ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಸಾಮಾನ್ಯವಾಗಿ ಸಾರ್ವಜನಿಕ ವೇದಿಕೆಗಳಲ್ಲಿ ಮಾತನಾಡುವಾಗ ಸಣ್ಣಪುಟ್ಟ ಎಡವಟ್ಟುಗಳು ಆಗುವುದು ಸಹಜ. ಆದರೆ ‘ರಾಮಾಯಣ’ ಸಿನಿಮಾದಲ್ಲಿ ನಟಿಸುತ್ತಿರುವ ಬಾಲಿವುಡ್ ನಟ ರಣ್‌ಬೀರ್ ಕಪೂರ್ ಅವರಿಗೆ ದಸರಾ ಆಚರಣೆಯ ಸಂದರ್ಭದಲ್ಲೇ ಇಂತಹದೊಂದು ಎಡವಟ್ಟು ಎದುರಾಗಿದೆ. ಕೋಲ್ಕತ್ತಾದಲ್ಲಿ ನಡೆದ ಘಟನೆಗೆ ನಟ ತಕ್ಷಣವೇ ಸ್ಪಷ್ಟನೆ ನೀಡಿ, ಬಹಿರಂಗವಾಗಿ ಕ್ಷಮೆ ಕೇಳುವ ಮೂಲಕ ಅಭಿಮಾನಿಗಳ ಮನ ಗೆದ್ದಿದ್ದಾರೆ.
‘ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್’ ಸಿನಿಮಾದ ಪ್ರಚಾರಕ್ಕಾಗಿ ರಣ್‌ಬೀರ್ ಕಪೂರ್ ಮತ್ತು ನಟ ಯಶ್ ಅವರು ಕೋಲ್ಕತ್ತಾದ ಸಾಲ್ಟ್ ಲೇಕ್‌ನಲ್ಲಿ ನಡೆದ ವಿಜಯದಶಮಿ ಆಚರಣೆಯಲ್ಲಿ ಭಾಗವಹಿಸಿದ್ದರು. ‘ಜೈ ಶ್ರೀರಾಮ್’ ಘೋಷಣೆಯೊಂದಿಗೆ ಮಾತು ಆರಂಭಿಸಿದ ರಣಬೀರ್, “ಎಷ್ಟೇ ಶಕ್ತಿಶಾಲಿಯಾದ ಕೆಟ್ಟ ಶಕ್ತಿಗಳಿದ್ದರೂ, ಕೊನೆಯಲ್ಲಿ ಸತ್ಯ ಮತ್ತು ಒಳ್ಳೆಯತನವೇ ನಾಶವಾಗುತ್ತದೆ” ಎಂದು ತಪ್ಪಾಗಿ ಹೇಳಿದರು. ವಾಸ್ತವವಾಗಿ ಅವರು “ಒಳ್ಳೆಯತನವೇ ಗೆಲ್ಲುತ್ತದೆ” ಎಂದು ಹೇಳಬೇಕಿತ್ತು. ಅವರು ಹೀಗೆ ಹೇಳುತ್ತಿದ್ದಂತೆ ವೇದಿಕೆಯಲ್ಲಿದ್ದ ಗಣ್ಯರು ಕ್ಷಣಕಾಲ ಆಶ್ಚರ್ಯಚಕಿತರಾದರು. ಈ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿತ್ತು.
ಕೋಲ್ಕತ್ತಾದಲ್ಲಿ ನಡೆದ ಈ ಸಣ್ಣ ತಪ್ಪು ತಿಳುವಳಿಕೆಗೆ ರಣ್‌ಬೀರ್ ಕಪೂರ್ ಬುಧವಾರ ಚೆನ್ನೈನಲ್ಲಿ ನಡೆದ ತಮ್ಮ ಸಿನಿಮಾದ ಹಾಡು ಬಿಡುಗಡೆ ಸಮಾರಂಭದಲ್ಲಿ ತೆರೆ ಎಳೆದರು. ವೇದಿಕೆ ಏರಿದ ತಕ್ಷಣವೇ, “ಗೌರವಪೂರ್ವಕವಾಗಿ ನಿನ್ನೆಯ ಘಟನೆಗೆ ಕ್ಷಮೆ ಕೇಳಲು ಬಯಸುತ್ತೇನೆ. ದಸರಾ ಕಾರ್ಯಕ್ರಮದಲ್ಲಿ ಎಡವಟ್ಟಾಯಿತು. ನಾನು ಹೇಳಲು ಹೊರಟಿದ್ದು ಒಂದಾದರೆ, ಬಂದದ್ದು ಇನ್ನೊಂದು,” ಎಂದು ಪ್ರಾಮಾಣಿಕವಾಗಿ ಒಪ್ಪಿಕೊಂಡರು.
