ಪ್ರತಿಯೊಬ್ಬರೂ ತಮ್ಮ ಸಂಗಾತಿಯಿಂದ ಪ್ರೀತಿ, ಗೌರವ ಮತ್ತು ಸಮಾನ ಕಾಳಜಿಯನ್ನು ನಿರೀಕ್ಷಿಸುವುದು ಸಹಜ. ಆದರೆ ಕಾಲ ಕಳೆದಂತೆ ಕೆಲವು ಸಂಬಂಧಗಳಲ್ಲಿ ಎಲ್ಲಾ ಜವಾಬ್ದಾರಿಗಳು, ಮಾತುಗಳು ಮತ್ತು ಪ್ರಯತ್ನಗಳು ಒಬ್ಬರ ಮೇಲೆಯೇ ಬೀಳುತ್ತವೆ. ಇನ್ನೊಬ್ಬರು ಸಂಪೂರ್ಣ ನಿರ್ಲಕ್ಷ್ಯ ತೋರುತ್ತಾರೆ. ನಿಮ್ಮ ಸಂಬಂಧದಲ್ಲಿಯೂ ಹೀಗಾಗುತ್ತಿದ್ದರೆ, ನೀವು ಕಡೆಗಣಿಸಲ್ಪಡುತ್ತಿದ್ದೀರಿ ಎಂದರ್ಥ.
ಯಾವಾಗಲೂ ನೀವೇ ಮೊದಲು ಫೋನ್ ಮಾಡುವುದು, ಮೆಸೇಜ್ ಮಾಡುವುದು ಅಥವಾ ಅವರ ಯೋಗಕ್ಷೇಮವನ್ನು ವಿಚಾರಿಸುವುದು ಮಾಡುತ್ತಿದ್ದರೆ, ಗಮನಿಸಿ. ಎದುರಿನವರಿಂದ ಯಾವುದೇ ಮುತುವರ್ಜಿ ಅಥವಾ ಪ್ರೀತಿಯ ವಿಚಾರಣೆ ಬರುವುದೇ ಇಲ್ಲ. ನಿಮ್ಮ ದಿನ ಹೇಗಿದೆ ಎಂದು ಕೇಳಲು ಕೂಡ ಅವರಿಗೆ ಬಿಡುವಿಲ್ಲದಂತಿದ್ದರೆ, ಅಲ್ಲಿ ನಿಮ್ಮ ಪ್ರಯತ್ನ ಮಾತ್ರ ಕೆಲಸ ಮಾಡುತ್ತಿದೆ ಎಂದರ್ಥ.
ನಿಮ್ಮ ಖುಷಿ, ದುಃಖ ಅಥವಾ ಅಸಮಾಧಾನವನ್ನು ಸಂಗಾತಿ ಗಂಭೀರವಾಗಿ ಪರಿಗಣಿಸುತ್ತಿಲ್ಲವೇ? ನಿಮ್ಮ ಮಾತುಗಳಿಗೆ ಬೆಲೆ ನೀಡದೆ, ಕೇವಲ ಅವರ ಇಷ್ಟ-ಕಷ್ಟಗಳಿಗೆ ಮಾತ್ರ ಪ್ರಾಮುಖ್ಯತೆ ಕೊಡುತ್ತಿದ್ದರೆ ಅದು ಏಕಮುಖ ಸಂಬಂಧದ ದೊಡ್ಡ ಲಕ್ಷಣ. ನಿಮ್ಮ ಅಳಲು ಅವರಿಗೆ ಕೇವಲ ‘ಕಾಲಹರಣ’ ಅಥವಾ ‘ಕಿರಿಕಿರಿ’ ಎನಿಸುತ್ತಿದೆ ಎಂದಾದರೆ, ನಿಮ್ಮ ಅಸ್ತಿತ್ವ ಅಲ್ಲಿ ಕಡೆಗಣಿಸಲ್ಪಡುತ್ತಿದೆ.
