ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತೀಯ ಚಿತ್ರರಂಗದ ರೆಬೆಲ್ ಸ್ಟಾರ್ ಪ್ರಭಾಸ್ ಅಭಿನಯದ ‘ಕಲ್ಕಿ 2898 ಎಡಿ’ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಸೃಷ್ಟಿಸಿದ ದಾಖಲೆಗಳು ಅಷ್ಟಿಷ್ಟಲ್ಲ. ವಿಜ್ಞಾನ ಮತ್ತು ಪೌರಾಣಿಕ ಕಥೆಯ ಅಪರೂಪದ ಸಮ್ಮಿಶ್ರಣದೊಂದಿಗೆ ಮೂಡಿಬಂದಿದ್ದ ಈ ಸಸ್ಪೆನ್ಸ್ ಮತ್ತು ರೋಮಾಂಚಕಾರಿ ಕಥೆಯ ಮುಂದುವರಿದ ಭಾಗ ಕುರಿತು ಬಹುದೊಡ್ಡ ಅಪ್‌ಡೇಟ್ ಹೊರಬಿದ್ದಿದೆ.
ಅಕ್ಟೋಬರ್ 23 ಅಂದರೆ ಇಂದು ಪ್ರಭಾಸ್ ಅವರ ಜನ್ಮದಿನ. ಈ ವಿಶೇಷ ದಿನವನ್ನು ಮತ್ತಷ್ಟು ಕಳೆಗಟ್ಟಿಸಲು ವೈಜಯಂತಿ ಮೂವೀಸ್ ನಿರ್ಮಾಣ ಸಂಸ್ಥೆಯು ‘ಕಲ್ಕಿ 2’ ಚಿತ್ರದ ಶೂಟಿಂಗ್ ಆರಂಭಗೊಂಡಿದೆ ಎಂದು ಅಧಿಕೃತವಾಗಿ ತಿಳಿಸಿದೆ. ಇದೇ ಖುಷಿಯಲ್ಲಿ ಶೂಟಿಂಗ್ ಸೆಟ್‌ನ ವಿಶೇಷ ವಿಡಿಯೋ ಮತ್ತು ಪ್ರಭಾಸ್ ಅವರ ಹೊಸ ಲುಕ್‌ನ ಪೋಸ್ಟರ್ ಒಂದನ್ನು ಹಂಚಿಕೊಳ್ಳಲಾಗಿದೆ. ಚಿತ್ರತಂಡದ ಸದಸ್ಯರಿಗೆ ಅದ್ದೂರಿ ಊಟದ ವ್ಯವಸ್ಥೆ ಮಾಡುವ ಮೂಲಕ ಶೂಟಿಂಗ್ ಕಾರ್ಯಕ್ಕೆ ಶುಭಾರಂಭ ನೀಡಲಾಗಿದೆ.
ಮೊದಲ ಭಾಗದಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದ ದೀಪಿಕಾ ಪಡುಕೋಣೆ ಅವರು ವೈಯಕ್ತಿಕ ಕಾರಣಗಳಿಂದಾಗಿ ಈ ಸೀಕ್ವೆಲ್‌ನಿಂದ ಹೊರನಡೆದಿದ್ದಾರೆ. ಈ ವಿಷಯವನ್ನು ಚಿತ್ರತಂಡವೇ ಖಚಿತಪಡಿಸಿದೆ. ಈಗ ಆ ಪ್ರಮುಖ ಪಾತ್ರಕ್ಕೆ ಮತ್ತೊಬ್ಬ ಪ್ರಸಿದ್ಧ ಸ್ಟಾರ್ ನಾಯಕಿಯನ್ನು ಕರೆತರುವ ಪ್ರಯತ್ನಗಳು ನಡೆಯುತ್ತಿದ್ದು, ಶೀಘ್ರದಲ್ಲೇ ಆ ಬಗ್ಗೆ ಅಧಿಕೃತ ಮಾಹಿತಿ ಹೊರಬೀಳಲಿದೆ. ಪ್ರಭಾಸ್ ಜೊತೆ ನಟಿಸಲಿರುವ ಆ ಹೊಸ ನಾಯಕಿ ಯಾರೆಂಬ ಕುತೂಹಲ ಸದ್ಯ ಅಭಿಮಾನಿಗಳಲ್ಲಿ ತೀವ್ರಗೊಂಡಿದೆ.
ಹಲವು ತಾಂತ್ರಿಕ ಸವಾಲುಗಳು ಮತ್ತು ಅಡೆತಡೆಗಳಿಂದಾಗಿ ಸಿನಿಮಾ ಬಿಡುಗಡೆ ತುಸು ವಿಳಂಬವಾಗಿದೆಯಾದರೂ, ಸೀಕ್ವೆಲ್ ಅನ್ನು ಮೊದಲ ಭಾಗಕ್ಕಿಂತಲೂ ಅತ್ಯಂತ ಅದ್ದೂರಿಯಾಗಿ ಮೂಡಿಸಲು ನಿರ್ಮಾಪಕರು ಯೋಜನೆ ರೂಪಿಸಿದ್ದಾರೆ. ವೈಜಯಂತಿ ಮೂವೀಸ್ ನಿರ್ಮಿಸುತ್ತಿರುವ ಈ ದೃಶ್ಯಕಾವ್ಯವು 2028ರಲ್ಲಿ ಚಿತ್ರಮಂದಿರಗಳಲ್ಲಿ ಅಪ್ಪಳಿಸುವ ಸಾಧ್ಯತೆಯಿದೆ. ಮೊದಲ ಭಾಗದ ಯಶಸ್ಸು ಸೀಕ್ವೆಲ್ ಮೇಲಿನ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದ್ದು, ಪ್ರಭಾಸ್ ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ.
