ಇಂದಿನ ವೇಗದ ಬದುಕಿನಲ್ಲಿ ನಗು ಎಂಬುದು ನಿಧಾನವಾಗಿ ನಮ್ಮ ದಿನಚರಿಯಿಂದ ದೂರವಾಗುತ್ತಿರುವಂತಿದೆ. ಕೆಲಸದ ಒತ್ತಡ, ವೈಯಕ್ತಿಕ ಸಮಸ್ಯೆಗಳು, ಭವಿಷ್ಯದ ಚಿಂತೆ ಇವೆಲ್ಲದರ ನಡುವೆ ಮನಸಾರೆ ನಗುವ ಕ್ಷಣಗಳು ಕಡಿಮೆಯಾಗಿವೆ. ಇದೇ ಕಾರಣಕ್ಕೆ ಪ್ರತಿ ವರ್ಷ ಮೇ ಮೊದಲ ಭಾನುವಾರವನ್ನು ವಿಶ್ವ ನಗು ದಿನವಾಗಿ ಆಚರಿಸಲಾಗುತ್ತದೆ. ನಗುವಿನ ಮಹತ್ವವನ್ನು ನೆನಪಿಸುವುದರ ಜೊತೆಗೆ, ಬದುಕನ್ನು ಹಗುರವಾಗಿ ನೋಡುವ ಮನಸ್ಥಿತಿಯನ್ನು ಬೆಳೆಸುವ ಸಂದೇಶವನ್ನು ಈ ದಿನ ಸಾರುತ್ತದೆ.
ಒಂದು ನಗು ಮನಸ್ಸಿನ ಭಾರವನ್ನು ಕ್ಷಣಾರ್ಧದಲ್ಲಿ ಕಡಿಮೆ ಮಾಡಬಲ್ಲದು. ಕೋಪ, ಬೇಸರ, ಆತಂಕದ ನಡುವೆ ಒಂದು ಚಿಕ್ಕ ನಗು ಸಹ ಮನಸ್ಸಿಗೆ ನೆಮ್ಮದಿ ನೀಡುತ್ತದೆ. ನಗುವಾಗ ದೇಹದಲ್ಲಿ ಸಂತೋಷವನ್ನು ಹೆಚ್ಚಿಸುವ ಹಾರ್ಮೋನ್‌ಗಳು ಬಿಡುಗಡೆಯಾಗಿ, ಮನಸ್ಸು ಚೈತನ್ಯದಿಂದ ತುಂಬುತ್ತದೆ. ಅದಕ್ಕಾಗಿಯೇ ವೈದ್ಯರು ಕೂಡ ನಗುವನ್ನು ಉತ್ತಮ ಔಷಧಿ ಎಂದು ಹೇಳುತ್ತಾರೆ.
ನಗು ನಮ್ಮ ಆರೋಗ್ಯಕ್ಕೂ ಒಳ್ಳೆಯದು, ಸಂಬಂಧಗಳಿಗೂ ಸೇತುವೆ. ಮನಸಾರೆ ನಗುವ ವ್ಯಕ್ತಿಯ ಸಾನ್ನಿಧ್ಯ ಎಲ್ಲರಿಗೂ ಇಷ್ಟವಾಗುತ್ತದೆ. ಬದುಕು ಎಷ್ಟೇ ಕಷ್ಟವಾಗಿದ್ದರೂ, ಒಂದು ನಗು ಅದನ್ನು ಎದುರಿಸುವ ಶಕ್ತಿ ನೀಡುತ್ತದೆ. ಆದ್ದರಿಂದ ಕಾರಣ ಹುಡುಕಿ ನಗುವುದಕ್ಕಿಂತ, ನಗುವುದನ್ನೇ ಬದುಕಿನ ಭಾಗವಾಗಿಸಿಕೊಳ್ಳುವುದು ಮುಖ್ಯ.
