WPL 2027: ಆರ್‌ಸಿಬಿ ತಂಡಕ್ಕೆ ನಾಲ್ವರು ಹೊಸ ಆಟಗಾರ್ತಿಯರ ಸೇರ್ಪಡೆ

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ವುಮೆನ್ಸ್ ಪ್ರೀಮಿಯರ್ ಲೀಗ್‌ನ ಮುಂಬರುವ ಸೀಸನ್‌ಗಾಗಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮಿನಿ ಹರಾಜಿನಲ್ಲಿ ಅತ್ಯಂತ ಚಾಣಾಕ್ಷ ನಡೆ ಇಟ್ಟಿದೆ. ತಂಡಕ್ಕೆ ಅಗತ್ಯವಿದ್ದ ಜಾಗಗಳನ್ನು ಭರ್ತಿ ಮಾಡಲು ನಾಲ್ವರು ಶಕ್ತಿಶಾಲಿ ಆಟಗಾರ್ತಿಯರನ್ನು ಆರ್​ಸಿಬಿ ಖರೀದಿಸಿದ್ದು, ಇದರಲ್ಲಿ ನಮ್ಮ ಹೆಮ್ಮೆಯ ಕರ್ನಾಟಕದ ಯುವ ಪ್ರತಿಭೆ ಇರುವುದು ಕನ್ನಡಿಗರ ಹುರುಪನ್ನು ಇಮ್ಮಡಿಗೊಳಿಸಿದೆ.

ಆಸ್ಟ್ರೇಲಿಯಾದ ಅನುಭವಿ ಆಲ್​ರೌಂಡರ್ ಜೆಸ್ ಜೊನಾಸೆನ್ ಅವರನ್ನು ಆರ್​ಸಿಬಿ 40 ಲಕ್ಷ ರೂಪಾಯಿಗೆ ತನ್ನದಾಗಿಸಿಕೊಂಡಿದೆ. ಜೋರ್ಜಿಯಾ ವೋಲ್ ಮತ್ತು ಎಲಿಸ್ ಪೆರ್ರಿ ಅವರಂತಹ ದೈತ್ಯ ಆಟಗಾರ್ತಿಯರ ಜೊತೆಗೆ ಜೊನಾಸೆನ್ ಸೇರ್ಪಡೆಯಾಗಿರುವುದು ಆರ್​ಸಿಬಿಯ ವಿದೇಶಿ ಆಲ್​ರೌಂಡರ್ ವಿಭಾಗವನ್ನು ವಿಶ್ವದಲ್ಲೇ ಅತ್ಯಂತ ಬಲಿಷ್ಠ ಪಡೆಯನ್ನಾಗಿ ಮಾಡಿದೆ.

ತಮ್ಮ ಬಿರುಸಿನ ಬ್ಯಾಟಿಂಗ್‌ಗೆ ವಿಶ್ವಪ್ರಸಿದ್ಧರಾಗಿರುವ ದಕ್ಷಿಣ ಆಫ್ರಿಕಾದ ಕ್ಲೋಯ್ ಟ್ರಯಾನ್ ಅವರನ್ನು 30 ಲಕ್ಷ ರೂಪಾಯಿಗೆ ಖರೀದಿಸಲಾಗಿದೆ. ಮೈದಾನದಲ್ಲಿ ಎಂತಹದೇ ಒತ್ತಡದ ಸಮಯದಲ್ಲೂ ಬೌಂಡರಿ, ಸಿಕ್ಸರ್ ಸಿಡಿಸುವ ಸಾಮರ್ಥ್ಯ ಇವರಿಗಿದೆ. ಆಲ್​ರೌಂಡರ್ ನಾಡಿನ್ ಡಿ ಕ್ಲರ್ಕ್ ಅವರ ಅತ್ಯುತ್ತಮ ಬ್ಯಾಕಪ್ ಆಗಿ ಟ್ರಯಾನ್ ಕಾರ್ಯನಿರ್ವಹಿಸಲಿದ್ದಾರೆ.

ದೇಶಿ ಕ್ರಿಕೆಟ್ ಹಾಗೂ ಭಾರತ ‘ಎ’ ತಂಡದಲ್ಲಿ ನಿರಂತರ ಸ್ಥಿರ ಪ್ರದರ್ಶನ ನೀಡಿ ಗಮನಸೆಳೆದಿರುವ ಮಹಾರಾಷ್ಟ್ರದ ತೇಜಲ್ ಹಸಬ್ನಿಸ್ ಅವರನ್ನು 30 ಲಕ್ಷ ರೂ.ಗೆ ಆರ್​ಸಿಬಿ ಪಡೆದುಕೊಂಡಿದೆ. ಕರ್ನಾಟಕದ ಭರವಸೆಯ ಯುವ ಆಟಗಾರ್ತಿ ವೃಂದಾ ದಿನೇಶ್ ಅವರನ್ನು ಆರ್​ಸಿಬಿ 10 ಲಕ್ಷ ರೂಪಾಯಿಯ ಮೂಲ ಬೆಲೆಗೆ ತನ್ನ ಬಳಗಕ್ಕೆ ಸೇರಿಸಿಕೊಂಡಿದೆ. ಆಕ್ರಮಣಕಾರಿ ಓಪನರ್ ಆಗಿರುವ ವೃಂದಾ ಅವರ ಸೇರ್ಪಡೆಯು ತಂಡದ ಟಾಪ್ ಆರ್ಡರ್‌ಗೆ ಬಲ ತುಂಬಿದೆ.

ಒಟ್ಟಿನಲ್ಲಿ, ಕಡಿಮೆ ವೆಚ್ಚದಲ್ಲಿ ಅತಿ ಹೆಚ್ಚು ಸಾಮರ್ಥ್ಯವಿರುವ ಆಟಗಾರ್ತಿಯರನ್ನು ಆಯ್ದುಕೊಳ್ಳುವ ಮೂಲಕ ಆರ್​ಸಿಬಿ ಮ್ಯಾನೇಜ್‌ಮೆಂಟ್ ಮತ್ತೊಮ್ಮೆ ಟ್ರೋಫಿ ಗೆಲ್ಲುವ ಕಡೆಗೆ ಭದ್ರ ಹೆಜ್ಜೆ ಇಟ್ಟಿದೆ.