ವಿಜಯ್ ದೇವರಕೊಂಡ ಹೊಸ ಸಿನಿಮಾ ‘ರಣಬಾಲಿ’ ಬಾಕ್ಸ್‌ ಆಫೀಸ್‌ನಲ್ಲಿ ಮಂಕಾಗಿದ್ದೇಕೆ?

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಟಾಲಿವುಡ್ ಅಂಗಳದಲ್ಲಿ ಭಾರೀ ನಿರೀಕ್ಷೆ ಮೂಡಿಸಿದ್ದ, ರಾಹುಲ್ ಸಂಕೃತ್ಯನ್ ನಿರ್ದೇಶನದ ಪೀರಿಯಡ್ ಆಕ್ಷನ್ ಡ್ರಾಮಾ ‘ರಣಬಾಲಿ’ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ಸಂಚಲನ ಸೃಷ್ಟಿಸುವಲ್ಲಿ ವಿಫಲವಾಗಿದೆ. ರಜಾ ದಿನಗಳ ಸದುಪಯೋಗಪಡಿಸಿಕೊಂಡು ಕಲೆಕ್ಷನ್ ಸುಧಾರಿಸಿಕೊಂಡರೂ, ಚಿತ್ರದ ಒಟ್ಟಾರೆ ಗಳಿಕೆ ನಿಧಾನವಾಗಿ ತಣ್ಣಗಾಗುತ್ತಿದೆ.

ಸಿನಿಮಾ ತನ್ನ ಎರಡನೇ ಶುಕ್ರವಾರದಂದು ಭಾರತೀಯ ಬಾಕ್ಸ್‌ ಆಫೀಸ್‌ನಲ್ಲಿ ಅಂದಾಜು 2 ಕೋಟಿ ರೂ. ಗಳಿಸುವ ಮೂಲಕ ಹಿಂದಿನ ದಿನಕ್ಕಿಂತ ಸುಮಾರು ಶೇ. 40ರಷ್ಟು ಕುಸಿತ ಕಂಡಿದೆ. ಇನ್ನು ಮೊದಲ ದಿನದ ಆರಂಭಿಕ ಗಳಿಕೆಗೆ ಹೋಲಿಸಿದರೆ ಈ ಇಳಿಕೆ ಬರೋಬ್ಬರಿ ಶೇ. 80ರಷ್ಟು ಇದೆ. ಈ ಮೂಲಕ ಸಿನಿಮಾ ತನ್ನ ಮೊದಲ 8 ದಿನಗಳಲ್ಲಿ ದೇಶಾದ್ಯಂತ ಒಟ್ಟು 50.50 ಕೋಟಿ ರೂ. ಗ್ರಾಸ್ ಕಲೆಕ್ಷನ್ ಮಾಡಿದೆ.

ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ಉತ್ತಮ ಓಟ ಆರಂಭಿಸುವಲ್ಲಿ ಆರಂಭಿಕ ಹಂತದಲ್ಲೇ ಸೋತಿತ್ತು. ಹಬ್ಬದ ರಜೆಯ ಸೀಸನ್ ಮುಗಿಯುತ್ತಿದ್ದಂತೆ ಪ್ರೇಕ್ಷಕರ ಸಂಖ್ಯೆ ಗಣನೀಯವಾಗಿ ಇಳಿಕೆಯಾಗಿದೆ. ಪ್ರಸ್ತುತ ಟ್ರೆಂಡ್‌ಗಳನ್ನು ಗಮನಿಸಿದರೆ, ಚಿತ್ರದ ಒಟ್ಟು ಜೀವಿತಾವಧಿಯ ಗಳಿಕೆಯು 65 ಕೋಟಿ ರೂ. ದಾಟುವುದು ಕಷ್ಟಸಾಧ್ಯ ಎಂಬ ಮಾತುಗಳು ಕೇಳಿಬರುತ್ತಿವೆ.

ಸಾಮರ್ಥ್ಯವಿದ್ದರೂ ನಾಯಕ ನಟ ವಿಜಯ್ ದೇವರಕೊಂಡ ಅವರಿಗೆ ಇತ್ತೀಚಿನ ದಿನಗಳಲ್ಲಿ ಬಾಕ್ಸ್ ಆಫೀಸ್‌ನಲ್ಲಿ ಸರಿಯಾದ ಅದೃಷ್ಟ ಕೂಡಿಬರುತ್ತಿಲ್ಲ. ಅವರ ಹಿಂದಿನ ಸಿನಿಮಾಗಳಂತೆ ‘ರಣಬಾಲಿ’ ಕೂಡ ಅದೇ ಸಾಲಿಗೆ ಸೇರಿದೆ. ಅಭಿಮಾನಿಗಳು ಬಹಳ ನಿರೀಕ್ಷೆಯಿಂದ ಕಾಯುತ್ತಿರುವ ನಟನ ಆ ಭರ್ಜರಿ ಕಮ್‌ಬ್ಯಾಕ್ ಯಾವ ಸಿನಿಮಾದ ಮೂಲಕ ಸಿಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.