, ಆಪಲ್ ಥರದ ಎಲ್ಲ ದೊಡ್ಡ ಕಂಪನಿಗಳೂ ತಾವು ಬಳಕೆದಾರರಿಂದ ಸಂಗ್ರಹಿಸಿರುವ ದತ್ತಾಂಶವನ್ನು ಬಳಕೆದಾರರ ನಿಯಂತ್ರಣದಲ್ಲಿಯೇ ಇರುವಂತೆ ವ್ಯವಸ್ಥೆ ರೂಪಿಸಬೇಕು. ಅಂದರೆ ಒಂದು ಸಾಮಾಜಿಕ ವೇದಿಕೆಯಿಂದ ಇನ್ನೊಂದು ವೇದಿಕೆಗೆ ಸ್ಥಳಾಂತರವಾದರೆ ಬಳಕೆದಾರ ತನಗೆ ಸೇರಿದ ಮಾಹಿತಿಗಳನ್ನು ಕೊಂಡೊಯ್ಯುವಂಥ ವ್ಯವಸ್ಥೆ ರೂಪಿಸುವುದಕ್ಕೆ ಒತ್ತಡ.
- ಬೇರೆ ಬೇರೆ ಸುದ್ದಿ ಮಾಧ್ಯಮದ ಲಿಂಕುಗಳನ್ನು ಬಿತ್ತರಿಸುವ ಗೂಗಲ್, ಫೇಸ್ಬುಕ್ ಥರದ ಮಾಧ್ಯಮ ಆ ಮೂಲಕ ಭಾರಿ ಪ್ರಮಾಣದ ಜಾಹೀರಾತು ಹಣ ತಮ್ಮದಾಗಿಸಿಕೊಳ್ಳುತ್ತಿವೆ. ಆದರೆ ಈ ಸುದ್ದಿ ಇಲ್ಲವೇ ಸರಕನ್ನು ಸೃಷ್ಟಿಸಿದ ಮೂಲದವರಿಗೆ ಈ ಆದಾಯವನ್ನು ಅತಿ ಕಡಿಮೆ ಪ್ರಮಾಣದಲ್ಲಿ ಹಂಚಲಾಗುತ್ತಿದೆ. ಈ ಕುರಿತ ನ್ಯಾಯಬದ್ಧ ಹಂಚಿಕೆಗೆ ನಿಯಮ ಬರಲಿದೆ.
- ಇವತ್ತು ಗೂಗಲ್ ಥರದ ಅಥವಾ ಫೇಸ್ಬುಕ್ ಥರದ ಇನ್ನೊಂದು ತಾಣ ಏಕೆ ಅಭಿವೃದ್ಧಿಯಾಗಿಲ್ಲ ಎಂದರೆ, ಈ ಕಂಪನಿಗಳು ತಮ್ಮ ಪ್ರತಿಸ್ಪರ್ಧಿಗಳನ್ನು ಬೆಳೆಯುವ ಹಂತದಲ್ಲೇ ಖರೀದಿಸಿ ಮುಗಿಸಿಬಿಡುತ್ತವೆ. ದೈತ್ಯ ಕಂಪನಿಗಳು ಬೇರೆ ಕಂಪನಿಗಳನ್ನು ವಿಲೀನಗೊಳಿಸಿಕೊಳ್ಳುವ ಪ್ರಕ್ರಿಯೆಯು ಸರ್ಕಾರದ ಗಮನ ಮತ್ತು ವಿವೇಚನೆಗಳಿಗೆ ಮೊದಲೇ ಬರಬೇಕಾದ ವ್ಯವಸ್ಥೆಯೊಂದನ್ನು ಸೃಷ್ಟಿಸಲಾಗುತ್ತಿದೆ.
ಈ ಮೇಲೆ ಹೇಳಿದ ಅಂಶಗಳೆಲ್ಲವೂ ಪರಿಣಾಮಕಾರಿಯಾಗಿ ಜಾರಿಯಾಗಬೇಕಾದರೆ ಅದಕ್ಕೊಂದು ಕಾನೂನೇ ರೂಪುಗೊಳ್ಳಬೇಕಿದೆ. ಆ ನಿಟ್ಟಿನಲ್ಲಿ ತಯಾರಿ ಆಗುತ್ತಿದೆ ಎಂದು ಬಿಬಿಸಿ ವರದಿ ಹೇಳಿದೆ.