ನೀವು ಅವರಿಗಾಗಿ ನಿಮ್ಮ ಕೆಲಸಗಳನ್ನು ಬಿಟ್ಟು ಬರುವುದು, ಸಮಯ ನೀಡುವುದು ಅಥವಾ ವಿಶೇಷ ಸಂದರ್ಭಗಳಲ್ಲಿ ಸರ್ಪ್ರೈಸ್ ನೀಡುವುದು ಅತ್ಯಂತ ಸ್ವಾಭಾವಿಕವೆಂಬಂತೆ ಅವರು ಭಾವಿಸುತ್ತಾರೆ. ಬದಲಿಗೆ, ನಿಮ್ಮ ಕಡೆಯಿಂದ ಬರುವ ಈ ನಿಸ್ವಾರ್ಥ ಪ್ರೀತಿಗೆ ಅವರು ಕೃತಜ್ಞತೆಯ ಒಂದು ಸಣ್ಣ ನಗುವನ್ನೂ ನೀಡದಿದ್ದಾಗ, ನಿಮ್ಮ ಶ್ರಮಕ್ಕೆ ಅಲ್ಲಿ ಯಾವುದೇ ಮೌಲ್ಯವಿಲ್ಲ ಎಂದಾಗುತ್ತದೆ.
ಸಂಬಂಧಕ್ಕೆ ಸಂಬಂಧಿಸಿದ ಪ್ರಮುಖ ನಿರ್ಧಾರಗಳನ್ನು ತೆಗೆದುಕೊಳ್ಳುವಾಗ ನಿಮ್ಮನ್ನು ಸಂಪೂರ್ಣವಾಗಿ ಕಡೆಗಣಿಸಿ ಅವರಷ್ಟಕ್ಕೆ ಅವರೇ ಎಲ್ಲವನ್ನೂ ನಿರ್ಧರಿಸುತ್ತಾರಾ? ನಿಮ್ಮ ಅನಿಸಿಕೆಗಳು ಅಥವಾ ಅಭಿಪ್ರಾಯಗಳಿಗೆ ಅಲ್ಲಿ ಯಾವುದೇ ಜಾಗವಿರುವುದಿಲ್ಲ. ನೀವು ಕೇವಲ ಅವರ ನಿರ್ಧಾರಗಳನ್ನು ಒಪ್ಪಿಕೊಳ್ಳುವ ಒಬ್ಬ ವೀಕ್ಷಕರಂತೆ ಕಾಣುತ್ತೀರಿ.
ಸಂಬಂಧದಲ್ಲಿ ಯಾವುದಾದರೂ ಬಿರುಕು ಮೂಡಿದಾಗ, ಅದನ್ನು ಸರಿಪಡಿಸಲು ಅಥವಾ ಮುನಿಸುಗಳನ್ನು ಮರೆತು ಮಾತನಾಡಿಸಲು ಪ್ರತಿ ಬಾರಿಯೂ ನೀವೇ ಮುಂದೆ ಬರುತ್ತೀರಾ? ಜಗಳದ ನಂತರವೂ ಕ್ಷಮೆ ಕೇಳುವುದು, ಪರಿಸ್ಥಿತಿಯನ್ನು ಸರಿಪಡಿಸಲು ಹರಸಾಹಸ ಪಡುವುದು ಎಲ್ಲವೂ ನಿಮ್ಮ ಜವಾಬ್ದಾರಿಯಂತೆ ಭಾಸವಾಗುತ್ತಿದ್ದರೆ, ಆ ಬಂಡಿಯನ್ನು ನೀವೊಬ್ಬರೇ ಎಳೆಯುತ್ತಿದ್ದೀರಿ ಎಂದರ್ಥ.
ಸಂಬಂಧವೆಂದರೆ ಅದು ಎರಡು ಜೀವಗಳ ಸಮಾನ ನಡಿಗೆ. ಒಬ್ಬರು ಮಾತ್ರ ಓಡಿ, ಇನ್ನೊಬ್ಬರು ನಿಂತರೆ ಆ ಓಟಕ್ಕೆ ಅರ್ಥವಿರುವುದಿಲ್ಲ. ನಿಮ್ಮ ಸಂಬಂಧದಲ್ಲೂ ಈ ಲಕ್ಷಣಗಳು ಕಾಣಿಸಿಕೊಂಡರೆ, ನಿಮ್ಮ ಸಂಗಾತಿಯೊಂದಿಗೆ ಮುಕ್ತವಾಗಿ ಮಾತನಾಡಿ, ನಿಮ್ಮ ಮನಸ್ಸಿನ ನೋವನ್ನು ಹಂಚಿಕೊಳ್ಳಿ. ಪ್ರೀತಿ ಎನ್ನುವುದು ಹೊರೆಯಾಗಬಾರದು, ಬದಲಿಗೆ ಹಗುರವಾದ ಹಿತಾನುಭವವಾಗಬೇಕು.