ನಂತರ ಹಿಂದಿಯಲ್ಲಿ ತಮ್ಮ ನಿಜವಾದ ಸಂದೇಶವನ್ನು ಸ್ಪಷ್ಟಪಡಿಸಿದ ಅವರು, “ಕೆಟ್ಟದ್ದು ಎಷ್ಟೇ ಬಲಶಾಲಿಯಾಗಿದ್ದರೂ, ಅಂತಿಮವಾಗಿ ಸತ್ಯ, ಧರ್ಮ ಮತ್ತು ಒಳ್ಳೆಯತನಕ್ಕೇ ಜಯ ಸಿಗುತ್ತದೆ,” ಎಂದು ದಸರಾ ಹಬ್ಬದ ನಿಜವಾದ ಅರ್ಥವನ್ನು ವಿವರಿಸಿದರು.
ತಮ್ಮ ಮಾತಿನ ಎಡವಟ್ಟನ್ನು ವಿವರಿಸಲು ರಣ್‌ಬೀರ್ ಕಪೂರ್ ಅವರು ಎ.ಆರ್. ರೆಹಮಾನ್ ಜೊತೆ ಕೆಲಸ ಮಾಡಿದ ‘ರಾಕ್ಸ್ಟಾರ್’ ಚಿತ್ರದ ಪ್ರಸಿದ್ಧ ಹಾಡನ್ನು ನೆನಪಿಸಿಕೊಂಡರು. “ಜೋ ಭಿ ಮೈ ಕೆಹನಾ ಚಾಹೂಂ, ಬರ್ಬಾದ್ ಕರೇ ಅಲ್ಫಾಝ್ ಮೇರೇ” ಎಂಬ ಸಾಲನ್ನು ಉಲ್ಲೇಖಿಸಿ, “ನಾನು ಮನಸ್ಸಿನಲ್ಲಿ ಅಂದುಕೊಂಡಿದ್ದನ್ನು ಪದಗಳಲ್ಲಿ ಸರಿಯಾಗಿ ವ್ಯಕ್ತಪಡಿಸಲು ಸಾಧ್ಯವಾಗಲಿಲ್ಲ, ಅದಕ್ಕಾಗಿ ಹೃದಯಪೂರ್ವಕವಾಗಿ ಕ್ಷಮೆ ಕೇಳುತ್ತೇನೆ” ಎಂದು ವಿನಮ್ರವಾಗಿ ವಿನಂತಿಸಿದರು.
ಬಾಲಿವುಡ್‌ನ ಪ್ರಮುಖ ನಟರೊಬ್ಬರು ತಕ್ಷಣವೇ ತಮ್ಮ ತಪ್ಪನ್ನು ಒಪ್ಪಿಕೊಂಡು, ಅತ್ಯಂತ ವಿನಯದಿಂದ ಕ್ಷಮೆಯಾಚಿಸಿದ್ದು ಅವರ ಪ್ರಬುದ್ಧತೆಗೆ ಸಾಕ್ಷಿಯಾಗಿದೆ.ಜನರ ಮನಸ್ಸಿಗೆ ನೋವಾಗಿದ್ದರೆ ಕ್ಷಮಿಸಿ ಎಂದಿರುವ ರಣ್‌ಬೀರ್, ಪ್ರೀತಿ, ಸಂತೋಷ ಮತ್ತು ಸರಿಯಾದ ಹಾದಿಯಲ್ಲಿ ಸಾಗುವುದೇ ದಸರಾದ ನಿಜವಾದ ಸಂದೇಶ ಎಂದು ಪುನರುಚ್ಚರಿಸಿದ್ದಾರೆ.
